Bentley Motors თანამედროვე ტრენდებს მიჰყვება და ახალი სტრატეგიის Beyond100-ის რეალიზებას იწყებს.

ინგლისის ავტომრეწველობის სიამაყე, გერმანულ Volkswagen Group-ში შემავალი ლუქს -ბრენდი და 12-ცილინდრიანი ძრავების ერთ-ერთი უმსხვილესი მწარმოებელი მსოფლიოში, საკუთარ მიდგომებს რადიკალურად ცვლის - 2030 წლისთვის კომპანია შიდა წვის ძრავებზე  უარის თქმას სრულად აპირებს.

უახლოესი 10 წლის მანძილზე ბრენდი ეკოლოგიური პასუხისმგებლობის ნიმუშად ქცევას გეგმავს. ეს ამბიციური გეგმა ეტაპობრივად განხორციელდება - 2025 წელს Bentley თავის პირველ ელექტრომობილს წარადგენს, ხოლო 2026 წლისთვის ლუქს-ბრენდის ყველა მოდელი ან ჰიბრიდული ან მთლიანად ელექტრონული იქნება.

2030 წლისთვის კი ბრენდი, რომელიც დიდი მოცულობის ძრავებითაა განთქმული, საბოლოოდ მხოლოდ ელექტრომობილების წარმოებაზე გადავა.

„ჩვენ პროგრესის  სათავეში უნდა ვიყოთ, ეს ჩვენ გენებში გვაქვს. ჩვენი ისტორია სარბოლო ავტომობილებით დაიწყო, დღეს კი შევიმუშავეთ სტრატეგია, რომელიც ფაქტობრივად ახალი კომპანიის შექმნას გულისხმობს და ლუქს-კლასის ავტომობილების წარმოებაში მსოფლიო ეტალონი გავხდებით“  - ამბობს კომპანიის აღმასრულებელი დირექტორი ედრიან ჰოლმარკი.

მისი თქმით, საუბარი არა მხოლოდ წარმოებას,  არამედ მთლიანად ბიზნეს-სტრატეგიისა და მიდგომის შეცვლაზეა. 

სტრატეგიის პირველი ნაბიჯები უკვე გადაიდგა - კომპანიის საწარმოში დაინერგა ახალი ტექნოლოგია, რომელიც მავნე გამონაბოლქვებს  მნიშვნელოვნად ამცირებს. კერძოდ, ქარხანაში 30 000 მზის ბატარეა დაყენდა, სამღებრო საამქროში კი წყლის რეცირკულაციის სისტემა დაინერგა.

2025 წლისთვის Bentley  წარმოებაში მავნე ნივთიერებების გამოყოფას 75%-ით შემცირებას გეგმავს.

პარალელურად ბრენდი პლასტიკზე მთლიანად უარის თქმას აპირებს. Bentley  ხეების დარგვასა და ენერგიის განახლებად წყაროებში ინვესტიციების ჩადებას გეგმავს.

ასევე მეტი ყურადღება მასალებს და ნედლეულს დაეთმობა - ავტომობილების წარმოებაში გამოიყენება მხოლოდ ის მასალები, რომლებიც ეკოლოგიურად სუფთა მეთოდებითაა მიღებული.

თუმცა, ცვლილებები ყველაფერს არ შეეხება - Bentley-ის ერთადერთი საწარმო დარჩება ქარხანა ინგლისის ქალაქ კრიუში, სადაც უკვე თითქმის 100 წელია მაღალი კვალიფიკაციის სპეციალისტები ლუქს-კლასის ავტომობილებს ხელით აწყობენ.

„ეს სწორედ ისაა, რასაც მთელს მსოფლიოში ჩვენი მყიდველები პატივს სცემენ. სტრატეგია

Beyond100-ის წყალობით ჩვენ ლუქს-კლასის ავტომობილების წარმოებაში მსოფლიო ლიდერები გავხდებით“ - დარწმუნებულია ჰოლმარკი.

Bentley-ის განახლების პირველი ნაბიჯი ჰიბრიდების წარმოება იქნება.

„ჰიბრიდები - ეს ფსიქოლოგიური თვალსაზრისით გარდამავალი ეტაპია. შემდეგი ნაბიჯი იქნება ელექტრომობილი, რომელიც ძალიან კომფორტულია, რბილად და უხმაუროდ მოძრაობს, თანაც ამავე დროს შეიძლება ძალიან მძლავრიც იყოს. ეს სწორედ ისაა, რასაც კლიენტები ჩვენგან ელიან“  - მიიჩნევს ჰოლმარკი.

forbes.ru

თენგიზ აბლოთია