„არ გამოვრიცხავ აშშ-ს მხრიდან მორიგ გამოხმაურებას და ვფიქრობ, რომ კიდევ იქნება ასეთი კომუნიკაცია.“ - ნავთობისა და გაზის ამერიკული კომპანია საქართველოში Frontera Resources-ი ამერიკელი კონგრესმენების მხრიდან ამერიკული ინვესტიციების მიმართ დამოკიდებულებაზე მორიგი წერილის მიღებას არ გამორიცხავს.
აშშ-ის კონგრესის რესპუბლიკელმა წევრმა მარკუეინ მალინმა საქართველოს პრემიერ-მინისტრს გიორგი გახარიას ღია წერილით 13 იანვარს მიმართა. „ამერიკული და ევროპული ბიზნესინტერესები საქართველოში შევიწროებასა და ექსპროპრიაციის მიზნით, თავდასხმებს დაექვემდებარნენ. ამის შესანიშნავი მაგალითია ნავთობისა და გაზის კომპანია Frontera Resources ტეხასიდან.“ - წერს კონგრესმენი.
თებერვალში ტეხასის შტატის კონგრესმენმა, რენდი ვებერმაც ასევე ღია წერილით შეშფოთება გამოთქვა დემოკრატიულ ღირებულებებთან , საინვესტიციო გარემოსთან და ამერიკული კომპანიების შევიწროებასთან დაკავშირებით. „ამერიკული და ევროპული ბიზნესი ასეთ გარემოში მნიშვნელოვან გამოწვევებს ხედავს და არის შევიწროების, კონტრაქტების გაწყვეტის , ექსპროპრიაციისა დათავდასხმების შემთხვევები. ამის მაგალითია გაზისა და ნავთობის კომპანია ჩემი მშობლიური შტატიდან, ჰიუსტონიდან Frontera Resources.”- წერს ვებერი.
ამერიკელი კონგრესმენების წერილების „მთავარი გმირი“, კომპანია Frontera Resources-ი მომავალშიც არ გამორიცხავს დასავლელი სტრატეგიული პარტნიორების მორიგ გამოხმაურებას საქართველოს მთავრობასა და Frontera-ს დავასთან, შესაბამისად, მიმდინარე მოვლენებთან დაკავშირებით. როგორც ნავთობისა და გაზის კომპანიის გენერალური დირექტორი ზაზა მამულაიშვილი ექსკლუზიურად „კომერსანტთან“ საუბარში აღნიშნავს, აშშ-ში საქართველოს საინვესტიციო კლიმატი ფასდება სიტყვათა შეთანხმებით - „ამერიკული ინვესტიციების მიმართ მტრული დამოკიდებულება“.
„ძალიან ბევრი ადამიანი ამერიკის როგორც პოლიტიკურ, ასევე საქმიან წრეებში მართლაც რომ შეშფოთებულია ამ ვითარებით. წლების განმავლობაში იმის აღქმა, რომ საქართველო აშშ-ს სტრატეგიული პარტნიორია, რეალურად არ აისახა ამერიკული ინვესტიციების მიმართ მეგობრულ დამოკიდებულებაში. „ამერიკული ინვესტიციების მიმართ მტრული დამოკიდებულება“ - ასეთი ენით არის ასახული ამერიკელების განწყობა საქართველოში არსებულ ვითარებაზე. ვფიქრობ, რომ რაღაც კომუნიკაცია ალბათ კიდევ იქნება იმიტომ, რომ უამრავი ადამიანი არის მზად, რომ თავისი წვლილი შეიტანოს ამ ურთიერთობის გაუმჯობესებაში და ამერიკული ბიზნესისთვის უკეთესი საინვესტიციო პირობების შექმნაში.“ - ამბობს ზაზა მამულაიშვილი.
დავის ერთ-ერთი მთავარი საფუძველი სალიცენზიო ტერიტორიაა - სახელმწიფო ამბობს, რომ Frontera-მ , კონტრაქტის შესაბამისად, მისი 99 პროცენტი უნდა დათმოს, ამერიკული კომპანია კი ამტკიცებს, რომ ხელისუფლება მას რესურსებით მდიდარ ტერიტორიას ართმევს.
Frontera-ს ვერსიით, 1997 წლიდან საქართველოში განხორციელებულიინვესტიციის მოცულობა 580 მილიონ დოლარს აღწევს, სახელმწიფო კი ამტკიცებს, რომ თანხა რამდენიმე ასეული მილიონით ნაკლებია.ამ ეტაპზე კომპანიასა და სახელმწიფოს შორის საარბიტრაჟო დავა მიმდინარეობს, რომელიც ზაზა მამულაიშვილის ვარაუდით რამდენიმე თვეში უნდა დასრულდეს.
მარიამ მორგოშია