მას შემდეგ, რაც დონალდ ტრამპმა თეთრი სახლი დატოვა, მისი საქმეები არც თუ ისე სახარბიელოდ წარიმართა. განსაკუთრებით ეს მის ვაშინგტონის ლუქს-კლასის სასტუმროს ეხება, რომელიც ღრმა კრიზისშია.
სასტუმრო Trump International-ი ამერიკის დედაქალაქში შემოსავალს და რაც მთავარია, რეპუტაციას კარგავს. წლების მანძილზე სასტუმრო დიპლომატებით, ლობისტებით, ტრამპის ერთგული ადამიანებით და თავად მილიარდერი პრეზიდენტის ოჯახის წევრებით სავსე იყო.
ტრამპი საკუთარ სასტუმროს „მეორე თეთრ სახლად“ ხშირად იყენებდა. ძნელად მოიძებნებოდა ამერიკაში ადგილი, სადაც ამდენ კეპს დაინახავდით წარწერით Make America Great . არც იყო გასაკვირი - სად თუ არა ტრამპის კუთვნილ ობიექტში მისივე სიმბოლიკა განსაკუთებით დიდი რაოდენობით უნდა ყოფილ იყო წარმოდგენილი?
თუმცა, წარმატების და კეთილდღეობის დრო წარსულს ჩაბარდა. ჟურნალ Washington Life-მა ტრამპის სასტუმროს „ოტელი-მოჩვენება“ დაარქვა.
„ვაშინგტონში ტურისტებიც კი არ არიან. რომც იყონ - ძნელი წარმოსადგენია, რომ ისინი ტრამპის სასტუმროში იცხოვრებენ. ყოველ შემთხვევაში მე არც ერთ ასეთ ადამიანს არ ვიცნობ“ - აღწერს სიტუაციას სასტუმროს ირგვლივ ჟურნალისტი სალი კვინი.
2020 წელს Trump International -ის მოგებამ 15 მლნ. დოლარი შეადგინა, რაც 60% ნაკლებია, ვიდრე 2019 წელს.
პანდემიასთან დაკავშირებული ობიექტური სირთულეები - პრობლემის მხოლოდ ერთი ნაწილია. მეორე კი - კაპიტოლიუმის შტურმის შემდეგ ტრამპის რეპუტაციის დაკარგვა.
სასტუმროს პერსონალი კლიენტების რაოდენობის მკვეთრ შემცირებას ადასტურებს. ერთ-ერთი თანამშრომლის თქმით, კლება განსაკუთრებით აშკარა ბოლო 1 თვის მანძილზე გახდა.
თუმცა, ტრამპის ოჯახში პრობლემებზე გაგონებაც არ სურთ. ექს-პრეზიდენტის შვილი ერიკ ტრამპი სასტუმროს წარმატებაზე საუბრობდა, თუმცა, კონკრეტულ ციფრებს არ ასახელებდა.
„სასტუმრო ინდუსტრიაში ჩვენ ტოლი არ გვყავს. წარმოუდგენლად ვამაყობთ იმით, რომ ჩვენი ქვეყნის დედაქალაქში საუკეთესო სასტუმროს ვფლობთ“ - განაცხადა მან.
თუმცა, რეალობა განსხვავებულია. სასტუმროში არის რესტორანი, რომელშიც ვაშინგტონში საუკეთესო სტეიკებს აკეთებენ.
„მახსოვს დრო, როდესაც რესტორანი მუდმივად სავსე იყო. ვერ წარმოიდგენთ ჩვენს რესტორანს რამდენი მნიშვნელოვანი პერსონა სტუმრობდა. დღეს კი ის თითქმის ცარიელია“ - ამბობს რესტორნის ყოფილი შეფ-მზარეული.
fr.ge
თენგიზ აბლოთია