კორონავირუსის პანდემიამ რუსეთს ძალიან ძლიერად დაარტყა - თუმცა, ექიმები აღჭურვილობის და დაცვის საშუალებების დეფიციტის გამო არ წუწუნებენ - წინააღმდეგ შემთხვევაში, შესაძლოა ისინი ფანჯრიდან გადმოვარდნენ - ყველაფერთან ერთად რუსეთში გაურკვეველი მიზეზებით ექიმების სიკვდილიანობაც გაზრდილია.
რუსეთი პანდემიაზე შიზოფრენიულ რეაქციას ავლენს - ჯერ კიდევ მარტში ცნობილი ექიმები ტელევიზიით აცხადებდნენ, რომ შტატებმა ჩინეთის წინაამღდეგ ბიოლოგიური იარაღის გამოყენება სცადეს, თუმცა, ეფექტი მოსალოდნელზე სუსტი აღმოჩნდა.
როდესაც ინფიცირებულთა რაოდენობა მკვეთრად გაიზარდა, პუტინმა „უქმე დღეები“ ხელფასების შენარჩუნებით გამოაცხადა. თუმცა, პარალელურად გაჩერებულ ბიზნესს არავითარი დახმარება არ მიუღია, და არც საგანგებო მდგომარეობა გამოცხადდა - ეს იმიტომ, რომ ის მთავრობის მხრიდან საკუთარ თავზე ფინანსური გარანტიების აღებას გულისხმობს.
ამის ნაცვლად, რუსეთის მოსახლეობა თვითიზოლაციის რეჟიმში აღმოჩნდა - თუმცა, ოფიციალურად ნებაყოფლობითი ჩაკეტილობის დარღვევა სერიოზული ჯარიმებით ისჯება. მაგალითად, ქალაქ კრასნოიარსკში 2 გოგონა, რომელიც გაძარცვეს და გააუპატიურეს, ამავე დროს დააჯარიმეს - მათ გარეთ ყოფნის უფლება არ ჰქონდათ.
პუტინი დრო და დრო მოსახლეობას მიმართავს, თუმცა, პასუხისმგებლობას თავის თავზე არ იღებს - გადაწყვეტილებების მიღების ტვირთი მან რეგიონების გუბერნატორებს გადააბარა. ამავე დროს ის კეთილი და გამგები მმართველის როლის მორგებას ცდილობს- მაგალითად, მისი ბოლო მიმართვა სიტყვებით „ჩემო ძვირფასებო“ დაიწყო. ბევრ კომენტატორს ამან 1941 წლის ივნისში საბჭოთა ხალხისადმი სტალინის მიმართვა - „ძმებო და დებო“ - გაახსენა.
რუსეთის პრეზიდენტმა სთხოვა მოსახლეობას კიდევ ცოტა მოითმინონ, თუმცა, საზოგადოების უკმაყოფილების და აქტიური ქმედებების მოლოდინის ფონზე, მან ფინანსური დახმარების შესახებ საუბარი დაიწყო. თუმცა, ბიუროკრატიული ბარიერები ძალიან დიდია, და ბევრი რუსი დაპირებულ დახმარებას ვერ იღებს.
11 მაისს ქვეყანამ შიზოფრენიის შემდგომ სტადიას მიაღწია - პუტინმა „უქმე დღეების“ დასრულება გამოაცხადა. ბევრი კომპანიის ხელმძღვანელი სამსახურებში თანამშრომლებს იბარებს - და ეს მაშინ, როდესაც რუსეთი დაინფიცირებულთა რაოდენობით მსოფლიოში მეორე ადგილზე გავიდა.
ამავე დროს ოფისებში არაა გათვალისწინებული ეპიდემიოლოგიური დაცვის არავითარი ზომები, და მდგომარეობა ძველ რუსულ ზღაპარს წააგავს - სამსახურში თუ წახვალ - სახელმწიფო დაგაჯარიმებს, თუ არ წახვალ - უფროსობა დაგსჯის.
ამიტომაც ბევრი რუსი ბიულეტენს ან აუნაზღაურებელ შვებულებას იღებს.
საავადმყოფოები გადავსებულია, ექიმებს დაცვის საშუალებები და ტესტ-სისტმები აკლია, თუმცა, ამას ემატება ტყუილები - თითქმის 250 000 დაავადებულის ფონზე გარდაცვალების მხოლოდ 2000-მდე შემთხვევაა ოფიციალურად რეგისტრირებული. სხვა ქვეყნებთან შედარებით ეს ძალიან დაბალი შეფარდებაა - სავარაუდოდ, მონაცემები გაყალბებულია, ხოლო ექიმებს ხმის ამოღება აკრძალული აქვთ.
ამავე დროს აპრილში მხოლოდ მოსკოვში წინა წელთან შედარებით სიკვდილიანობა 2500-ითაა გაზრდილი, სოციალურ ქსელებში ადამიანები თავიანთი ნათესავების და ახლობლების კორონავირუსისგან გარდაცვალების ფაქტებზე მუდმივად წერენ.
ახალი ტენდენციაც გამოვლინდა - ოფიციალურად ადამიანი ინფაქტის ან მძიმე პნევმონიის გამო კვდება, თუმცა, მას დახურულ კუბოთი ასაფლავებენ.
განსაკუთრებით მძიმე მდგომარეობაა ჩრდილოეთ კავკასიაში, კერძოდ კი დაღესტანში, სადაც ადამიანები, დიდი რაოდენობით, ფილტვების ანთებით იღუპებიან.
აპრილიდან რუსეთში ახალი სისხლის სამართლის დანაშაული გაჩნდა - „მოსახლეობისთვის საფრთხის შემცველი მცდარი ინფორმაციის გავრცელება“. ის ჯარიმით, ან 3 წლამდე თავისუფლების აღკვეთით ისჯება.
თანაც ეს არა მხოლოდ მას-მედიას და სოციალურ ქსელებს, არამედ ზეპირ საუბრებსაც ეხება.
რამდენიმე დღის წინ „რადიო თავისუფლებას“ კორესპოდენტი ტატიანა ვოლტსკაია პროკურატურაში დაიბარეს - ამის მიზეზი მისი პუბლიკაცია იყო, სადაც სანქტ-პეტერბურგის ერთ-ერთი საავადმყოფოს ანონიმურმა ექიმი ხელოვნური ვენტილაციის აპარატების მწვავე უკმარისობაზე საუბრობდა.
ჟურნალისტმა წყაროს გამხელაზე კატეგორიული უარი განაცხადა, და დღეს მას სისხლის სამართლებრივი პასუხისმგებლობა ემუქრება.
საავადმყოფოებში რეალურად რა ხდება - მხოლოდ ახლობლებისგან გაიგებთ. ტელეფონით გადაღებულ ვიდეოზე რეგიონულ კლინიკებში შექმნილ ვითარებას ვხედავთ - დაობებული კედლები, და მწერებით გავსებული პალატები. მედპერსონალის დეფიციტის პირობებში, სამედიცინო ინსტიტუტების სტუდენტებს პრაქტიკის გავლა კორონავირუსთან მებრძოლ საავადმყოფოებში უწევთ.
პერსონალის უკმარისობა - რუსეთში ჩატარებული „ჯანდაცვის ოპტიმიზაციის“ შედეგია - მაგალითად, უმცროსი სამედიცინო პერსონალის რაოდენობა 264 000-ს შეადგენს - ეს 40%-ით ნაკლებია, ვიდრე 6 წლის წინ იყო.
ამ დროს რუსეთის ეროვნული გვარდია, რომელიც მიტინგების დასაშლელად გამოიყენება, 430 000 ადამიანს ითვლის.
კრიზისმა ისიც მოიტანა, რომ დღეს სამართლადამცავ ორგანოებს გაცილებით მეტი უფლებები, და ბევრად ნაკლები პასუხისმგებლობა აქვთ. ეს კი რუსეთისთვის ყოველთვის ახალი პრობლემების წყაროა.
თენგიზ აბლოთია
რუსეთი
