ხორბლის იმპორტის კატასტროფული კლების ფონზე ფქვილის იმპორტი და მოხმარება იზრდება. როგორც პურის მცხობელთა ასოციაციის ხელმძღვანელი მალხაზ დოლიძე ,,კომერსანტთან“ ამბობს, საქართველოს მუდმივად აქვს 2 თვის მარაგი, ამიტომ პურის წარმოებას საფრთხე მინიმალურ დონეზეც არ ემუქრება.
ასე პასუხობს დოლიძე ცოტა ხნის წინ მედიაში გავრცელებულ ინფორმაციას, რომ „საქართველოში ხორბლის მარაგი ამოწურულია და უახლოეს პერიოდში ყველა წისქვილკომბინატი გაჩერდება“.
მეტიც, როგორც დოლიძე აცხადებს, ხორბალი არ შემოდის კატასტროფული გაძვირების გამო, სამაგიეროდ, წისქვილკომბინატების გარკვეული ნაწილი უკვე ფქვილის იმპორტითაა დაკავებული და ეს ტენდენცია გაგრძელდება, სანამ ხორბლის ფასი არ დასტაბილურდება.
,,რუსეთმა დააწესა ხორბალზე მცოცავი გადასახადი, რაც 98 დოლარს შეადგენს. ხორბლის ფასი 400 დოლარი გახდა, იმპორტისთვის ეს მთლიანობაში უკვე 500 დოლარია, ხოლო ამ ფასად ხორბლის შეძენა რეალურად წარმოუდგენელია. მაშინ პური 5 ლარამდე უნდა გაძვირდეს! ზოგიერთმა წისქვილმა ფქვილის შემოტანა დაიწყო, მაგრამ ამაზე არავინ ლაპარაკობს. ხორბლის იმპორტი რეალურად რთულია, სიმართლეს თვალი გავუსწოროთ. სამაგიეროდ, ფქვილის იმპორტი ხელსაყრელია და მუდმივად არის 2 თვის მარაგი, არანაირი საფრთხე არ გვემუქრება, სულაც რომ გაჩერდეს ხორბლის იმპორტი, უპუროდ არ დავრჩებით. ქართული ხორბალიც მალე შეგვეშველება“, - ამბობს მალხაზ დოლიძე.
მისი თქმით, რუსეთში რეკორდულ მაჩვენებელს ელიან, რაც ფასებზე გავლენას მოახდენს და შესაძლებელია ფქვილი სამომავლოდ გაიაფდეს კიდეც, რის ტენდენციაც დაწყებულია.
,,ახალ მოსავალს ელიან, ყველა თავისუფლდება ძველი ნაშთებისგან და რუსეთში ფასიც დაბლა წამოვა. ფქვილის მარაგი არის და იმპორტიც დაუბეგრავად შემოდის. სომხეთს რუსული ფქვილი იმდენი დაუგროვდა, რომ ირანში ჰყიდის. გარდა ამისა, რუსეთში ელოდებიან 130 მილიონ ტონა მოსავალს, რაც რეკორდული მაჩვენებელია. რეალიზაციის დიდი პრობლემა შეექმნებათ სანქციების გამო და ყველა პირობაა, რომ უფრო შეღავათიან ფასში შემოვიდეს ეს პროდუქტი საქართველოში. ისრაელის გარშემო ყველა მტერია, მაგრამ ყველასთან საუკეთესო ეკონომიკური ურთიერთობა აქვთ. ქვეყნისთვის პრიორიტეტია ის, რაც აწყობს ხალხს, ამიტომ ჩვენც უნდა გვესმოდეს, რომ სტრატეგიული პროდუქტის იმპორტზე უარს ვერ ვიტყვით. ვიმეორებ, უპუროდ არ დავრჩებით, საფრთხე ამ მხრივ ნამდვილად არ გვემუქრება“, - აცხადებს მალხაზ დოლიძე ,,კომერსანტთან“.
მისივე ინფორმაციით, ბოლო დღეების განმავლობაში ფქვილი 2-3 ლარით გაიაფდა და 1 ტომარა პროდუქტის ღირებულება 72-73 ლარის ფარგლებშია.
მარი ჩიტაია