23 ივლისს „თავისუფალი ზონების მსოფლიო ორგანიზაციამ“ (World FZO)  სხვადასხვა ქვეყანაში ოფიციალური წარმომადგენლობების დანიშვნასთან დაკავშირებით, ონლაინ ცერემონია  გამართა. ამიერიდან  საქართველოში World FZO-ის ოფიციალური წარმომადგენელი ფოთის თიზ-ი იქნება. ამ მიზნით გამართულ ონალაინ ცერემონიაზე,   World FZO-სა და ფოთის თიზ-ს შორის ხელშეკრულებას მოეწერა ხელი.

„თავისუფალი ზონების მსოფლიო ორგანიზაცია (World FZO) არის უმსხვილესი და გავლენიანი საერთაშორისო გაერთიანება, რომელშიც მსოფლიოს 2660 თავისუფალი ზონიდან 1700 სუბიექტია გაერთიანებული. იგი წარმოადგენს თავისუფალი ზონების ინტერესებს მთელს მსოფლიოში და ხელს უწყობს მსოფლიო ეკონომიკაში მათი როლის  გასაზრდელად საერთაშორისო დონეზე თანამშრომლობას. World FZO-ის აღმასრულებელი დირექტორის, დოქტორ სამირ ჰამრუნის განცხადებით:  „სხვადასხვა ქვეყანაში წარმომადგენლების დანიშვნით ორგანიზაცია აფართოებს თავისი სერვისების მოცვის სივრცეს,  უზრუნველყოფს პრობლემების გამოკვეთას რეგიონულ ჭრილში და გამოცდილების გაზიარებას თავისუფალი ეკონომიკური ზონების წინაშე მდგარი ამოცანების გადასაჭრელად“.

 ,,ასეთი ავტორიტეტული საერთაშორისო ორგანიზაციის მიერ ფოთის თიზ-ის საქართველოში მის ოფიციალურ წარმომადგენლად  დასახელება ჩვენთვის დიდი პატივია. თავისუფალი ზონების მსოფლიო ორგანიზაციასთან (World FZO)’’ თანამშრომლობის გაღრმავება  მნიშვნელოვანი ბერკეტია ინვესტორებთან ურთიერთობების გაფართოებისა და მსოფლიო ბაზარზე ჩვენი პოზიციონირების გასაზრდელად“, - აღნიშნა ფოთის თიზ-ის გენერალურმა დირექტორმა დავით ებრალიძემ.

ფოთის თავისუფალი ინდუსტრიული ზონა არის პირველი საგადასახადო ვალდებულებებისგან განთავისუფლებული ტერიტორია საქართველოში და კავკასიის რეგიონში, რომელშიც საქართველოს მთავრობა წარმოდგენილია პარტნიორის სახით. თიზ-ში რეგისტრირებული კომპანიები წარმატებით ახორციელებენ სავაჭრო-საწარმოო ბიზნესს, მათ შორის  იმპორტის/რე-ექსპორტის/ექსპორტის პროცედურებს. კომპანიები ფოთის თიზ-ში აწარმოებენ და ასაწყობებენ სხვადასხვა ტიპის პროდუქტებს, რომელსაც აწვდიან  საქართველოს, დსთ-ს რეგიონსა და  საერთაშორისო ბაზრებს.

ფოთის თიზ-ის გენერალური დირექტორის  განცხადებით, პანდემიასთან წარმატებულმა ბრძოლამ აჩვენა, რომ საქართველოში  ყველა პირობაა შექმნილი  ინვესტორთა მხარდაჭერისა და დაცულობისთვის. ამიერიდან, ფოთის თიზ-ი, როგორც World FZO-ს ოფიციალური წარმომადგენელი საქართველოში, პასუხისმგებელი იქნება   მსოფლიო FZO- სთან  ინფორმაციის, ცოდნისა და გამოცდილების გაცვლაზე და  მსოფლიოს და საქართველოს თავისუფალ ზონებს შორის ინტეგრაციის გაღმავებაზე.