მარტში კომპანია „ჯორჯიან ტექნოლოჯი თიზ“-ი ფოთის თავისუფალ ინდუსტრიულ ზონაში ელექტრონული მიკროსქემების საწარმოს გახსნის, რომლის ჯამური საპროექტო-საინვესტიციო ღირებულება დაახლოებით 3 მლნ ლარს შეადგენს. ინფორმაციას „ჯორჯიან ტექნოლოჯი თიზ“-ი ავრცელებს.

„ჩვენ ფოთის თიზ-ში ბიზნეს საქმიანობა დავიწყეთ ვაჭრობით, თუმცა 1 წლის შემდეგ ვიწყებთ მიკროსქემების აწყობას და მომავალშიც ვგეგმავთ გაფართოებას. ჩვენს მიერ წარმოებული პროდუქცია ექსპორტზე გავა აშშ-ში და სხვა რეგიონალურ ბაზრებზე. საწარმო უკვე მუშაობს სატესტო რეჟიმში და რამდენიმე თვეში ვგეგმავთ ოფიციალურ გახსნას,“ - განაცხადა ჩვენთან საუბარში შპს „ჯორჯიან ტექნოლოჯი თიზ“-ის დამფუძნებელმა თურქმა ბიზნესმენმა აჰმეთ ონერმა.

დღეისათვის, თითქმის დასრულებულია შენობის შიდა ინტერიერის სარემონტო სამუშაოები და მიმდინარეობს მაღალტექნოლოგიური დანადგარებით აღჭურვა. საწარმოში 50-მდე ადგილობრივი მუშახელი დასაქმდება, რომლებიც წინასწარ გაივლიან გადამზადების კურსს.

„ელექტრონული მიკროსქემების დამზადება ახალი მიმართულებაა ქართულ წარმოებაში და მოხარული ვართ, რომ მისი აწყობა მოხდება ფოთის თავისუფალი ინდუსტრიული ზონის ტერიტორიაზე,“ - აღნიშნა ფოთის თიზ-ის გენერალურმა დირექტორმა დავით ებრალიძემ.

მისი განცხადებით, თიზ-ში რეგისტრირებული მწარმოებელი კომპანიები სარგებლობენ საქართველოსა და სხვადასხვა ქვეყნებს შორის გაფორმებული თავისუფალი ვაჭრობის ხელშეკრულებებით, რაც მათ საშუალებას აძლევს წარმოებულ პროდუქციაზე მიიღონ ქართული წარმოშობის პრეფერენცირებული სერტიფიკატები, მათ შორის EURO1 და ST1.

ფოთის თიზ-ი ინვესტორებს სთავაზობს „ერთი ფანჯრის პრინციპით“ ფართო სპექტრის მომსახურებას (რეგისტრაცია, ლიცენზიები, სასაწყობე და მიწის ნაკვეთების იჯარა, თანამედროვე ინფრასტრუქტურა და საბაჟო სერვისი) უწყვეტ რეჟიმში-24/7. ფოთის თიზ-ისთვის მინიჭებული საგადასახადო შეღავათებით თიზ-ში რეგისტრირებული კომპანიები წარმატებით ახორციელებენ იმპორტის/რე-ექსპორტის/ექსპორტის პროცედურებს, აწარმოებენ და ასაწყობებენ სხვადასხვა ტიპის პროდუქტებს, რომელსაც საქართველოს, დსთ-ს და საერთაშორისო ბაზრებს აწვდიან.

(R)