გუშინ ფოთის თავისუფალი ინდუსტრიული ზონის ტერიტორიაზე ავტომანქანების კომპონენტების მწარმოებელი ქარხნის მშენებლობის საძირკვლის ჩაყრის ღონისძიება გაიმართა, რომელსაც დაესწრნენ სამეგრელო-ზემო სვანეთის სახელმწიფო რწმუნებულის პირველი მოადგილე დავით ფარცვანია, ქ. ფოთის მერი გოჩა კურდღელია, ფოთის თავისუფალი ინდუსტრიული ზონის გენერალური დირექტორი დავით ებრალიძე, ფოთის თიზ-ის ინვესტიციების მოზიდვის უფროსი თამარ სახეიშვილი, შპს „სდტ ჯორჯიას„ დამფუძნებელი ჯიაკომო ძამატიო და გენერალური დირექტორი მანავ კუმარი. 

ფოთის თიზ-ში დაიწყო ევროპული სტანდარტების, ეკომეგობრული, თანამედროვე ტექნოლოგიური დანადგარებით აღჭურვილი ახალი ქარხნის მშენებლობა, რომლის წარმოებაც ექსპორტსა და ადგილობრივი მუშახელის დასაქმებაზეა ორიენტირებული. ქარხანას აშენებს ფოთის თიზ-ში რეგისტრირებული კომპანია შპს „სდტ ჯორჯია“, რომლის ბენეფიციარი, ბიზნესმენი ჯიაკომო ძამატიო ფლობს ანალოგიური ტიპის ქარხნებს ჩინეთსა (ქ. სუჯოუ) და იტალიაში (ქ. მილანი).

ქარხანა შენდება ფოთის თიზ-ის ტერიტორიაზე გამოყოფილ 5000 კვ.მ ფართობის ნაკვეთზე, სადაც ქართული და უცხოური ნედლეულის: ალუმინისა და თუთიის ზოდებისგან ჩამოისხმება სხვადასხვა ტიპის ავტომანქანების კომპონენტები, რომელთა ექსპორტი განხორციელდება ევროკავშირის ქვეყნებში, ჩინეთში, აშშ-სა და მექსიკაში. წარმოების პირველ წელს დაგეგმილია 5 მლნ აშშ დოლარამდე ღირებულების კომპონენტების ექსპორტი, რომლის მოცულობაც ყოველწლიურად გაიზრდება.

პირველ ეტაპზე ქარხანაში დასაქმდება 60-მდე ადგილობრივი მუშახელი, რომელთა რაოდენობა 2021 წლისთვის 100 თანამშრომლამდე გაიზრდება. ქარხანაში დასაქმებული მუშახელი სპეციალურ გადამზადებას გაივლის ჩინეთში, ქ. სუჯოუში მდებარე ანალოგიური ტიპის ქარხანაში. კომპანიამ უკვე გაგზავნა პირველი ჯგუფი გადასამზადებლად, მეორე ჯგუფის გაგზავნა კი 2020 წლის აპრილშია დაგეგმილი.

ქარხნის მშენებლობა 2020 წლის იანვარში დაიწყება და 2020 წლის სექტემბერში დასრულდება. ქარხანას კომპანია „ეკოჰაუსი“ აშენებს.

„ქარხანა იტალიურ-ჩინური ინვესტიციით შენდება, რომლის სავარაუდო საინვესტიციო მოცულობაც 10 მლნ ლარია“, - აცხადებს „სდტ ჯორჯიას“ გენერალური დირექტორი მანავ კუმარი.

„ფოთის თიზ-ის გუნდის მიზანია ფოთის თავისუფალი ინდუსტრიული ზონის რეგიონული მასშტაბის საწარმოო ცენტრად გადაქცევა, სადაც შეიქმნება და დაექსპორტდება სხვადასხვა სახეობის ქართული პროდუქტი და დასაქმდება ადგილობრივი მუშახელი“,- აღნიშნა ფოთის თიზ-ის გენერალურმა დირექტორმა დავით ებრალიძემ.

მისი განცხადებით, ძალიან მნიშვნელოვანია ის, რომ მალე საქართველოს საქსპორტო პროდუქტების ჩამონათვალში სრულიად ახალი პროდუქტი - ავტომანქანების კომპონენტები გაჩნდება, რომელიც ფოთის თავისუფალ ინდუსტრიულ ზონაში დამზადდება, რაც, თავის მხრივ, ხელს შეუწყობს ამ წარმოებასთან დაკავშირებული სხვა წარმოებების მოზიდვას და მეტი ადამიანის დასაქმებას ქვეყნის მასშტაბით.

(NS)