ტექნოლოგიურმა სექტორმა კორონავირუსის პანდემია საკმაოდ კარგად გადაიტანა, რადგანაც ის დისტანციური მუშაობის საშუალებას იძლევა.
არის ტექნოლოგიების რამდენიმე სახეობა, რომელიც პანდემიის დროს არათუ არ დაზარალდა, არამედ გაიზარდა.
ვიდეოკავშირის სერვისები
2020 წელს ვიდეოზარები და ვიდეოკონფერენციები ყოველდღიური ცხოვრების განუყოფელი ნაწილი გახდა. მხოლოდ 14-20 მარტს შესაბამისი პროგრამები 62 მლნ. ადამიანმა გადმოწერა.
ამ წელს წარმატების ერთ-ერთი ყველაზე ნათელი მაგალითი ამერიკული ვიდეოსერვისის - Zoom-ის ისტორია გახდა. დისტანციურ მუშაობაზე გადასვლის გამო, მილიონობით ადამიანი ონლაინ-რეჟიმში მუშაობდა - მაგალითად, მხოლოდ შტატებში დისტანციურ საქმიანობაზე 4,7 მლნ. ადამიანი გადაერთო.
საყოველთაო ლოკდაუნების წყალობით, რომლებიც თითქმის ყველა ქვეყანაში გამოცხადდა, Zoom-ის პოპულარობა წარმოუდგენლად გაიზარდა - ამ სერვისს ყოველდღიურ რეჟიმში 300 მლნ. ადამიანი იყენებდა.
ასევე წარმატებული იყო პანდემიური წელი Zoom-ის კონკურენტისთვის - სერვის Microsoft Teams-ისთვის, რომლის მომხმარებელთა რაოდენობა 2019 წლის მარტთან შედარებით 2020 წლის მარტში 115 მლნ.-მდე გაიზარდა.
ახალგაზრდობაში პოპულარობა სერვისმა Houseparty-მ მოიპოვა, რომელიც ონლაინ-წვეულებების ორგანიზებას ახდენს. 2020 წელს მისი მომხმარებელთა რაოდენობა 130 000-დან 50 მლნ.-მდე გაიზარდა.
მიწოდების სერვისები
საქონლის, პირველ რიგში კვების პროდუქტების და მზა კერძების სერვისებმა პანდემიის დროს არნახული ზრდა დააფიქსირეს. ამ დარგში 2020 წლის პირველ 3 კვარტალში ინვესტიციებმა 8,7 მლრდ. დოლარი შეადგინა - ეს მეტია, ვიდრე მთელი 2019 წლის მანძილზე (7 მლრდ.).
აგვისტოში სერვისი Uber Eats-ი, არსებობის ისტორიაში პირველად, ტაქსის გამოძახების სერვისზე მომგებიანი გახდა - მისმა შემოსავალმა 6,9 მლრდ. დოლარი შეადგინა, ხოლო ტაქსის 3,04 მლრდ.
დისტანციური მუშაობის ტექნოლოგიები
2020 წელს მსხვილმა ტექნოლოგიურმა კომპანიებმა, მაგალითად, Twitter-მა და Facebook-მა თანამშრომლებს დისტანციურ სამუშაოზე გადასვლის უფლება მისცეს. ეს ტენდენცია დღეს მთელს მსოფლიოში ძალიან აქტუალურია, რაც შესაბამისი სერვისების პოპულარობის ზრდას იწვევს.
ერთ-ერთი ასეთი პროგრამაა გერმანული TeamViewer, რომელიც მსოფლიოს ნებისმიერი წერტილიდან ინტერნეტით კონკრეტულ ქსელში ჩართულ ყველა კომპიუტერთან წვდომის საშუალებას იძლევა.
2020 წლის მეორე კვარტალში სერვისის შემოსავალი 45%-ით გაიზარდა და 105,9 ევრო შეადგინა. კომპანიის მომხმარებელთა რაოდენობამ კი 31%-ით, 567 000-მდე მოიმატა..
ასევე თანამშრომლების კომპიუტერების დისტანციური კონტროლის სერვისების პოპულარობაც იზრდება - ისეთების, როგორც Time Doctor, Teramind, VeriClock, და ა.შ.
2020 წელს ამ დარგში უმსხვილესი ინვესტიცია იყო ფონდ Index Ventures-ის მიერ კომპანიების ქვეგანაყოფებს შორის დისტანციური კომუნიკაციის სერვის Discord-ში 100 მლნ. დოლარის ჩადება.
ონლაინ-განათლება
დისტანციური განათლების პლატფორმების პოპულარობა პანდემიამდეც იზრდებოდა, თუმცა, ლოკდაუნის წყალობით ამ დარგის სერვისებმა ინვესტიციების და მომხმარებლების დიდი რაოდენობა მიიღეს.
ონლაინ-სწავლების სეგმენტში ერთ-ერთი ყველაზე პოპულარული პლატფორმაა Coursera, რომელსაც მთელს მსოფლიოში ათობით მილიონი მომხმარებელი ჰყავს. 2020 წელი მისთვის ძალიან მომგებიანი აღმოჩნდა - ივლისში კომპანიამ, რომლის ღირებულებაც 2,2 მლრდ. დოლარს შეადგენს, 130 მლნ. დოლარის ინვესტიციები მოიზიდა.
ონლაინ-განათლების დარგში ინვესტიციების კუთხით მსოფლიო რეკორდსმენი ჩინური Yuanfudao გახდა, რომელმაც 2,2 მლრდ. დოლარის ინვესტიციები მოიზიდა, და განათლების ტექნოლოგიების სექტორში მსოფლიოს უმსხვილესი და ყველაზე ძვირადღირებული კომპანია გახდა - მისი კაპიტალიზაცია წლის მანძილზე გაორმაგდა და 15,5 მლრდ. დოლარი შეადგინა.
Forbes.ru
მოამზადა თენგიზ აბლოთიამ