ამერიკული საინვესტიციო ბანკი JPMorgan ყველა საფინანსო ოპერაციიდან გავიდა, რომლებიც რუსულ რუბლს უკავშირდებოდა. Reuters-ის ცნობით, ეს გადაწყვეტილება უკრაინაში რუსეთის შესაძლო შეჭრას უკავშირდება.
„ნეგატიურ სცენარებს მაღალი თავდაჯერებულობით ვერ გამოვრიცხავთ. შესაბამისად, ჩვენი არსებული გრძელვადიანი რეკომენდაციები ვერ შედგა“, - ცოტორებს სააგენტო JPMorgan-ის ანალიტიკოსებს.
JPMorgan-ის ექსპერტებმა აღნიშნეს, რომ რუსეთის საგარეოპოლიტიკური გაურკვევლობის გამო ვერ შეძლებენ რუბლის კურსის დინამიკის პროგნოზირებას.
ამასთან, სხვა დასავლელი ანალიტიკოსები აცხადებენ, რომ ეკონომიკური ფაქტორები თითქმის არ მოქმედებს, რადგანაც ძვირი ნავთობის და გაზის პირობებში რუსეთი უცხოური ვალუტის შედინების დეფიციტს არ განიცდის, თუმცა, პოლიტიკის წინაშე ფინანსური სისტემა უძლური აღმოჩნდა.
ნეგატიური პროცესები მას შემდეგ დაიწყო, რაც ბრიტანეთმა უკრაინიდან საელჩოს თანამშრომლების გაწვევა დაიწყო, ეს კი, როგორც მინიმუმ, მომავალში ვითარების გამწვავების უტყუარი ნიშანია. დიპლომატების ევაკუაცია ასევე აშშ-მ და ავსტრალიამ დაიწყეს.
პარალელურად ნატო-მ განაცხადა, რომ გააძლიერებს თავის შეიარაღებულ ძალებს აღმოსავლეთ ევროპის ქვეყნებში და ეს რუსეთის მიერ უკრაინის საზღვარზე საჯარისო ნაწილების მობილიზებით ახსნა.
„ცხადია, რომ ამჟამად კურსის ცვლილება, ისევე, როგორც წინა კვირებში, დაკავშირებულია პოლიტიკურ რისკებთან - ინვესტორებს აშინებთ შემდგომი ესკალაციის რისკი“, - მიიჩნევს „რენესანს კაპიტალ“-ის ექსპერტი სოფია დონეცი.
მისი თქმით, დაძაბულობა იზრდება, ინვესტორების რუსულ ბაზარს ტოვებენ და შესაბამისად, რუბლიც არამყარია და რუბლის შემდგომი დასუსტების შეჩერება მხოლოდ პოლიტიკური ვითარების დასტაბილურების უტყუარ ნიშნებს შეუძლია.
ფინანსური კომპანია Capital Lab-ის ექსპერტი ევგენი შატოვი პესიმისტურ სცენარს არ გამორიცხავს - მისი თქმით, თუ დაძაბულობის ესკალაცია გაგრძელდა, რუბლის კურს დოლართან შესაძლოა 100-მდე დაეცეს.
„ამ კვირას ველოდებით აშშ-ის წერილობით პასუხს რუსეთის მოთხოვნაზე ნატო-ს გაფართოებასთან დაკავშირებით. ამის შემდეგ ცოტათი მეტი გარკვეულობა იქნება მოვლენების შემდგომი განვითარების კუთხით. ასევე ბევრია დამოკიდებული ევროპის პოზიციაზე - შეუერთდება თუ არა ის აშშ-ის და ბრიტანეთის მიერ კიევიდან დიპლომატების გაწვევას. თუ ასე იქნება, ეს ნიშნავს დაძაბულობის ზრდას და რუბლს ამაზე შესაბამისი რეაგირება ექნება“, - განაცხადა მან.
სოფია დონეცი სამომავლო პროცესებს უფრო ოპტიმისტურად უყურებს - მისი თქმით, 80 რუბლი 1 დოლარში - ეს არის „ჭერი“ რუსული ვალუტისთვის და ის მეტად არ გაუფასურდება.
„ჩვენი საბაზო სცენარი ითვალისწინებს ზომიერ ესკალაციას, უკრაინაში სამხედრო შეჭრის გარეშე და რბილი სანქციებით, რომლებიც ეკონომიკას დიდ ზიანს არ მიაყენებენ. ამ შემთხვევაში კურსი ძველ ნიშნულებს დაუბრუნდება, და 75-76 ზღვარს არ გასცდება. ჩვენი აზრით ეს სცენარი ფუნდამენტურია და რუსეთი უკრაინაში სამხედრო შეჭრას თავიდან აიცილებს“, - მიიჩნევს დონეცი.
„რენესანს კაპიტალი“ მიიჩნევს, რომ კონფლიქტის ესკალაცია ეტაპობრივად იკლებს, ომი არ იქნება და ნედლეულზე დღევანდელი ფასების შენარჩუნების პირობებში რუბლი შესაძლოა 71-73-მდე გამყარდეს. „რაიფაიზენბანკ“-ის ექსპერტები მიიჩნევენ, რომ რუბლის დღევანდელ კურსში ასახულია რბილი სანქციების შესაძლებლობა, რომლებიც ბანკებს და ბიზნეს-კომპანიებს მნიშვნელოვან ზარალს არ მიაყენებენ.