კორონავირუსის პანდემიის მეორე ტალღის ფონზეც კი ფინანსურ ბაზარს არ შეუძლია ისეთი მნიშვნელოვანი რისკ-ფაქტორის იგნორირება, როგორიც აშშ-ს პრეზიდენტო არჩევნებია.
დონალდ ტრამპს და ჯო ბაიდენს შორის დაპირისპირება ამერიკული საზოგადოების ღრმა პოლარიზების ფონზე მიმდინარეობს. ქვეყანა უმნიშვნელოვანეს საკითხებში თითქის 50-50-ზე გაიყო.
წინაამღდეგობების მთავარი წყაროა სოციალურ-ეკონომიკური პოლიტიკა. ტრამპი, როგორც მტკიცე რესპუბლიკელი, დაბალი გადასახადების და სახელმწიფოს ეკონომიკაში მინიმალური ჩარევის მომხრეა. ის კონსერვატიულ დარგებს ეყრდნობა, ისეთებს, როგორც ნავთობმოპოვება და მეტალურგიაა.
ბაიდენი კი გაცილებით უფრო მემარცხენეა - ის მდიდარი მოქალაქეებისთვის და კორპორაციებისთვის გადასახადების მატებას, საშუალო ხელფასის და ჯანდაცვის ხელმისაწვდომობის ზრდას გეგმავს. მისი გამარჯვების შემთხვევაში კორპორატიული სექტორი მოგების 5-6% დაკარგავს.
თუმცა, ამის კომპენსირებას სამომხმარებლო ხარჯების ზრდა მოახდენს. დათვლილია, რომ საათობრივი ხელფასის 1 დოლარით მომატება კვარტალურ სამომხმარებლო ხარჯებს 750 დოლარით ზრდის.
ზოგადად, ბაიდენი კორპორატიული სექტორისთვის არასასურველ კანდიდატად მიიჩნევა, განსაკუთრებით, იმ კომპანიებისთვის, რომლებსაც ბევრი არაკვალიფიციური თანამშრომელი ჰყავთ, მაგრამ ამავე დროს მათთვის ხელფასების ზრდის შესაძლებლობა არ გააჩნიათ ( Walmart, Tyson Foods და ა.შ.).
ორივე კანდიდატი ინფრასტრუქტრული ხარჯების ზრდას აპირებს, რაც სრულიად ბუნებრივია კრიზისის დროს, მაგრამ ბაიდენი ამერიკის მოტრიალებას „მწვანე ეკონომიკისკენ“ გეგმავს - მას ამერიკის „ნახშირწყალბად-ნეიტრალურ“ქვეყანად გადაქცევა 2050 წლისთვის სურს. შესაბამისად, მისი არჩევა პრეზიდენტად დადებითი სიგნალი იქნება ისეთი ეკოლოგიაზე ორიენტირებულ კომპანიებისთვის, როგორც Tesla, First Solar, NextEra Energy.
ამავე დროს ტრამპსაც და ბაიდენსაც მაღალტექნოლოგიურ სექტორში ინვესტირების აუცილებლობა ესმით, რაც კარგია, მაგალითად, სატელეკომუნიკაციო სექტორის კომპანიებისთვის, რომლებიც ფართოზოლიანი ინტერნეტის დარგში მუშაობენ - ისეთებისთვის, როგორც Charter Communications.
ორ პოლუსს შორის უთანხმოების კიდევ ერთი საგანია საგარეო პოლიტიკა - კონფრონტაცია თუ კოოპერაცია?
ამ საკითხშიც ბაიდენი ტრამპის ანტიპოდია - ის კომპრომისებისთვის აშკარად მზადაა, ჩინეთთან და ირანთან ურთიერთობების დალაგებას აპირებს, თუმცა, გაცილებით უფრო ხისტია რუსეთთან მიმართებაში.
ტრამპს და ბაიდენს საწინაამღდეგო პოზიციები ბევრ მნიშვნელოვან საკითხში აქვთ - მონეტარული პოლიტიკით დაწყებული ჯანდაცვის რეფორმით დამთავრებული.
ინვესტორებიც ორ ბანაკად გაიყვნენ. ბაზარზე უკვე არის ფასიანი ქაღალდები, რომლებიც კონკრეტული კანდიდატის გამარჯვებაზეა მორგებული. ეს პროდუქტები იმ კომპანიების აქციებს ეყრდნობა, რომლებიც სავარაუდოდ ერთი ან მეორე კანდიდატის გამარჯვების ბენეფიციარები გახდებიან.
ასევე არის უნივერსალური გადაწყვეტილებები, რომლებიც ინვესტორებს პოლიტიკური რისკებისგან დაიცავენ - აქ საბაზოა მაღალტექნოლოგიური კომპანიების აქციები, რომლებიც გაიზრდება ორივე კანდიდატის გამარჯვების შემთხვევაში.
forbes.ru
მოამზადა თენგიზ აბლოთიამ