იმ დღეს, როდესაც ონლაინ-რითეილერმა Pinduoduo-მ განაცხადა, რომ აქტიურ მომხმარებელთა რაოდენობით ისეთ გიგანტებს, როგორც Alibaba და Amazon გაუსწრო, კომპანიის დამაარსებელმა კოლინ ჩჯენ ხუანმა გენერალური დირექტორის თანამდებობა დატოვა.
რამ აიძულა ამ ნაბიჯის გადადგმა მეწარმეს, რომლის ქონებაც 50 მლრდ. დოლარია, თანაც - წარმატების მწვერვალის მიღწევის დღეს?
საკადრო კომპანია Challenger, Gray & Christmas-ს ინფორმაციით, 2020 წელს 1314 გენერალური დირექტორი გადადგა, რაც 2019 წელთან შედარებით 20%-ით ნაკლებია. მაჩვენებლის შემცირება პანდემიას უკავშირდება - კრიტიკულ პერიოდებში ხელმძღვანელობის შეცლა არასასურველად ითვლება.
2021 წლის პირველ 2 თვეში უკვე 195 გენერალური დირექტორი გადადგა, და მათ შორის - წარმატებული კომპანიების შემქნელებიც იყვნენ. საკონსულტაციო კომპანია Korn Ferry-ის ანალიტიკოსის ჯეინ სტივენსონის თქმით, ამის მიზეზიც ძირითადად პანდემიაა.
„კრიზისების დროს ადამიანები მეტად ფიქრობენ რა აკეთონ. ხშირად, მათ სხვა ინტერესები აქვთ, რომლებისთვისაც მათ მეტი ყურადღების დათმობა სურთ. ხშირად შეხვედრია გენერალური დირექტორები და სამეურვეო საბჭოების წევრები, რომლებსაც ჩემთვის უთქვამთ - ცხოვრება მოკლეა, და ეს უკვე მეტის მეტია, დავიღალე და მივდივარ“ - ამბობს ექსპერტი.
ამ ტრენდს ბოლო დროის ყველაზე ხმაურიანი გადადგომა ადასტურებს - მილიარდერი ჯეფ ბეზოსი ტოვებს კომპანია Amazon -ს, რომელიც მან 1991 წელს ქალაქ სიეტლში, საკუთარ ფარეხში შექმნა.
„როდესაც თქვენ ასეთი პასუხისმგებლობა გაკისრიათ, ძნელია ყურადღება კიდევ რამე სხვას დაუთმო“ - ნათქვამია ბეზოსის მიმართვაში თანამშრომლებისადმი.
მისი თქმით, გამოთავისუფლებულ დროს ის საქველმოქმედო ფონდებს Day One და Bezos Earth Fund-ს, თავის აეროკოსმოსურ კომპანია Blue Origin-ს და გაზეთ The Washington Post-ს დაუთმობს.
ბეზოსის გადაწყვეტილება საქმიანი სამყაროსთვის მოულოდნელი აღმოჩნდა, თუმცა, სინამდვილეში გასაკვირი არაფერია - ბეზოსი კომპანიას 27 წელი მართავდა, და ეს ძალიან ბევრია. Korn Ferry-ის მონაცემებით, საშუალოდ გენერალური დირექტორები ამ პოსტზე 7 წლის მანძილზე მუშაობენ.
„სადღეისოდ თითქმის ვერ შეხვდებით გენერალურ დირექტორს, რომელმაც 10 წელზე მეტი იმუშავა. ყველაზე მეტად ხელმძღვანელის პოსტის დატოვება კომპანიების შემქნელებს უჭირთ, რადგანაც ისინი მათ მიერ დაარსებული კომპანიებთან საკუთარ იდენტობას უკავშირებენ. თუმცა, საბოლოოდ, ისინიც მიდიან“ - ამბობს სტივენსონი.
ამ ტენდენციის კიდევ ერთი დადასტურებაა საიუველირო კომპანია Kendra Scott-ს დირექტორი კენდრა სკოტი, რომელმაც კომპანია 20 წლის წინ შექმნა, და 2020 წელს გენ დირექტორის პოსტი დატოვა.
იგი შედარებით ნაკლებად დატვირთულ პოსტზე გადავიდა - ეს აღმასრულებელი დირექტორია, და მისი საქმიანობა ძირითადად დიზაინთან და ქველმოქმედებასთანაა დაკავშირებული.
სტივენსონის თქმით, როგორც წესი ახალ გენერალურ დირექტორებს კომპანიის ტოპ-მეჯენერებს შორის ირჩევენ.
„მნიშვნელოვანია, რომ გენ დირექტორის პოსტი, განსაკუთრებით კრიზისულ პერიოდებში, ქმედითუნარიანმა და ძლიერმა ლიდერმა დაიკავოს. კვლევები გვიჩვენებენ, რომ ამისთვის უკეთესია დირექტორის შერჩევა კომპანიის შიგნით - ამ შემთხვევაში თქვენ იღებთ ადამიანს, რომელიც კორპორაციულ კულტურას იცნობს, და საქმეებში აქტიურადაა ჩართული - მიიჩნევს ანალიტიკოსი.
თუმცა, როგორც წესი, კომპანიების დამფუძნებლები შორს არ მიდიან და როგორც წესი დირექტორთა საბჭოს თავჯდომარის ან სამეურვეო საბჭოში წევრის პოსტზე გადადიან.
„მათთვის კომპანიიდან საბოლოოდ წასვლა ძალიან რთულია, ისინი საკუთარ ბიზნესში ნაკლები დატვირთვის მქონე პოზიციებზე რჩებიან“ - ამბობს სტივენსონი.
forbes.ru
თენგიზ აბლოთია