15 აგვისტოს ამერიკის უმსხვილესმა სავაჭრო ქსელმა Walmart-მა განაცხადა, რომ კრიპტოვალუტების სპეციალისტს ეძებს - ვაკანსიის აღწერის მიხედვით, მას კომპანიისთვის ციფრული ვალუტის სტრატეგიის დამუშავება და ვირტუალურ ვალუტასთან დაკავშირებით პარტნიორობის დამყარება ევალება.
მანამდე კრიპტოვალუტის და ბლოკჩეინის სპეციალისტის ვაკანსია Amazon-მა გამოაცხადა. კომპანიის ინფორმაციით, საუბარი არ მიდის მხოლოდ არსებული ვირტუალური ფულის ანგარიშსწორებისთვის გამოყენებაზე - 2022 წელს ონლაინ-რითეილერი საკუთარი კრიპტოვალუტის შექმნას აპირებს.
2021 წლის ბოლოს Amazon დაიწყებს ანგარიშსწორებას 8 კრიპტოვალუტით - პირველ რიგში, რა თქმა უნდა, ბიტკოინით, ასევე განიხილება Ethereum, Cardano, Bitcoin Cash, და ა.შ.
მენეჯერს ციფრული ვალუტის საკითხებში ეძებს ასევე ბრიტანული Lloyds Banking Group, რომელიც, როგორც განცხადებაშია ნათქვამი, ბანკის ახალ პროექტებზე იმუშავებს.
ივნისის ბოლოს მსგავსი ვაკანსია გამოაქვეყნა Apple-მაც. სპეციალისტისადმი მოთხოვნებს შორისაა ციფრულ საფულეებთან მუშაობის 5-წლიანი გამოცდილება, ასევე სწრაფი გზავნილების და კრიპტოვალუტების ტექნოლოგიების ფლობა.
ბევრი მსხვილი ტრანსნაციონალური კორპორაცია კრიპტოვალუტას საგადახდო საშუალებად უკვე იყენებს - მაგალითად, ქსელი Starbucks და სამშენებლო მასალების მაღაზიების ამერიკული ქსელი Home Depot.
ბიტკოინებს გადახდის საშუალებად გარკვეული დროის მანძილზე ასევე Tesla იღებდა, თუმცა, მოგვიანებით ილონს მასკმა კრიპტოვალუტებზე უარი განაცხადა მათ მოპოვებაზე დახარჯული ელექტროენერგიის დიდი რაოდენობის გამო.
CoinMarketCap.com-ის ინფორმაციით, სადღეისოდ მსოფლიოში 6000 კრიპტოვალუტა მოქმედებს, და ბაზრის სრული კაპიტალიზაცია $1,8 ტრლნ–ს შეადგენს. ყველაზე პოპულარული ციფრული ვალუტა ბიტკოინია - სწორედ მასზე მოდის ბაზრის 46%, მეორე ადგილზეა Ethereum (20%).
თუმცა, დღეს პროცესები სულ სხვა მიმართულებით მიდის - მსხვილი კორპორაციები არა მხოლოდ არსებულ ვირტუალურ ფულთან მუშაობენ, არამედ საკუთარი კრიპტოვალუტების შექმნას გეგმავენ.
პირველმა ეს Facebook-მა ჯერ კიდეც 2019 წელს სცადა, თუმცა მცდელობა წარუმატებელი აღმოჩნდა - რეგულატორებმა სოციალურ ქსელს საკუთარი კრიპტოვალუტის განვითარების შესაძლებლობა არ მისცეს. თუმცა, სიტუაცია პანდემიამ შეცვალა - ონლაინ-გადაწყვეტილებები სულ უფრო პოპულარული ხდება და ამგვარი ინიციატივების დაბლოკვა უკვე სულ უფრო და უფრო რთულდება.
საქმე იქით მიდის, რომ ტრანსნაციონალური კორპორაციები სახელმწიფოებისგან დამოუკიდებლობის მოპოვებას შეეცდებიან, მათ შორის მათი ვალუტებისგან - მართლაც, რატომ უნდა მიიღოს Amazon-მა მომსახურების საფასური სხვადასხვა ვალუტებში მაშინ, როდესაც შეუძლია შექმნას Amazon Coin და ეს პრობლემა სამუდამოდ გადაწყვიტოს?
რაც მთავარია, ეს სრულიად უსაფრთხო და წაუგებელი ექსპერიმენტია - მეგა-კორპორაციები ამით არაფერს კარგავენ - თუ მცდელობები წარმატებული აღმოჩნდა, ისინი ფინანსურ დამოუკიდებლობას მიიღებენ და სახელმწიფოებისგან მაქსიმალურად დისტანცირდებიან.
თუ არა, ბოლოს და ბოლოს, დაკარგავენ რამდენიმე ათეულ მილიონ დოლარს, რაც მათი ფინანსური მდგომარეობის ფონზე დიდ დანაკარგად ვერანაირად ვერ ჩაითვლება.
forbes