ექსპერტებმა უკვე წლებია ვერ გაიგეს რა არის Tesla - ავტოკონცერნი, თუ IT-კომპანია? ბოლო პერიოდში ასევე ხშირად ერთმანეთთან ორ რევოლუციონერ ბიზნესმენს - ილონ მასკს და სტივ ჯობსს ადარებენ.

მართლად, რა საერთო აქვთ და რითი განსხვავდებიან ეს კომპანიების და ეს გამოჩენილი პიროვნებები?

როდესაც 2011 წელს სტივ ჯობსი გარდაიცვალა, ილონ მასკი თავისი პირველი ელექტრომობილის გამოშვებისთვის ემზადებოდა. ამან მასკს ამერიკული ბიზნესის მთავარი ფუტურისტის სტატუსი მიანიჭა.

მისი მიზანია, მთლიანად დენზე მომუშავე ავტომობილი, რომელიც კაცობრიობას გლობალური დათბობისგან იხსნის. ეს მიზანი ერთგვარი რევოლუცია გახდა, ისეთივე, როგორიც 80-ან წლებში Apple-ის მიერ პირველი პერსონალური კომპიუტერის შექმნა.

ასე Tesla შემდეგი Apple გახდა.

„ინვესტორები Tesla-ს ისევე უყურებენ, როგორც 20 წლის წინ Apple-ს უყურებენ ანუ, როგორც კომპანიას, რომელიც განსხვავებულად აზროვნებს და წარმოუდგენელ ინოვაციებს ნერგავს“, - მიიჩნევს Morgan Stanley-ს ანალიტიკოსი კეტ ჰიუბერტი.

2020 წელს Reuters-მა ინფორმაცია გაავრცელა, რომ Apple 2024 წლისთვის ელექტრომობილების მასობრივი წარმოების დაწყებას გეგმავს. ამ ცნობას თავად მასკი ტვიტერში გამოეხმაურა.

„Model 3-ზე მუშაობის ყველაზე მძიმე პერიოდში მეტ იმ კუკს დღევანდელი ღირებულების 10%-თან Tesla-ს ყიდვა შევთავაზე. მან შეხვედრაზე უარი განაცხადა“, - დაწერა მასკმა.

რადგანაც დღეს Tesla-ს ღირებულება 600 მლრდ. დოლარს შეადგენს, გამოდის რომ მასკმა Apple-ს თავისი კომპანია 60 მლრდ. დოლარად შესთავაზა. Apple-მა ამ საკითხზე არანაირი კომენტარი არ გააკეთა.

Tesla-ს და Apple-ის მთავარი მსგავსება ისაა, რომმათი გაყიდვების მთავარი საწინდარია კლიენტების ერთგულება და ფანატიზმი. IPhone და Tesla — ეს უბრალოდ ტელეფონი და ავტომობილი არაა. ეს გარკვეული ცხოვრების წესის და აზროვნების მაჩვენებელია. ორივე კომპანიამ ერთ დროს მცირე, პრემიუმ-სეგმენტი დაიკავა და კონკურენტები სრულად განდევნა.

მასკი, ისევე, როგორ ჯობსი, ძალიან ბევრ დროს მუშაობას უთმობს და ცალკეულ ელემენტებს და დეტალებს დიდ ყურადღებას აქცევს. ესეც საერთოა ორივესთვის. ცნობილია რამდენიმე შემთხვევა, როდესაც სტივ ჯობსმა ახალი პროდუქტების პრეზენტაციები თითქმის ჩაშალა იმიტომ, რომ ბოლო მომენტში რაღაცის შეცვლა დააპირა.

ასევე მასკმა უკვე წარმოებული ავტომობილების დიდი პარტიისთვის უმნიშვნელო დეტალის, სალონში მზისგან დამცავი აბრის შეცვლა მოისურვა. ერთი საკმაოდ მნიშვნელოვანი მომენტიც, ხვალ ილონ მასკს რამე რომ შეემთხვეს, ან ის Tesla-დან წავიდეს, რა ბედი ელის მის კომპანიას?

ცნობილია, რომ 1985 წელს, როდესაც სტივ ჯობსი Apple-დან წავიდა, კომპანიამ უკუსვლა დაიწყო, ძლიერი და ქარიზმატული წინასწარმეტყველის შემცვლელი ვერ მოიძებნა და ჯობსის წასვლამ ვაკუუმი შექმნა.

თუმცა, ამავე დროს Tesla-ს ერთი დიდი სხვაობა და ამავე დროს, უპირატესობაც აქვს. მასკის თქმით, მწარმოებლის პროგრესს მიმწოდებლების მუშაობის ნელი ტემპი აფეხებს, ამიტომაც მისი კომპანია ყველაფერის წარმოებას თავად ცდილობს. პროგრამული უზრუნველყოფით დაწყებული უკანა ხედის სარკეებით დამთავრებული.

და ეს მაშინ, როდესაც Apple ფაქტიურად დიზაინერული და მარკეტინგული კომპანიაა, რომელიც თავად არაფერს, ინტელექტუალური საკუთრების გარდა, არ აწარმოებს - Apple-ის ბრენდის ქვეშ გამოსულ პროდუქციას მისი პარტნიორები აზიის ქვეყნებში აწარმოებენ.

ილონ მასკმა ერთხელ განაცხადა, რომ Tesla, რომელიც დღეს Apple-ზე 2,5-ჯერ ნაკლები ღირს, 2025 წლისთვის მას კაპიტალიზაციით გაუსწრებს.

4 წლის შემდეგ გაირკვევა, რამდენად რეალისტური იყო მასკის პროგნოზი.

forbes.ru

მოამზადა თენგიზ აბლოთიამ