რუსეთი ბელორუსიას სახელმწიფო სესხის სახით 1,5 მლრდ. დოლარს გამოუყოფს - განაცხადა ვლადიმერ პუტინმა ალექსანდრ ლუკაშენკოსთან შეხვედრის შემდეგ, რომელიც 14 სექტემბერს სოჭში შედგა.
„ჩვენ შევთანხმდით, რომ რუსეთი ამ მძიმე პერიოდში ბელორუსიას 1,5 მლრდ, დოლარის ოდენობის სესხს გამოუყოფს და ჩვენ ამ დაპირებას შევასრულებთ. ამ ეტაპზე ჩვენი ქვეყნების ფინანსთა მინისტრები ამ საკითხთან დაკავშირებით ტექნიკურ დეტალებს განიხილავენ“ - აღნიშნა რუსეთის პრეზიდენტმა.
მისი თქმით, მას ბელორუსიის ეკონომიკური კრიზისიდან გამოყვანასთან დაკავშირებით რამდენიმე იდეას აქვს. ბელორუსიის პრეზიდენტმა თავის მხრივ აღნიშნა:
„ბოლო მოვლენებმა დაგვანახა, რომ უფროს ძმასთან უფრო მჭიდრო ურთიერთობები უნდა გვქონდეს, მათ შორის ეკონომიკურ საკითხებში“ - განაცხადა მან.
ლუკაშენკომ ასევე პუტინს მადლობა იმის გამო გადაუხადა, რომ ბელორუსია ერთ-ერთი პირველი ქვეყანა იქნება, რომელიც კორონავირუსის წინაამღდეგ რუსულ ვაქცინას მიიღებს.
„ჩვენ ვხედავთ ევროპაში რა ხდება - უკვე ცალსახაა, რომ ახალი ძლიერი მეორე ტალღა დაიწყო და ვშიშობ, ის პირველზე ძლიერი იქნებ. არაა გამორიცხული რომ კორონავირუსი დაემატება გრიპის ვირუსს და შედეგების უფრო მძიმე იქნება“ - განაცხადა მან.
პუტინი ბელორუსიაში მიმდინარე მოვლენებსაც შეეხო. მისი თქმით, ბელორუსები თავად, ყოველგვარი გარე ჩარევის გარეშე, ერთმანეთთან დიალოგის რეჟიმში, შექმნილ სიტუაციაში უნდა გაერკვნენ.
მან ასევე „დროული“ და „ლოგიკური“ უწოდა ლუკაშენკოს გეგმას ქვეყნის კონსტიტუციის განახლებასთან დაკავშირებით - როგორც ცნობილია, რამდენიმე დღით ადრე ბელორუსიის პრეზიდენტმა განაცხადა, რომ მის მიერ პრეზიდენტის უფლებამოსილების დათმობის ერთ-ერთი წინაპირობა კონსტიტუციური რეფორმაა.
სოჭში შემდგარი შეხვედრა პირველი იყო 9 აგვისტოს ბელორუსიაში ჩატარებული საპრეზიდენტო არჩევნების და მათ შემდეგ დაწყებული საპროტესტო მოძრაობის დაწყების შემდეგ.
ლუკაშენკომ ჯერ კიდევ სექტემბრის დასაწყისში განაცხადა, რომ ეს შეხვედრა ორ ქვეყანას შორის ურთიერთობებში არსებულ ყველა მწვავე კითხვას პასუხს გასცემს.
კერძოდ, მან განაცხადა, რომ რუსეთი ბელორუსიისთვის 1 მლრდ. დოლარის ოდენობის ვალის რესტრუქტურიზაციას და ასევე 600 მლნ. დოლარის ახალი სესხის გაცემაზე დათანხმდა.
გარდა ამისა თავად პუტინმა ბელორუსიაში ძალისმიერი ჩარევა არ გამორიცხა იმ შემთვევაში, თუ მიტინგები ქვეყანაში სრულმასშტაბიან ანტიკონსტიტუციურ არეულობაში გადაიზრდება, სპეციალურად ამისთვის ე.წ. „პოლიციური რეზერვი“ შექმნა.
ოპოზიციის საპრეზიდენტო კანდიდატმა სვეტალანა ტიხანოვსკაიამ რუსეთის პრეზიდენტს ლუკაშენკოსთან დიალოგის წარმოაებისგან თავის შეკავება ურჩია.
„ჩვენ ვწუხვართ, რომ თქვენ დიალოგის წარმოება უზურპატორთან და არა ბელორუს ხალხთან გადაწყვიტეთ. ნებისმიერი შეთანხმებები ორ ლიდერს შორის არაკანონიერია და ლუკაშენკოს გადადგომის შემდეგ ძალას დაკარგავენ, რადგანაც ბელორუსმა ხალხმა მას ნდობაზე უარი უთხარა“ - განაცხადა ტიხანოვსკაიამ.
Bloomberg კრემლთან დაახლოებულ წრეებზე დაყრდნობით წერს, რომ პუტინი დარწმუნებულია იმაში, რომ პროტესტების მიუხედავად, ლუკაშენკო თავის პოსტს შეინარჩუნებს.
სააგენტოს წყაროს თანახმად, კრემლში ბელორუსული პროტესტების მასშტაბებით გაოგნებულები იყვნენ. მოსკოვი ლუკაშენკოს არ ენდობა, თუმცა მისთვის ოპოზიციის ხელისუფლებაში რევოლუციური გზით მოსვლა სრულიად მიუღებელია, ამიტომაც მოსკოვი ყველა შემთხვევაში ლუკაშენკოს დაეხმარება.
1,5 მლრდ-იანი სესხი - ამ დახმარების მხოლოდ ერთი ნაწილია.