ხორცის უმსხვილესმა მწარმოებელმა მსოფლიოში, ბრაზილიურმა JBS-მ შტატებში თავისი ქარხნების მუშაობა დროებით, კიბერშეტევის გამო შეაჩერა. სავარაუდოდ, ჰაკერები ამჯერადაც რუსეთიდან არიან - ამის შესახებ თეთრი სახლის პრეს-სპიკერის მოადგილემ კარინ ჟან-პიერმა განაცხადა.
„თეთრი სახლი ამ საკითხზე რუსეთის მთავრობასთან კონტაქტირებს და იმედოვნებს, რომ პასუხისმგებლიანი ქვეყნები გამომძალველ- დამნაშავეებს არ მფარველობს“, - განაცხადა მან.
თავად კომპანიაში კომენტარისგან თავი შეიკავეს, თუმცა, აშშ-ში JBS-ს აღმასრულებელი დირექტორის ანდრე ნოგეირას თქმით, სისტემების აღდგენის პროცესი წარმატებით მიმდინარეობს და ქარხნები უახლოეს დღეებში მუშაობასაც განაახლებენ.
კომპანიის ცნობით, ჰაკერებმა მყიდველების შესახებ ინფორმაციას ვერ დაეუფლნენ, შესაბამისად, მათ მონაცემებს არავითარი საფრთხე არ ემუქრება. გარდა ამის, ცნობილი გახდა, რომ თავდასხმა კომპანიის აქტივებს ავსტრალიაში და კანადაში შეეხო.
ამ დროისთვის JBS-მა ამერიკის 6 შტატში მდებარე საწარმოები გააჩერა, მუშაობას მხოლოდ ტექნიკური პერსონალი აგრძელებს, რომელიც აღჭურვილობის მომსახურეობითაა დაკავებული.
ხორცის ბაზრის ანალიტიკოსების თქმით, ქარხნების დროებითმა დახურვამ შტატებში შესაძლოა ხორცის გაძვირება გამოიწვიოს. წლის მანძილზე ეს უკვე მეორე გაძვირება იქნება. პირველი კი დაკავშირებულია მაღალ მოთხოვნასთან და მუშახელის დეფიციტთან.
„საწარმოების თუნდაც ერთი დღით გაჩერება საქონლის ხორცის საბითუმო ფასებზე მნიშვნელოვნად აისახება, ეს რამდენიმე დღე გაგრძელდება“ - აღნიშნავენ ხორცის ბაზრის კვლევებზე მომუშავე კომპანია Steiner Consulting Group-ის ანალიტიკოსები.
აშშ-ს სოფლის მეურნეობის სამინისტრო სხვა ხორცგადამამუშავებელ კომპანიებს წარმოების ზრდას სთხოვს და ასევე საკუთარი სისტემების დაცვისთვის მეტი ყურადღების მიქცევას ურჩებს.
JBS ამერიკის საქონლის ხორცის მეოთხედს და ღორის ხორცის მეხუთედს ამუშავებს. კორონავირუსის პანდემიის დროს კომპანიის ათობით ათასი თანამშრომელი დაინფიცირდა, რამაც ქარხნების დახურვა გამოიწვია. მაშინ კომპანიამ ასობით მილიონი დოლარი ხელფასების მომატებაზე და ეპიდემიოლოგიური უსაფრთხოების ნორმების შესრულებაზე დახარჯა.
ბოლო 2 თვის მანძილზე ეს ბიზნესზე ჰაკერული შეტევის პირველი შემთხვევა არაა, მაისში კიბერ-თავდასხმის მსხვერპლი შტატებში ერთ-ერთი უმსხვილესი ნავთობსადენის მმართველი კომპანია Colonial Pipeline გახდა. შედეგად ამერიკის აღმოსავლეთ სანაპიროს 18 შტატში საწვავის ფასებმა 6-წლიან მაქსიმუმს მიაღწია.
გავრცელებული ინფორმაციით კიბერ-შეტევა რუსულმა ჯგუფმა Dark side-მა მოაწყო და საბოლოო ჯამში კომპანიას გამოსასყიდის სახით 5 მლნ. დოლარის გადახდა მოუწია.
forbes.ru
თენგიზ აბლოთია