ბრიტანული ჟურნალის The Economist-ის გათვლებით, ევროპის მდიდარი ქვეყნების უმეტესობაში ეპიდემიის პიკმა უკვე ჩაიარა, და ისინი გამოჯანმრთელების გზას დაადგნენ.თუმცა, ბევრ სხვა ადგილას, მაგალითად, რუსეთში, დაავადებულთა რაოდენობის ზრდის პროცესი გრძელდება.

როგორც ცნობილია, კორონავირუსის გავრცელების გამო მსოფლიოს ქვეყანათა უდიდესმა ნაწილმა ჯერ კიდევ მარტში საგანგებო ზომების მიღება დაიწყო. ოქსფორდის უნივერსიტეტთან არსებული მართვის სკოლის გათვლებით, მარტ-აპრილში, მსოფლიოს 92 ქვეყანაში 3,9 მლრდ. ადამიანი იზოლაციაში იმყოფებოდა.თუმცა, უკვე აპრილის ბოლოს ქვეყნებმა შეზღუდვების მოხსნა დაიწყეს.

მაგალითად, წინა კვირას ჩეხეთმა საზღვრებიც გახსნა და თავისი მოქალაქეებისთვის გადაადგილების ყოველგვარი შეზღუდვებიც მოხსნა.

ესპანეთში ქარხნების ნაწილმა და სამშენებლო კომპანიებმა მუშაობა განაახლეს, 4 მაისიდან კარანტინის პირობებს იტალიაც გადახედავს.კერძოდ, ზაფხულის დასაწყისისთვის მუშაობას ბარები, რესტორნები, სილამაზის სალონები, მაღაზიები და მუზეუმები განაახლებენ.

თუმცა, პრობლემა იმაშია, რომ ბოლომდე არაა გასაგები, რეალობაში ვირუსის გავრცელების ინტენსიურობა რამდენად შემცირდა. ჯანდაცვის საერთაშორისო ორგანიზაციის მონაცემები ნაკლებად სანდოა, რადგანაც ტესტირების მასშტაბები სხვადასხვა ქვეყნებში ერთმანეთისგან მკვეთრად განსხვავდება.

თუმცა, ამ მონაცემებით შესაძლებელია ზოგადი ტრენდის დაფიქსირება. მნიშვნელოვანია ინფექციის გავრცელების გრაფიკი და როგორც ჩანს, ბევრ ქვეყანაში ყველაზე ცუდი პერიოდი უკანაა.

The Economist-ის მიერ შედგენილი ცხრილი არაა იდეალური, თუმცა, ბოლომდე სანდო და ობიექტური მონაცემების დეფიციტის პირობებში, ის დიდ საზოგადოებრივ ინტერესს იწვევს.

გათვლა ეფუძნება კორონავირუსის დღე-ღამეში ახალი დაინფიცირებულების რაოდენობის მოსახლეობის რიცხოვნობასთან შეფარდების დადგენას. ასეთი კორელაცია ქვეყნების ერთმანეთთან შედარების საშუალებას იძლევა.გარდა ამისა, ასევე დღიურ დაინფიცირებასთან ერთად კვირეულიც დგინდება, რაც შექმნილი ვითარების უფრო ფართო სურათს გვაძლევს.

23 აპრილისთვის 1 მლნ. მოსახლეზე ვირუსის ყოველდღიური გავრცელების მხრივ ლიდერებს შორის შტატები (89), ესპანეთი (86), ბრიტანეთი (73), ბელორუსია (72), და შვედეთი (61) აღმოჩნდნენ.ხუთეულიდან 2 ქვეყანამ - შვედეთმა და ბელორუსიამ - ვირუსთან ბრძოლის მკაცრ მეთოდებზე უარი თქვეს, ხოლო ბრიტანეთმა კარანტინი გარდაცვალების ასობით ფაქტის შემდეგ შემოიღო.

თუმცა, გავრცელების ციფრების მიხედვით, ლიდერმა ქვეყნებმა ეპიდემიის პიკი უკვე გაიარეს. იმის მიუხედევად, რომ იქ დაავადებულთა რაოდენობა კვლავაც დიდია, აშკარაა გავრცელების ინტენსიურობის შემცირება.

ზრდის ტენდენცია მხოლოდ ბელორუსიაში და შვედეთში გრძელდება, დანარჩენ ლიდერ-ქვეყნებში პიკმა უკვე ჩაიარა. აქედან გამომდინარე, The Economist -ს კვლევის თანახმად, შტატებში, ესპანეთში, ბრიტანეთში და იტალიაში პანდემიიდან გამოსვლის პროცესი უკვე დაიწყო.ჩინეთში სადღეისოდ დაინფიცირება თითქმის შეწყდა, სხვა ქვეყნებს შორის ყველაზე დაბალი მაჩვენებლები 1 მლნ. მოსახლეზე უკრაინას (10), ირანს (15), გერმანიას (25), საფრანგეთს (26), და რუსეთს (31) აქვთ.

თუმცა, ამავე დროს, ირანში, გერმანიაში, და საფრანგეთში ინფიცირების შემთხვევების შემცირება ფიქსირდება, ხოლო რუსეთში და უკრაინაში ჯერჯერობით ზრდას აქვს ადგილი.მათ ჯერ პიკი არ გაუვლიათ.

წყარო: forbes.ru

მოამზადა თენგიზ აბლოთიამ