ლარი კინგი ინტერვიუს მეფედ დამსახურებულად ითვლებოდა. მისი შეკითხვები მწვავე, მაგრამ არა აგრესიული და არა პროვოკაციული იყო. ის თავის რესპოდენტებთან საერთო ენას მარტივად პოულობდა და საკუთარი ინტელექტის წარმოჩენა არასდროს უცდია.
ის მოსაუბრეებს თითქმის არასდროს აწყვეტინებდა, ვინც არ უნდა ყოფილიყვნენ ისინი - ქვეყნების პრეზიდენტები თუ სპეციალისტი უცხოპლანეტელების საკითხებში.
ლარი კინგი ყოველთვის ამბობდა - ის, ვინც ყოველთვის ლაპარაკობს და არავის უსმენს - არასდროს არაფერს სწავლობს.
საკუთარ საქმეს ლარი კინგი infotainment-ს უწოდებდა - ინფორმაციის და გართობის (entertainment) შერწყმა. ამის გამო მას კოლეგები ხშირად აკრიტიკებდნენ, თუმცა მილიონობით ტელემაყურებელს დიალოგის წარმართვის მისი მანერა ძალიან მოსწონდა.
ლარი კინგი ამერიკაში, ებრაულურ ოჯახში დაიბადა. მამამისი ავსტრიიდან, დედა კი ბელორუსიიდან იყო. მისი ნამდვილი სახელია ლორენს ჰარვი ზეიგერი, და მისი პირველი ეთერი ფლორიდაში შედგა, ერთ-ერთ რადიოსადგურში, სადაც ის დამლაგებლად მუშაობდა.
დიჯეი მოულოდნელად შეუძლოდ გახდა და მისი შეცვლა მომავალ ტელევარსკლავს შესთავაზეს. სწორედ მაშინ გაჩნდა მისი ფსევდონიმი - კინგი, ანუ მეფე.
ამის შემდეგ მისმა კარიერამ სწრაფი ზრდა დაიწყო, 1985 წელს კი მედია-მაგნატმა ტედ ტერნერმა მას CNN-ზე მუშაობა შესთავაზა. მისი პირველი რესპოდენტი ნიუ-იორკის გუბერნატორი მარიო კუომო გახდა, რომლის შვილიც, ენდრიუ კუომო, იგივე პოსტს დღესაც იკავებს.
ამის შემდეგ კინგის შეჩერება შეუძლებელი იყო - ის სტატიებს, წიგნებს, და მემუარებს წერდა, კვირაში 5 დღე ეთერში გადიოდა, მონაწილეობას ათობით ფილმში იღებდა, სადაც საკუთარ თავს თამაშობდა. მის გადაცემაში მოპატიჟებას დიდ პატივად პრეზიდენტები, პრემიერ-მინისტრები, მონარქები და გამოჩენილი საზოგადო მოღვაწეები მიიჩნევდნენ.
თავის კარიერის მანძილზე ის ისეთ ცნობილ ადამიანებს ესაუბრა, როგორც ბილ გეითსი, ლიზ ტეილორი, მარგარეტ ტეტჩერი, ნელსონ მანდელა და მიხაილ გორბაჩოვი. მისი პროგრამის სტუმარი რუსეთის პრეზიდენტი ვლადიმირ პუტინი იყო - წყალქვეშა ნავის „კურსკის“ კატასტროფის შემდეგ 1 თვეში.
მან პრეზიდენტს ჰკითხა - „მითხარით, წყალქვეშა ნავს რა მოუვიდა?“, რაზეც პრეზიდენტმა მოკლედ და ლაკონურად უპასუხა - „ის ჩაიძირა“. ეს გამონათქვამი პუტინის ერთ-ერთ ყველაზე პოპულარულ და ცნობილ ციტატად იქცა.
ლარი კინგი მაყურებლებთან მძიმე პერიოდებშიც - მაგალითად, 11 სექტემბრის ტერაქტის შემდეგ ის 700-ზე მეტ ადამიანს გაესაუბრა - მაშველებს, მეხანძრეებს, პოლიციელებს, დაზარალებულებს, ხელისუფლების წარმომადგენლებს და მსოფლიო ლიდერებს.
2010 წელს, როდესაც ლარი კინგს 77 წელი შეუსრულდა, მისი პროგრამა CNN-ზე საკუთარი სურვილით შეწყვიტა - ტელესივრცე უფრო მწვავე და პოლარიზებული გახდა, მაუწყებლები კი მემარჯვენეებად და მემარცხენეებად გაიყო. ახალ რეალობაში თითიდან გამოწოვილი სკანდალები და ფათოსური გამოსვლები ჭკვიან და ზომიერ საუბრებზე მეტ მაყურებლებს იზიდავდა.
თავად ლარი კინგს თავისი კარიერის მანძილზე არც ერთხელ არ გაუმხელია მისი პოლიტიკური სიმპატიები და დღემდე არავინ იცის, ვინ იყო ის - დემოკრატი, თუ რესპუბლიკელი.
CNN-ზე მისი ბოლო პროგრამა 2010 წლის 16 დეკემბერს გავიდა. მისი ბოლო სტუმარი არნოლდ შვარცნეგერი იყო.
2012 წელს კინგი ტელეეკრანზე დაბრუნდა - შოუ Larry King Now პარალელურად 3 ტელეარხზე გადიოდა - Ora TV, Hulu, და RT America.
მის ცხოვრებაში დიდი ტრაგედიებიც იყო - ლეგენდარულმა ტელეწამყვანმა ორივე შვილი დაკარგა - 65 წლის ენდი კინგი 2020 წელს გულის შეტევით გარდაიცვალა, რამდენიმე კვირის შემდეგ კი კაია კინგი 52 წლის ასაკში ფილტვების კიბოს შეეწირა.
თავად ლარი კინგის გარდაცვალების მიზეზი ოფიციალურად არ გამოცხადდა, თუმცა, ცნობილია, რომ მან ფილტვების და პროსტატის კიბო, ასევე გულის შეტევა გადაიტანა, ავად იყო მეორე ტიპის დიაბეტით და სტენოკარდიით, რამდენიმე წლის წინ თითქმის 2 კვირა კომაში გაატარა.
რამდენიმე კვირის წინ კინგმა კორონავირუსიც გადაიტანა.
Larry King Live გინესის რეკორდების წიგნში მოხვდა, როგორც ყველა ხანგძლივი ტელეშოუ უცვლელი წამყვანით - პროგრამა 25 წელი გაგრძელდა, მის ფარგლებში 50 000-ზე მეტი ინტერვიუ შედგა.
CNN-ს მფლობელმა ტედ ტერნერმა მისი გარდაცვალების შემდეგ განაცხადა, რომ ლარი კინგი არა მხოლოდ მისი ერთ-ერთი უახლოესი პირადი მეგობარი, არამედ მსოფლიოში უდიდესი ტელეწამყვანი იყო. ამ განცხადებს მთელი მსოფლიო ეთანხმება, პოლიტიკური და რელიგიური შეხედულებების განურჩევლად.
Forbes.com
მოამზადა თენგიზ აბლოთიამ