ახალმა ჩინურმა ვირუსმა მწარმოებლების აქციების ღირებულება გააუფასურა. სწორედ აღნიშნულმა ვირუსიმა ჩამოართვა ფრანგული კონცერნის LVMH-ს მფლობელს ბერნარ არნოს მსოფლიოს უმდიდრესი ადამიანის წოდება.
ზოგადად, ფუფუნების საგნები კარგად იყიდება აზიაში, სადაც ბოლო ათწლეულებში ეკონომიკურმა ზრდამ ბევრი ახალგამდიდრებული ადამიანი წარმოშვა, რომლებსაც სწყურიათ მოხმარება - მაშინ როდესაც ევროპაში ლუქს-საქონელი ნაკლებად იყიდება იმის გამო, რომ ევროპაში ცუდ ტონად ითვლება სიმდიდრის დემონსტრირება და ჭარბი მოხმარება.ანალიტიკური კომპანიის Bain&Company-ს ინფორმაციით, პერსონალური ლუქს-საქონლის (ტანსაცმელი, ჩანთები, საათები, და სამკაულები) ბაზარზე ჩინეთის წილმა 2019 წელს 35%-ს მიაღწია, თანაც ამ პროდუქციის დიდი ნაწილის შეძენა მოგზაურობების დროს ხდება.
2019 წელს ლუქს-კლასის გაყიდვები 4%-ით 310 მლნ. დოლარამდე გაიზარდა. თუ ჩავთვლით იაპონიას და სხვა მდიდარ აზიურ ქვეყნებს, სწორედ აზიაზე მოდის ამ ბაზრის 50%-ზე მეტი.დღეს ამ მოთხოვნის დასაკმაყოფილებლად მუშაობს ტანსაცმლის, ფეხსაცმლის და ჩანთების მწარმოებელი ქარხნები ჩინეთში, ბანგლადეშში, ვიეტნამში, კამბოჯაში, და ა.შ.
ამჟამად მილიონობით ჩინელი იმყოფება კარანტინში, ბევრმა ჩინელმა გადაიფიქრა მოგზაურობაში წასვლა, ხოლო ძირითადმა ლუქს-ბრენდებმა მაღაზიები ეპიდემიის ეპიცენტრში დახურეს.პარიზში მოდური მაღაზიების თანამშრომლები აღნიშნავენ გაყიდვების მკვეთრ ვარდნას, ხოლო ჩინურ პლათფორმა WeChat-ზე მომუშავე მოვაჭრეები ფუფუნების საგნების ნაცვლად, დღეს დეზინფექციის საშუალებებს ყიდიან.
ზოგადად, ეპიდემიები და ეკონომიკური კრიზისები პირველ რიგში სწორედ ლუქს-საქონლის ბაზარს აზარალებენ. როგორც ჩანს, ამ აზრს იზიარებენ ინვესტორებიც. ისინი იშორებენ და ყიდიან ამ ტიპის კომპანიების აქციებს, რაც აისახა მათ ღირებულებაზე - ფუფუნების საგნების მწარმოებლების აქციები ამ დროისთვის საშუალოდ 15%-ით გაიაფდა.ეს ხდება მაშინ, როდესაც კორონავირუსის გამოჩენამდე მათი აქციები პირიქით, სწრაფად ძვირდებოდა - LVMH, Kering, Hermes, Moncler-ის კაპიტალიზაციამ მიაღწია ისტორიულ მაქსიმუმს, ხოლო LVMH-ს მფლობელი ბერნარ არნო გახდა ყველაზე მდიდარი ადამიანი მსოფლიოში.
თუმცა, არნოს ბედნიერება სულ რაღაც 3 დღე გაგრძელდა - შემდეგ მოვიდა კორონავირუსი, რომელმაც ყველაფერი შეცვალა.ანალიტიკოსები დღევანდელ სიტუაციას 2003 წელს ადარებენ, როდესაც ასევე ჩინეთში ატიპიურმა პნევმონიამ იფეთქა.
Citi-ს ექსპერტების თქმით, მაშინ ეპიდემიასთან დაკავშირებულ ქვეყნებში ტურიზმი 80%-ით ჩამოიშალა, ხოლო ლუქს-გაყიდვები 10%-ით შემცირდა.თუმცა, შვეიცარიული ბანკის UBS-ის ინფორმაციით, 2003 წელს ფუფუნების საგნების ბაზარი გაცილებით ნაკლებად იყო დამოკიდებული ჩინელებზე. მათზე მოდიოდა გაყიდვების მხოლოდ 10%.
UBS პროგნოზირებს ლუქს-ბაზრის ვარდნას 2020 წლის მხოლოდ პირველ კვარტალში. თუ ამ პერიოდში ვარდნა 20%-ის ფარგლებში იქნება, ეს დარგის წლიურ მოგებას 15%-ით შეამცირებს. თუ კვარტალური გაყიდვები შემცირდება 30%-ით, წლის ბოლოსთვის ლუქს-კორპორაცოიები მოგების 24%-ს დაკარგავენ.
ყველაზე მეტად დაზარალდებიან ძვირადღირებული საათების მწარმოებლები - Swatch და Richemont, რომელთა გაყიდვების 50%, ხოლო შემოსავლის 45% სწორედ ჩინეთზე მოდის. ყველაზე მდგრადები იქნებიან LVMH (ძირითადი ბრენდები Louis Vuitton და Dior), Kering (ბრენდი Gucci) და Hermes - მათი დამოკიდებულება ჩინელ მომხმარებელზე შეადგენს 30-35%-ს.
„გაყიდვების გეოგრაფიის და პროდუქტების დივერსიფიკაციის გამო, LVMH ყველაზე ნაკლებადაა დამოკიდებული ჩინელ მომხმარებლებზე“ - ამბობს Bloomberg Opinion-ის ექსპერტი ანდრეა ფელსტედი.„LVMH-ს ასევე შეუძლია აზიაში ზარალის შემცირება იმ შემთხვევაში, თუ სიტუაცია უარყოფითი სცენარით განვითარდა. ერთი სიტყვით,ისინი გაცილებით უკეთეს მდგომარეობაში არიან, ვიდრე, მაგალითად, Swatch, რომლის ყოველ მეორე საათს ჩინელები ყიდულობენ“ - აღნიშნავს ფელსტედი.
თავად კომპანიები ამ ეტაპზე იმედოვნებენ, რომ ეპიდემია დიდხანს არ გაგრძელდება.ბერნარ არნომ ივარაუდა, რომ ეპიდემია მაქსიმალურ სიმწვავეს მომდევნო 2-3 კვირაში მიაღწევს. სიტუაციის გაუმჯობესება კი მარტის ბოლოდან დაიწყება.
„თუ ეპიდემია გაგრძელდება 2-3 თვე - ეს არც ისე ცუდი იქნება“ - მიიჩნევს LVMH -ს მფლობელი.თუმცა, მისი თქმით, თუ კორონავირუსის ეპიდემია 2 წლით გაჭიანურდა, ეს უკვე სულ სხვა ისტორიაა იქნება.Swatch-ს დირექტორმა ნიკ ჰაიეკმა ასევე განაცხადა, რომ იმ შემთხვევაში, თუ ეპიდემია რამდენიმე თვეში დასრულდება, კომპანია ზარალის ანაზღაურებას წლის დარჩენილ პერიოდში შეძლებს.
Citi-ს ანალიტიკოსები ვარაუდობენ, რომ ახალი ვირუსი გავლენას მოახდენს გაყიდვებზე ძირითადად ჩინეთში.ისინი ასევე მიიჩნევენ, რომ მოსალოდნელ ზარალს ასევე შეამცირებს ინტერნეტ-გაყიდვების გააქტიურება და ხარჯების შემცირება.
თუმცა, Bain&Company-ს ინფორმაციით, ფუფუნების საგნების მხოლოდ 12% იყიდება ინტერნეტით. სავარაუდოდ, უახლოეს პერიოდში ნაკლებად მოსალოდნელია, რომ ჩინელი მომხმარებლები შეცვლიან თავიანთ ჩვევებს.