Facebook, Amazon, Apple, Netflix და Alphabet-ის აქციების ფასის ჩამოშლის შემდეგ ამერიკულ ბაზრებზე სხვა მსხვილი კომპანიების კაპიტალიზაციაც მკვეთრად შემცირდა.
ყველა კომპანიას ამის თავისი მიზეზები გააჩნია, თუმცა ინვესტორები ამაში დიდი სურათის ნაწილს ხედავენ და უახლოეს თვეებში არასტაბილურობას პროგნოზირებენ.
მაღალტექნოლოგიური გიგანტების შემდეგ 2%-ით დაეცა ინდექსი S&P 500, რომელიც 500 უმსხვილესი ამერიკული კომპანიის მაჩვენებლებს ასახავს, გარდა ამისა 1%-ით დაეცა მაღალტექნოლოგიური ინდექსი Nasdaq 100, ხოლო Dow Jones - 2%-ით.
ე.წ. FAANG-მა — Facebook, Amazon, Apple, Netflix и Alphabet — ჯამურად 1 დღის მანძილზე 243 მლრდ. დოლარის კაპიტალიზაცია დაკარგეს.
„ისინი ბაზრის დიდ ნაწილს წარმოადგენენ. S&P 500-ში შემავალი დანარჩენი 495 კომპანიის აქციებით ამ დანაკარგის კომპენსირება რთულია“, - ამბობს Adams Funds-ის ექსპერტი მარკ სტოკლი.
ვარდნის ერთ-ერთი მიზეზია ზედიზედ რამდენიმე ცუდი ამბავი სიაში შემავალი კომპანიებისთვის. წლის დასაწყისში დაფიქსირებული მნიშვნელოვანი ვარდნის შემდეგ, ბოლო კვირები მერყეობით გამოირჩეოდა. და ეს ცუდი ამბები საერთო სურათის მხოლოდ ერთი ნაწილია.
ინვესტორები ხედავენ, რომ ინფლაცია იზრდება, სახელმწიფო ობლიგაციებზე მოთხოვნა კი მატულობს, რაც ახლო მომავალში მაღალტექნოლოგიური კომპანიების აქციებზე მოთხოვნას მნიშვნელოვნად შეამცირებს.
სხვა ტექნოგიგანტებზე მეტად Facebook-ის აქციები გაიაფდა - ვარდნამ 5% შეადგინა, რის შედეგადაც სოციალური ქსელის კაპიტალიზაცია 50 მლრდ. დოლარით შემცირდა. ამას ორი მიზეზი აქვს - ერთია WhatsApp, Instagram და Facebook-ის მუშაობის მრავალსაათიანი და უპრეცედენტო შეფერხება.
მეორე კი - კომპანიის ყოფილი თანამშრომლის ფრენსის ჰაგენის განცხადება Facebook-ის შიდა დოკუმენტაციის გაჟონვის თაობაზე. ასევე ვრცელდება ინფორმაცია, რომ ის კომპანიის წინააღმდეგ კონგრესს ჩვენებებს მისცემს.
სხვა ტექნოგიგანტების ვარდნა შედარებით მოკრძალებული იყო - Alphabet-მა 3%, Amazon-მა 2,85%, Netflix-მა 2,6%, Apple -მა 2,4%, Microsoft -მა 2% დაკარგეს.
ზოგადად წნეხი მაღალტექნოლოგიურ კომპანიებზე განაკვეთების მატებამაც გაზარდა - ინვესტორები მათ ფასიან ქაღალდებს ყიდიან, მაგრამ ვარდნა იმდენად ძლიერია არაა რომ კომპანიებისთვის კრახით დასრულდეს - მიიჩნევს Dakota Wealth-ის მენეჯერი რობერტ პავლიკი.
Deutsche Bank-ის ანალიტიკოსის ჯიმ რაიდის აზრით, ინვესტორებს ბევრი საკითხი აწუხებთ.
„დღეს ევროპაში და ამერიკაში ენერგოკრიზისია, მიწოდების ჯაჭვში შეფერხება, სუსტი ზრდის ნიშნები და ბევრი საუბრები სტაგფლაციის თაობაზე“, - ამბობს ის.
პოსტპანდემიური ზრდა, როგორც ჩანს შენელდა - ფასები იზრდება, ენერგოკრიზისი ღრმავდება, ოპტიმიზმი კლებულობს. ინვესტორების გამწყობებზე ნეგატიურად აისახება ასევე ინფორმაცია ამერიკის სახელმწიფო ვალის ლიმიტის გაზრდის თაობაზეც. შედეგად, ბაზრები მერყეობამ მოიცვა და ინვესტორების პროგნოზით არასტაბილურობა მომდევნო თვეებში კიდევ უფრო გაიზრდება.