ევროკავშირის სხვა სავაჭრო პარტნიორებთან შედარებით „ნახშირბადის გადასახადისგან“ ყველაზე მეტად რუსეთი დაზარალდება, მიაჩნიათ ევროპული ანალიტიკური ცენტრების Sandbag და E3G-ის ექსპერტებს.
მათი გათვლებით, 2026 წლისთვის რუსულ საქონელზე საგადასახადო ტვირთი წელიწადში 442 მლნ, ხოლო 2035-სთვის - 1,9 მლრდ ევრომდე გაიზრდება.
ყველაზე მეტად ეს რკინას, ფოლადს და სასუქებს შეეხება. ევროკავშირის პარტნიორებს მიერ გადასახადის გადახდა ნაწილობრივ ევროპული მექანიზმის ხარჯზე მოხდება, თუმცა, ეს გაზრდილი გადასახადებისგან მიღებულ ზარალს ვერ აანაზღაურებს - 2026 წელს თანხა 313 მლნ, ხოლო 2035-ში 602 მლნ ევრო იქნება.
ეს უმნიშვნელო შეღავათია, თუ გავითვალისწინებთ, რომ ანალიტიკური ცენტრების დასკვნით, 2019 წელს რუსულმა ექსპორტმა 91,4 მლრდ ევრო შეადგინა. თუმცა, თავად რუსეთის ეკონომიკის სამინისტრო გაცილებით უფრო დიდ თანხას ასახელებს - 159.7 მლრდ ევრო.
ყველაზე ნაკლებად ეკოლოგიური გადასახადი ამერიკულ საქონელს შეეხება - 2026 წელს ეს მაჩვენებელი მხოლოდ 17 მლნ ევრო იქნება.
სამხრეთ კორეას ევროკავშირში თავისი საქონლის შეტანისთვის 96 მლნ ევროს გადახდა მოუწევს, ჩინეთს - 174 მლნ, თურქეთს – 206 მლნ, ხოლო უკრაინას - 353 მლნ ევრო.
2026 წელს რუსეთის და უკრაინის ეკონომიკებზე ნახშირბადის გადასახადის გავლენა თითქმის ერთნაირი იქნება - 313 და 307 მლნ ევრო შესაბამისად.
ახალი გადასახადი ევროკავშირში იმპორტირებული საქონლის მხოლოდ 3,2% შეეხება - საუბარია ისეთ პროდუქციაზე, როგორც რკინა, ფოლადი, სასუქები, ალუმინი, ცემენტი, და ელექტროენერგია. თუმცა, სწორედ ამ პროდუქციაზე ნაწილდება ევროპაში მოქმედი ნახშირბადის უფასო კვოტების 47%.
ევროკავშირი ამ კვოტებზე უარის თქმას და მათზე გადასახადის დაწესებას გეგმავს, რაც ფასების ზრდას აუცილებლად გამოიწვევს. ასე რომ, გადასახადის სიმძიმე პირველ რიგში ევროპელ მომხმარებლებს დააწვება - სწორედ მათ მოუწევთ გაძვირებული პროდუქციის ახალ ფასებში შეძენა.
ნახშირბადის გადასახადი მსოფლიოში პირველი მსგავსი პრეცედენტი იქნება. ივლისში გეგმა ევროკომისიამ წარადგინა და ის 2030 წლისთვის ევროკავშირში სასათბურე გაზების 1990 წელთან შედარებით 55%-ით შემცირებას გულისხმობს.
2050 წლისთვის ევროპა იქნება დედამიწის პირველი რეგიონი, რომელიც „კლიმატურ ნეიტრალურობას“ მიაღწევს - ეს ნიშნავს, რომ ატმოსფეროში გამოიყოფა ზუსტად იმდენი მავნე ნივთიერებები, რამდენის გადამუშავება და გაუვნებელყოფა ბუნებას ადამიანის დახმარების გარეშე შეუძლია.
ნახშირბადის გადასახადი ამ პაკეტში შემოთავაზებული მხოლოდ ერთ-ერთი, მაგრამ არა ერთად-ერთი ზომაა.
რუსეთი ეკონომიკის სამინისტროს ინფორმაციით, ახალი გადასახადი რუსეთის 7,6 მლრდ დოლარის ღირებულების ექსპორტს შეეხება - კონკრეტულად კი ისეთ საქონელს, როგორცაა რკინა, ფოლადი, ალუმინი, მილები, ელექტროენერგია და ცემენტი.