აშშ-ს პრეზიდენტმა ჯო ბაიდენმა თავისი ადმინისტრაციის მეორე მსხვილი ინიციატივა წარადგინა - ეკონომიკის განვითარების და ინფრასტრუქტურის განახლების გეგმა, რომლისთვისაც 2 ტრლნ. დოლარზე მეტი გამოიყოფა.

„1960-ანი წლების შემდეგ ყველაზე მასშტაბური გეგმა“ ინფრასტრუქტურის განახლებას, მრეწველობის გამოცოცხლებას, მეცნიერებაში ინვესტიციების ზრდას და სოციალური პროგრამების  დაფინანსებას გულისხმობს.

მსხვილი პროექტების ფულს ძირითადად ბიზნესი გადაიხდის - ბაიდენის ადმინისტრაცია კორპორაციული გადასახადის მესამედით გაზრდას გეგმავს, რაც ბილ კლინტონის პერიოდის შემდეგ გადასახადების  ყველაზე მასშტაბური ზრდაა.

2 ტრლნ. დოლარის დახარჯვა 8 წლის მანძილზე იგეგმება. ამ თანხიდან 621 მლრდ. დოლარი სატრანსპორტო ინფრასტრუქტურაში  ჩაიდება. ადმინისტრაცია გზების, პორტების, აეროპორტების, ხიდების აშენება-განახლებას და ელექტროტრანსპორტის განვითარებას გეგმავს.

650 მლრდ. დოლარი ამერიკის სახლებში ცხოვრების ხარისხის გაზრდაზე დაიხარჯება, მათ შორის 111 მლრდ. დოლარი სასმელი წყლის მიწოდების სისტემის მოდერნიზებაზე, 100 მლრდ. ინტერნეტის და ელექტროქსელების გაფართოვებაზე, 137 მლრდ. სკოლების აშენებაზე და განახლებაზე.

580 მლრდ. დოლარი ამერიკული მრეწველობის განახლებაზე დაიხარჯება, მათ შორის 180 მლრდ. მეცნიერულ-კვლევით და საკონსტრუქტორო სამუშაოების მოხმარდება. 300 მლრდ. დოლარი უშუალოდ მრეწველობაზე, ხოლო 100 მლრდ, დოლარი პროფესიულ  გადამზადების და კარიერული განვითარების პროგრამების რეალიზებაზე გამოიყოფა.

400 მლრდ, დოლარი მოხუცების და ავადმყოფების მოვლის პროგრამებზე  და ასევე შეზღუდული შესაძლებლობების მქონე ადამიანების ფინანსურ დახმარებაზე წავა.

როგორც უკვე ითქვა, ამ მასშტაბური გეგმის რეალიზებისთვის კორპორაციებისთვის გადასახადების ზრდაა გათვალისწინებული. 2017 წელს დონალდ ტრამპმა კორპორაციული გადასახადი 35%-დან 21%მდე შეამცირა, ამჯერად კი ბაიდენის ადმინისტრაცია მის 28%-მდე ზრდას გეგმავს.

მსხვილი პროექტებისთვის  სახსრების მოზიდვა ასევე ამერიკული კომპანიების ოფშორებში გადასვლის წინაამღდეგ ბრძოლით იგეგმება.  კორპორაციების საერთაშორისო მოგების გადასახადი 21%-მდე გაიზრდება - რაც ასევე ყველაზე მასშტაბური ზრდაა ბოლო 28 წლის მანძილზე.

ეს ჯო ბაიდენის მასშტაბური ინიციატივის მხოლოდ პირველი ნაწილია, რამდენიმე კვირაში მეორეც გამოქვეყნდება. ის უფრო სოციალური ხასიათის იქნება, და ისეთ საკითხებს შეეხება, როგორც განათლება, ჯანდაცვა, ბავშვების მოვლა, საგადასახადო შეღავათები მშობიარობის შემდეგ, და ა.შ.

ორივე პაკეტის ჯამური მოცულობა 4 ტრლნ. დოლარს მიაღწევს.

ეს ჯო ბაიდენის მეორე მსხვილი ეკონომიკური ინიციატივაა. რამდენიმე კვირის წინ კონგრესმა მის მიერ წარდგენილი პანდემიის შედეგად დაზარალებული ეკონომიკის და მოქალაქეების მხარდაჭერის გეგმა დაამტკიცა. მისი მოცულობა 1,9 ტრლნ. დოლარია.

ახალი ეკონომიკური გეგმის კონგრესში დამტკიცება ადვილი არ იქნება - რესპუბლიკელები გადასახადების ზრდას მხარს არ უჭერენ, ასევე მერყეობს დემოკრატების ზომიერი ნაწილიც.

ადმინისტრაცია იმედოვნებს, რომ ორივე პაკეტის მიღება 2021 წლის ზაფხულში მოხერხდება და ახალი გეგმა მილიონობით სამუშაო ადგილს შექმნის.