მსოფლიოს უმდიდრესმა ადამიანმა ჯეფ ბეზოსმა, რომელმაც თებერვალში Amazon-ის გენერალური დირექტორის პოსტიდან წასვლის შესახებ განაცხადა, კომპანიის აქციონერებს ამ სტატუსით უკანასკნელად მიმართა.
აქციონერების შესახებ
Amazon-მა აქციონერებს დიდი ფული მოუტანა, კომპანია ამჟამად ბაზარზე 1,6 ტრლნ. დოლარი ღირს.
„მარტში კომპანიის ერთ-ერთმა აქციონერმა წერილი გამომიგზავნა, სადაც მომიყვა, რომ 1997 წელს შვილს Amazon-ის 2 აქცია აჩუქა. ამან მისი ოჯახისთვის გადამწყვეტი როლი ითამაშა. მას შემდეგ აქციებს ფასი მუდმივად იზრდება. ალბათ უკეთესი იქნებოდა მაშინ მეტი აქციები ეყიდა“, - წერს ბეზოსი.
მისი თქმით, ის ამაყობს იმით, რომ მრავალი ადამიანის გამდიდრება შეძლო.
„ბევრმა ადამიანმა Amazon-ისგან მიღებული მოგება სწავლაზე, სახლის შეძენაზე, მძიმე მდგომარეობაში მყოფი ადამიანების დახმარებაზე, ქველმოქმედებაზე და კიდევ ბევრ რამეზე დახარჯა. მე ვამაყობ იმით, რომ ჩვენ ბევრი ადამიანის გამდიდრება მოვახერხეთ. ეს მნიშვნელოვანია და მათ ცხოვრებას აუმჯობესებს. თუმცა, ეს ჩვენს მიერ მოტანილი ერთადერთი სარგებელი არაა“, - წერს ბეზოსი.
ცხოვრებაში და ბიზნესში წარმატებაზე
„თუ თქვენ ბიზნესში და სინამდვილეში, ცხოვრებაში, წარმატების მიღწევა გსურთ, იმაზე მეტი უნდა შექმნათ ვიდრე მოიხმართ. თქვენი მიზანი უნდა იყოს სარგებლის მოტანა ყველასთვისვის. ნებისმიერი ბიზნესი, რომელიც სარგებელს არ ქმნის იმათთვის, ვისაც შეეხება, დიდხანს ვერ იცოცხლებს მაშინაც კი, როდესაც გარეგნულად წარმატებულად გამოიყურება“, - მიიჩნევს მილიარდერი.
ბეზოსის გათვლებით, 2020 წელს Amazon-მა კლიენტებს 164 მლრდ. დოლარის სარგებელი მოუტანა, ამ თანხად ბიზნესმენმა კლიენტების მიერ მათთვის საჭირო საქონლის შეძენაზე დაზოგილი დრო შეაფასა.
თანამშრომელთა სარგებელი მან 91 მლრდ. დოლარად შეაფასა, ამ თანხაში ხელფასები და ბონუსები შედის, აქციონერებმა კი 2020 წელს წმინდა მოგების სახით 21,3 მლრდ. დოლარი მიიღეს.
თანამშრომელთა მუშაობის პირობებზე
„როდესაც კითხულობს ახალ ამბებს ჩვენს კომპანიაზე, შესაძლოა შეიქმნას შთაბეჭდილება, თითქოს ჩვენ თანამშრომელთა შრომის პირობები არ გვადარდებს, მაგრამ ასე არაა. ჩვენ გვსურს მსოფლიოში საუკეთესო დამსაქმებლები ვიყოთ. სწორედ ამ მიმართულებით გავაგრძელებ საქმიანობას, როგორც Amazon-ის დირექტორთა საბჭოს აღმასრულებელი დირექტორი“, - წერს ჯეფ ბეზოსი აქციონერებს.
Amazon-ის დამაარსებლის თქმით, ის პირველ რიგში გამომგონებელია და მხოლოდ შემდეგ ბიზნესმენი და მეწარმე.
„მე გამომგონებელი ვარ და ეს ისაა, რაც მე ყველაზე კარგად გამომდის და სიამოვნებას მანიჭებს“ - წერს ბეზოსი.
მიმართვის ბოლოს ის აქციონერებს აქტიურ მუშაობას ურჩევს იმისთვის, რომ Amazon-მა თავისი განსხვავებულობა შეინარჩუნოს.
„მსოფლიოს სურს, რომ თქვენ ჩვეულებრივები იყოთ. არ დაუშვათ ეს და ყოველთვის გახსოვდეთ - თვითმყოფადობა ფასობს“, - წერს ბეზოსი.
forbes.ru
მოამზადა თენგიზ აბლოთიამ