ბოლო თვეები ბიტკოინისთვის საკმაოდ მძიმე აღმოჩნდა – 12 მაისიდან მთავარმა კრიპტოვალუტამ ხანგძლივი გაძვირების შემდეგ, გაიაფება დაიწყო – 58 000–დან მისი კურსი ივნისის ბოლოსთვის 30 000 დოლარს ჩამოსცდა.
ბიტკოინის კურსს ერთდროულად რამდენიმე ფაქტორმა „დაარტყა“ – პირველი ის იყო, რომ
Tesla– დამაარსებელმა ილონ მასკმა თავისი ბრენდის ავტომობილების გაყიდვები ბიტკოინზე შეაჩერა – მისი თქმით, ამის მიზეზია კრიპტოინდუსტრიის მიერ ენერგიის დიდი რაოდენობის მოხმარება, რაც საწვავის მოპოვების ზრდას და ბუნებისთვის დამატებითი ზიანის მიყენებას ნიშნავს.
მეორე ფაქტორია აშშ–ს იუსტიციის სამინისტროს და საგადასახადო სამმართველოს მიერ მსოფლიოს უმსხვილესი კრიპტობირჟის Binance–ს წინააღმდეგ დაწყებული გამოძიება, ხოლო მესამე – ჩინეთში მთელი ქვეყნის მასშტაბით ბანკების და საგადამხდელო სისტემებისთვის კრიპტოვალუტაში ტრანზაქციების, ხოლო ცალკეულ რეგიონებში ვირტუალური ფულის მოპოვების აკრძალვა.
ბიტკოინის ვარდნამ კრიპტოპლატფორმების მომგებიანობა მკვეთრად შეამცირა – ჯერ კიდევ მაისში მათი შემოსავლიანობა 20%–ს აღწევდა, ივნისის ბოლო კი – მაქსიმუმ 2,5%–ს. კრიპტოპინდუსტრია კაპიტალების გადინებას განიცდის – 2021 წლის 14 მაისისთვის ბიტკოინებით ვაჭრობის, ტრანზაქციების და ბრუნვის პლატფორმებში კაპიტალდაბანდებამ 153 მლრდ. დოლარს გადააჭარბა, უკვე 30 ივნისს კი ეს მაჩვენებელი 103 მლრდ.–მდე შემცირდა.
ყველაფერი ძალიან მარტივია – კრიპტოვალუტის გაიაფება იწვევს იმას, რომ ნაკლები ადამიანი ინახავს დანაზოგებს ვირტუალურ ფულში, ეს კი ნიშნავს ტრანზაქციებისა და მათთან ერთად, შემოსავლების შემცირებას.
თუმცა, ექსპერტების აზრით, ამ ეტაპზე კრიპტოვალუტას სერიოზული, ფატალური რისკები არ ემუქრება – გაიაფებულიც კი, ბიტკოინი მაინც საკმაოდ ძვირი რჩება და მოპოვების ხარჯების მუდმივი ზრდის პირობებშიც კი, 30 000 დოლარი 1 ბიტკოინში ცოტა არ არის.
ყველაფრის მიუხედავად, ციფრული აქტივების ინფრასტრუქტურა საკმაოდ მდგრადია და მთავრობების მხრიდან ზეწოლის შემდგომი ზრდის პირობებშიც კი, კრიპტოვალუტას 2015–2020 წლების სტატუსის დაბრუნება შეუძლია – ეს არის ალტერნატიული საგადამხდელო საშუალების ნიშა იმათთვის, ვინც ტრადიციულ ფინანსურ სისტემას არ ენდობა, სახელმწიფოს და მსხვილი კორპორაციების გარეშე, მხოლოდ კერძო პირებისთვის, სტარტაპებისთვის და მცირე ბიზნესისთვის.
სავარაუდოდ, ეს მოაცილებს კრიპტობაზრიდან მოკლევადიან ინვესტორებს, რომლებსაც სწრაფი მოგება აინტერესებთ და მასში მხოლოდ ფუნდამენტალური, გრძელვადიანი მოთამაშეები დარჩებიან.
სპეკულიანტების და სწრაფი მოგების მოყვარულთა გასვლა კრიპტობიზნესიდან შესაძლოა დარგისთვის სასარგებლოც კი აღმოჩნდეს.
forbes.ru
მოამზადა თენგიზ აბლოთიამ