აშშ-ს პრეზიდენტმა დონალდ ტრამპმა პანდემიისგან დაზარალებული ეკონომიკის და მოქალაქეების ფინანსური დახმარების 900 მლრდ.-იან პროგრამას ხელი მოაწერა.
თეთრი სახლის პრეს-მდივანის მოადგილემ ჯად დირმა განაცხადა, რომ ახალი პროგრამა 2021 წლის სექტემბრამდე იმოქმედებს და ის კორონავირუსთან და მის ეკონომიკურ შედეგებთან ბრძოლაზე დანახარჯებს ზრდას გულისხმობს.
დახმარების პაკეტი აშშ-ს კონგრესმა 21 დეკემბერს, ორივე პარტიის თანხმობის პირობებში დაამტკიცა. დოკუმენტი წინა პაკეტთან შედარებით ბევრ სიახლეს გულისხმობს - მაგალითად, დამატებითი 300 დოლარის შემწეობის ყოველკვირეულად დარიგებას უმუშევრად დარჩენილი მოქალაქეებისთვის მომავალი წლის მარტამდე.
ასევე ფინანსურ დახმარებას ბიზნეს-კომპანიები მიიღებენ, რომლებიც პანდემიის გამო მუშაობის განახლებას ვერ ახერხებენ. მცირე ბიზნესისთვის გათვალისწინებულია 284 მლრდ. დოლარის იაფი კრედიტების პროგრამა.
დემოკრატები და რესპუბლიკელები დახმარების პაკეტზე დიდ ხნის მანძილზე ვერ თანხმდებოდნენ, მის პირველ ვარიანტზე ხელი არც დონალდ ტრამპმა მოაწერა. მან კანონპროექტს სამარცხვინო უწოდა და ის კონგრესს დაუბრუნა.
პროექტში თავიდან ყოველი უმუშევრად დარჩენილი მოქალაქისთვის 600 დოლარის ოდენობის შემწეობა იყო გათვალისწინებული, რაც წინა პროგრამასთან შედარებით 3-ჯერ ნაკლებია.
თეთრი სახლის პრეს-მდივანის ჯად დირის თქმით, ტრამპის მიერ დოკუმენტის ხელმოწერის შემდეგ, პროექტის საბოლოო ვარიანტი 28 დეკემბერს განსახილველად ისევ კონგრესს გადაეცემა.
შესწორებულ ვარიანტში უმუშევრებისთვის დახმარება 600-დან თვეში 2000 დოლარამდეა გაზრდილი. გარდა ამისა, ასეთი ოჯახების ყველა არასრულწლოვანი წევრი თვეში 600 დოლარის დახმარებას მიიღებს.
„შესაბამისად, ოჯახი სადაც 2 შვილია, თვეში 5200 დოლარს მიიღებს“, - განაცხადა ჯად დირმა.
საინტერესო ისაა, რომ ტრამპის ინიციატივას დახმარების გაზრდის თაობაზე მხარი დემოკრატებმა დაუჭირეს, პრეზიდენტის ბევრი თანაპარტიელი-რესპუბლიკელი კი შეეწინაამღდეგა.
თუმცა, დრო არ ითმენს, რადგანაც დახმარების პაკეტს, რომელიც პანდემიისგან დაზარალებული 14 მლნ. ამერიკელისთვის უმუშევრობის შემწეობების გადახდას ითვალისწინებდა, 26 დეკემბერს ვადა გაუვიდა. შესაბამისად, შემოსავლის წყაროს გარეშე დარჩენილი მილიონობით ამერიკელი დახმარების ახალი პაკეტის მიღებას მოუთმენლად ელოდება. მათთვის ამ პროგრამის მიღებას სასიცოცხლო მნიშვნელობა აქვს, რადგანაც კორონავირუსის ეპიდემიას შტატებში ჯერჯერობით ბოლო არ უჩანს და მათთვის სახელმწიფო დახმარება შემოსავლის ერთადერთი სტაბილური წყაროა.
forbes.ru
თენგის აბლოთია