აშშ-ს კონგრესმა პანდემიისგან დაზარალებული მოსახლეობის და ეკონომიკის დახმარების პაკეტი, რომელიც 1,9 ტრლნ. დოლარის გამოყოფას ითვალისწინებს, 10 მარტს დაამტკიცა. და პრეზიდენტს ხელმოსაწერად გადაუგზავნა.
სავარაუდოდ, ჯო ბაიდენი პაკეტს ხელს 12 მარტს მოაწერს.
„კონგრესმა პრეზიდენტ ბაიდენის მიერ წარდგენილი ქვეყნის გადარჩენის გეგმა დაამტკიცა - ისტორიული საკანონმდებლო პაკეტი, რომელიც მოსახლეობას პირდაპირ დახმარებას გაუწევს და ჩვენს ეკონომიკას ბიძგს მისცემს“ - ნათქვამია თეთრი სახლის განცხადებაში.
1,9 ტრლნ.-ნიან პაკეტს წარმომადგენელთა პალატის ხმა 220 წევრმა მისცა, წინაამდღეგ - 211-მა. ეს მკვეთრად გამოხატული პარტიული გადაწყვეტილებაა - მხარდამჭერებს შორის არც ერთი რესპუბლიკელი არ ყოფილა.
6 მარტს ბაიდენის გეგმა სენატმაც და ასევე მხოლოდ დემოკრატების წყალობით, დაამტკიცა.
კონგრესის მიერ მოწონებული გეგმა ეკონომიკისთვის და მოსახლეობისთვის დახმარების უკვე მოქმედ ზომებს ახანგრძლივებს და აფართოვებს.
კერძოდ, უმუშევრობის შემწეობის (300 დოლარი კვირაში) გადახდა გაგრძელდება და ასევე უმუშევრობის დაზღვევის პროგრამის მოქმედებაც გახანგძლივდება.
შემწეობის სახით თითო მოსახლეზე გამოყოფილი პირველი 10 200 დოლარი არ იბეგრება.
ამერიკელთა უმრავლესობა და მათი შვილები ერთჯერადად 1400 დოლარს მიიღებენ. ეს თანხმა შემცირდება იმათთვის, ვისი შემოსავალიც წელიწადში 75 000-დან 80 000 დოლარამდეა, იმათზე კი, ვისი შემოსავალიც 80 000 დოლარს აღემატება, ეს ზომა არ გავრცელდება.
20 მლრდ. დოლარი კორონავირუსის საწინაამღეგო ვაქცინის წარმოებას და გავრცელებას, 50 მლრდ. კი - ტესტირებას და დაავადებულთა კონტაქტების დადგენას მოხმარდება.
გეგმა ბიზნესისთვის კომუნალური და ქირის გადასახადების დაფარვისთვის 25 მლრდ., ხოლო იპოთექურ მსესხებლების დახმარებაზე 10 მლრდ. დოლარის გამოყოფას გულისხმობს.
შტატების ადგილობრივი მთავრობები და აბორიგენი ტომები ცენტრალური ბიუჯეტიდან 350 მლრდ. დოლარს მიიღებენ.
120 მლრდ. სასკოლო განათლების მხარდაჭერას მოხმარდება.
სასურსათო დახმარების პროგრამის დაფინანსება 15%-ით გაიზრდება.
30 მლრდ.-ს დახმარების სახით სარესტორნო ბიზნესი მიიღებს.
ფართოვდება სუბსიდიები მოსახლეობის სამედიცინო დაზღვევის უზრუნველყოფისთვის.
წარმომადგენელთა პალატამ პაკეტი სენატის მიერ შეტანილი ცვლილებების მიღების შემდეგ დაამტკიცა. პროექტიდან ამოღებულ იქნა პუნქტი, რომელიც ქვეყანაში მინიმალური ხელფასის საათში 15 დოლარამდე გაზრდას ითვალისწინებდა.
წინა პაკეტების მოქმედება მარტის ბოლოს იწურება. 2020 წლის მარტში აშშ-ს მთავრობამ პანდემიის მიერ გამოწვეულ კრიზისთან ბრძოლის მიზნით 1,8 ტრლნ დოლარი გამოჰყო.
საპრეზიდენტო არჩევნებამდე, ნოემბერში წარმომადგენელთა პალატა 2 ტრლნ. ოდენობის პაკეტს განიხილავდა, თუმცა, მისი მიღება რესპუბლიკელებთან შეუთანხმებლობის გამო გადაიდო.
დეკემბერში კონგრესმა 900 მლრდ. დოლარად შეფასებული კიდევ ერთი პროგრამა დაამტკიცა, რომელიც კორონავირუსით დაზარალებული ყოველი ამერიკელისთვის თვეში 600 დოლარის გადახდას ითვალისწინებდა.
forbes.ru
მოამზადა თენგიზ აბლოთიამ