13 სექტემბერს ლონდონის ბირჟაზე ალუმინის ფასმა ტონაზე 3000 დოლარს მიაღწია - ეს ყველაზე მაღალი მაჩვენებელია 2008 წლიდან. შემდეგ, 14 სექტემბერს, ფასი ოდნავ შემცირდა, თუმცა მაინც ძალიან მაღალ ნიშნულზე შენარჩუნდა – 2981 დოლარი.
წლის დასაწყისიდან ამ ფერადი ლითონის ღირებულება 42%-ით გაიზარდა, 2020 წლის მინიმუმთან (1470) კი - თითქმის 2-ჯერ გაძვირდა.
ალუმინის ღირებულებასთან ერთად, იზრდება მწარმოებლების კაპიტალიზაცია - რუსული UC Rusal წლის დასაწყისიდან 102%-ით, ამერიკული Alcoa 110%-ით, ხოლო ჩინური Aluminium Corporation of China — 155%-ით გაძვირდა.
ფასის ზრდის მთავარი მიზეზია ლითონის დეფიციტი, რომელიც ეკონომიკის პოსტპანდემიურმა აღდგენა–მიწოდებას შორის დისბალანსმა გამოიწვია. ჩინეთში ალუმინის წარმოება გაიზარდა, თუმცა, მოხმარება სწრაფად იზრდება და კრიზისამდელ მაჩვენებელს უკვე გადააჭარბა.
ამ დროისთვის ალუმინის მსოფლიო წარმოების 58% სწორედ ჩინეთზე მოდის, დანარჩენი მწარმოებელი ქვეყნები 2019 წლის მოცულობებზე ვერ ადიან, რაც დეფიციტს აღრმავებს.
ფასების ზრდის კიდევ ერთი მიზეზია ჩინეთის მთავრობის მიერ ეკოლოგიაზე ყურადღების გამახვილება - კერძოდ, ატმოსფეროში მავნე ნივთიერებების გამოყოფის შემცირების პოლიტიკა. ალუმინის წარმოება ბევრ ენერგიას მოითხოვს, რაც ძირითადად ტრადიციულ, ნახშირის და გაზის გენერაციას ზრდის და შესაბამისად, ეკოლოგიურ მდგომარეობაზე ნეგატიურად აისახება.
კიდეც ერთი მიზეზია - სამხედრო გადატრიალება გვინეაში, რომელიც მსოფლიოში ალუმინის წარმოებისთვის შეუცვლელია - სწორედ ამ ღარიბ აფრიკულ ქვეყანაზე მოდის ლითონის წარმოებისთვის აუცილებელი ბოქსიტების მოპოვების 20%.
არეულობა გვინეაში ალუმინის ფასის არასტაბილურობას ხელს უწყობს, თუმცა, ეს ფაქტორი მხოლოდ დანარჩენებთან ერთობლიობაში მომავალში დეფიციტის გაღრმავების და შესაბამისად, ფასის ზრდის მიზეზი შეიძლება გახდეს.
ანალიტიკოსების აზრით, ძვირი ალუმინის პერიოდი შესაძლოა 2023 წლის ბოლომდე გაგრძელდეს, რადგანაც, ჩინეთის ეკოლოგიური პოლიტიკა მას წარმოების ზრდის შესაძლებლობას არ მისცემს. სხვა ქვეყნები კი ამ დანაკლისს ვერ დაფარავენ,
ამიტომაც, ალუმინის მწარმოებელი კომპანიების აქციები დღეს, როგორც არასდროს, მიმზიდველია ინვესტორებისთვის. თუმცა, ფასის ზრდაში სპეკულაციური შემადგენელიც არის, განსაკუთრებით გვინეასთან დაკავშირებით - ამ დროის მონაცემებით, გადატრიალების მიუხედავად, ალუმინის არც ერთ მწარმოებელს ბოქსიტების მიწოდების კუთხით არანაირი შეფერხება არ შექმნია.
სავარაუდოდ, მომავალშიც ასე გაგრძელდება, რადგანაც ბოქსიტების მოპოვება გვინეაში შემოსავლის მთავარი წყაროა როგორც ბიუჯეტისთვის, ასევე მაღალჩინოსნებისთვის.
ასე რომ, არსებობს იმის ალბათობაც, რომ ცოტა ხანში ფასები ალუმინიზე შემცირდეს, თუმცა, ის ყველა შემთხვევაში მაღალი დარჩება.
forbes.ru