საჰაერო ტრანსპორტის საერთაშორისო ასოციაციამ (IATA) 2020 წელს დარგის ზარალის პროგნოზი 118,5 მლრდ. დოლარამდე გაზარდა, ჯერ კიდევ ივნისში საუბარი 84,3 მლრდ.-ზე იყო.
„წიგნებში 2020 წელი ავიაციის ისტორიაში ფინანსური შედეგების თვალსაზრისით ყველაზე მძიმედ შეფასდება. რომ არა 173 მლრდ. დოლარის სახელმწიფო დახმარებები, ჩვენ გაკოტრებების ტალღას დავინახავდით“ - განაცხადა IATA-ს პრეზიდენტმა ალექსანდრ დე ჟუნიაკმა.
ასოციაციის გათვლებით, საშუალო ავიაკომპანია მთავრობის დახმარების დღევანდელი დონით და ბაზარზე არსებული სიტუაციის შენარჩუნების შემთხვევაში, მაქსიმუმ 8,5 თვე გაძლებს, შემდეგ მისი გაკოტრება გარდაუვალია.
IATA-ში მგზავრნაკადის შემცირებას 60,5%-ი, სამგზავრო ფრენებისგან შემოსავლის ვარდნას კი 2/3-ით, 191 მლრდ. დოლარამდე პროგნოზირებენ. რაც შეეხება სატვირთო გადაზიდვებს, ეს მაჩვენებელი პირიქით, 36%-ით, 117,7 მლრდ.- მდე გაიზრდება.
თუმცა, ანგარიშში ხაზგასმულია, რომ სატვირთო გადაზიდვებიდან შემოსავლის ზრდა სამგზავრო სექტორის ჩამოშლას ვერ დააკომპენსირებს.
სატვირთო ბიზნესი სამგზავროზე უკეთ მუშაობს, მაგრამ ეს ავიასექტორს ზარალისგან ვერ იხსნის“ - ამბობს ლე ჟუნიაკი.
მისი თქმით, ავიასექტორის მოგებაზე დაბრუნება მხოლოდ მაშინ იქნება შესაძლებელი, როდესაც მგზავრები ფრენებისთვის მზად იქნებიან, თანაც რეალურ ფასებში.
IATA-ს გათვლებით მოთხოვნა შიდა რეისებზე საერთაშორისოზე ნაკლებად შემცირდება, მათ შორის რუსეთში და ჩინეთში ამ დარგის უფრო სწრაფი ზრდის ხარჯზე. შიდა ავიამიმოსვლა მოსალოდნელზე სწრაფად, ასევე შტატებშიც აღდგება.
2021 წელს ავიაკომპანიების მგზავრთნაკადი 2,8 მლრდ.-ს მიაღწევს, ეს კი 2019 წელზე 1,7 მლრდ.-ით ნაკლები იქნება, მაგრამ თვითმფრინავების დატვირთულობის მაჩვენებელი 2020 წლის 65%-დან 72,%-მდე გაიზრდება.
სავარაუდოდ, 2021 წლის მე-4 კვარტალში სამოქალაქო ავიაცია მოგებაზე გავა, თუმცა, მთლიანობაში 2021 წელსაც დარგს ზარალი ელის - 38, 7 მლრდ. დოლარი (ივნისი პროგნოზით - 15,8 მლრდ.).
სატვირთო გადაზიდვები ვაქცინების ტრანსპორტირების და საქმიანი აქტივობის ზრდის ფონზე 2019 წლის დონეს დაუბრუნდება - 61,2 მლნ. ტონა (2019-ში -61, 3 მლნ.) შემოსავლები კი 139, 8 მლრდ. დოლარამდე გაიზრდება.
თუმცა, სამგზავრო ავიაციას მძიმე წლები მოელის - 2019 წლის დონეს დარგი მხოლოდ 2024 წელს დაუბრუნდება.
წყარ:forbes.ru
მოამზადა თენგიზ აბლოთიამ