კვირის დასაწყისში ევრო 93 რუბლი ღირდა - ამაზე სუსტი რუსული ეროვნული ვალუტა არასდროს ყოფილა.

ახალ ეკონომიკურ კრიზისამდე რუსეთი პირველ რიგში პოლიტიკურმა გადაწყვეტილებებმა მიიყვანა, თუმცა, ექსპერტები გვირაბის ბოლოს სინათლეს მაინც ხედავენ.

ვლადიმერ პუტინის პოლიტიკა დასავლეთში პოპულარობით ნაკლებად სარგებლობს, მაგრამ ის პროტესტებს რამდენიმე ფრონტზე იწვევს - ნავალნის სავარაუდო მოწამლვა, ბელორუსი დიქტატორის ალექსანდრ ლუკაშენკოს მხარდაჭერა, გაზსადენი „ჩრდილოეთ ნაკადი-2“, შიშები დასავლეთის სხვადასხვა არჩევნებში რუსული სპეცსამსახურების ჩარევასთან დაკავშირებით, და განახლებული ომი სომხეთს და აზერბაიჯანს შორის.

ბევრი დიდი თუ პატარა კრიზისი რუსეთის ეროვნულ ვალუტას ურტყამს. ივნისიდან რუბლი თითქის 14%-ით დასუსტდა დოლართან მიმართებაში და 20%-ით ევროსთან. ხუთშაბათს რუბლი მცირედით გამყარდა, თუმცა, დაკარგული პოზიციები მაინც ვერ აღიდგინა - დღეს 1 დოლარი 78 რუბლი ღირს, ხოლო სულ რამდენიმე დღის წინ 73-74 იყო.

საბოლოო ჯამში პოლიტიკური ფაქტორები ფინანსური ხდება და მათ ძლევამოსილი პუტინი ვერ აკონტროლებს. ინვესტორები შიშობენ, რომ დასავლეთი რუსეთის წინაამღდეგ ახალ სანქციებს შემოიღებს, ეს კი ბუნებრივად, ურტყამს რუბლის კურსს.

ამას ემატება კორონავირუსი - რუსეთში, ისევე, როგორც ყველგან, დაავადებულთა რაოდენობა ისევ იზრდება. რუსეთი, სადაც 1,2 მლნ. ინფიცირებული დაფიქსირდა, ამ მაჩვენებლით მსოფლიოში მე-4 ადგილზეა აშშ-ს, ინდოეთის, და ბრაზილიის შემდეგ. ინფექციის აფეთქებაც აფრთხობს ინვესტორებს, და მათ უფრო მშვიდი ნავსაყუდელის ძებნას აიძულებს.

თუმცა, რუსი ექსპერტები ოპტიმიზმს ინარჩუნებენ, და სიტუაციას ნაკლებად დრამატულად მიიჩნევენ. სავარაუდო სანქციები მათ არ აშინებთ.

„მკაცრი სანქციები, რომლები შტატებმა არჩევნებში ჩარევის გამო შემოიღეს, ისე მკაცრად არ რეალიზდებოდა, როგორც გათვალისწინებული იყო. ასევე დასავლეთის ქვეყნებს მკაცრი სანქციები კრემლის მიერ პოლიტიკური მოწინაამღდეგეების დევნის გამოც არ შემოუღია. ასე რომ ჩვენ ველით, რომ შტორმი მხოლოდ სიმბოლური სანქციებით დასრულდება“ - ნათქვამია Commerzbank-ის ანგარიშში.

ამავე დროს მოხსენების ავტორთა აზრით, რუსეთის ცენტრალური ბანის საკმარისი რაოდენობის სავალუტო რეზერვებს ფლობს, და აუცილებლობის შემთხვევაში კურსის კორექტირება შეუძლია.

„ ამიტომაც, დღევანდელი ვარდნა დროებითია, და წლის ბოლოსთვის ევრო 84 რუბლი იღირება, რაც დღევანდელთან შედარებით 9%-ით ნაკლებია. მომავალი წლის ბოლოსთვის კი ევრო 80 რუბლამდე დასუსტდება“ - მიიჩნევენ Commerzbank-ში.

მოამზადა თენგიზ აბლოთიამ