რას აპირებს ტრამპების ოჯახი ახლო მომავალში?
საპრეზიდენტო არჩევნებში ტრამპის დამარცხების შემდეგ, აშშ-ში ყველა არა მხოლოდ პირადად მილიარდერის, არამედ მისი მრავალრიცხოვანი ოჯახის წევრების მომავალზე მარჩიელობს.
ბოლო პერიოდამდე მანჰეტენის მაღალ საზოგადოებაში ივანკა ტრამპის და მისი მეუღლის, ჯარედ კუშნერის ნიუ-იორკში დაბრუნებას გამორიცხავდნენ. საქმე იქამდეც კი მივიდა, რომ კუშნერის მულმა, ტოპ-მოდელ კარლი კროსმა სატელევიზიო შოუ „პროექტ პოდიუმში მასთან ერთად გამოჩენაც კი არ მოისურვა.
პრეზიდენტის სიძის ძმის, ჯოშის მეუღლე არ ესწრებოდა არც პატარა წვეულებას, რომელიც ჯარედის და ივანკას ქორწინების მე-10 წლისთავს მიეძღვნა - მისი თქმით, მან ეს ნაბიჯი „ტრამპებთან ერთ სურათში გამოჩენის მაღალი რისკის“ გამო გადადგა.
კროსი - გამონაკლისი არაა. 4 წლის წინ, ნიუ-იორკელები იმედოვნებდნენ, რომ ივანკა და ჯარედი დონალდ ტრამპზე შემარბილებელ გავლენას მოახდენდნენ, თუმცა, საბოლოოდ, ეს იმედი არ გამართლდა.
დღეს ამერიკის უმსხვილესი მეგაპოლისის უმაღლესი საზოგადოების კარი კუშნერ-ტრამპის წყვილისთვის დახურულია. ადრე მათი ოჯახი ბევრ ცნობილ ადამიანთან, მათ შორის ჰოლივუდის ვარსკლავ ნატალი პორტმანთან მეგობრობდა, მაგრამ დღეს მათ ყველამ ზურგი აქცია.
თუმცა, ინსაიდერმა ნეტ ფრიმანმა დაწერა, რომ ივანკა და ჯარედი ნიუ-იორკში დაბრუნებას აპირებენ. ამიერიდან მათი ინტერესის სფერო ხელოვნების ნიმუშების კოლექციონირება იქნება. მათ ამ საქმეში ხელოვნებასთან დაკავშირებული საქველმოქმედო ფონდების დახმარების იმედი აქვთ.
ასევე ისინი ვარაუდობენ, რომ ეს მათ უმაღლეს საზოგადოებაში კარს ისევ გაუხსნის, და დაკარგული გარემოცვის დაბრუნებაში დაეხმარება.
„პანდემიასთან დაკავშირებული შეზღუდვები მათ ამ ეტაპზე აწყობთ, იმიტომ რომ წვეულებებს, სადაც მათ არ დაპატიჟებენ, არავინ აწყობს. თუმცა, ჯერ კიდევ მოქმედი პრეზიდენტის მუქარამ, რომ ვაქცინის აღმოჩენის შემთხვევაში ნიუ-იორკს მისი მიღებისთვის რიგში დადგომა მოუწევს, ტრამპების ოჯახის იმიჯი კიდევ უფრო დააზიანა“ - აღნიშნავს ფრიმანი.
ასევე მანჰეტენში კერძო სკოლების მოძიებაც შესაძლოა პრობლემა გახდეს. რამდენიმე კვირის წინ ჯარედის და ივანკას შვილებს ვაშინგტონში სკოლის გამოცვლა მოუწიათ - როგორც ამბობენ, ამის მიზეზი სხვა მოსწავლეების მშობლების უკმაყოფილება გახდა.
კერძოდ, პრეზიდენტის ოჯახის წევრებს წინასაარჩვენო კამპანიის დროს სხვადასხვა ღონისძიებებზე პირბადეების გარეშე მონაწილეობაში ადანაშაულებდნენ.
„ისინი კორონავირუსთან დაკავშირებულ შეზღუდვებს არ იცავენ და ჩვენი შვილების ჯანმრთელობისთვის საფრთხეს წარმოადგენენ“ - განაცხადეს მოსწავლეების მშობლებმა.
ამავე დროს ექს-პრეზიდენტის ოჯახის წევრების მომავალი პოლიტიკური კარიერა უკვე გარკვეულია - ტრამპისთვის მიცემული 72 მლნ. ხმა მის შვილს და სიძეს რესპუბლიკურ პარტიაში დასაქმების გარანტიას აძლევს.
ოჯახის წევრებს შორის, საზოგადოების და მასმედიის ყველაზე ნაკლებ ყურადღებას ერიკი იპყრობს. სავარაუდოდ, მისი მომავალი მამის და ძმის გეგმებზეა დამოკიდებული.
focus.de
მოამზადა თენგიზ აბლოთიამ