ევროკავშირის ერთიანი ვაქცინაციის ფრონტი, არასაიმედოობის გამო, იშლება - სულ უფრო ხშირად სხვადასხვა ქვეყნები ინიციატივას საკუთარ თავზე იღებენ. ეს არა მხოლოდ ვაქცინაციის პრობლემებთან, არამედ ევროკავშირში ძალის ახალი ცენტრების გამოჩენასთანაცაა დაკავშირებული.
კერძოდ, ავსტრია და დანია ისრაელთან ე.წ. სავაქცინო ალიანსის შექმნას გეგმავენ. ევროკავშირის რეაქცია ამ დემარშზე მოზომილი იყო - ევროკომისიის წარმომადგენლის ერიკ მამერის თქმით, „ევროკავშირის ყველა ქვეყანას სხვა შესაძლებლობების ძიების უფლება აქვს, და ეს სრულიად ნორმალური პროცესია“.
ავსტრიის პრემიერ-მინისტრმა სებასტიან კურცმა განაცხადა, რომ ევროკავშირის მიდგომა, რომელიც ვაქცინაციის ერთიან სტრატეგიას ითვალისწინებდა, სწორი იდეა იყო, თუმცა, გასათვალისწინებელია კორონავირუსის ახალი მუტაციები.
„დღეს, როდესაც ვირუსი იცვლება,ვაქცინაცია რაც შეიძლება სწრაფად უნდა ჩატარდეს. ამიტომაც, არ შეიძლება ამ საკითხში მხოლოდ ევროკავშირის იმედზე ყოფნა. ჩვენ სხვადასხვა ვარიანტები უნდა ვეძებოთ“ - მიიჩნევს ავსტრიის პრემიერ-მინისტრი.
თუმცა, ოფიციალური ვენის ნაბიჯი ევროკომისიისადმი უნდობლობის გამოხატვას ნიშნავს, ხოლო სებასტიან კურცის გადაწყვეტილება სხვებისთვის მაგალითი ხდება.
„ევროკავშირის ყველა ქვეყანა უკვე მიიჩნევს, რომ ადრე თუ გვიან ვაქცინაცია დამოუკიდებლად მოუწევს, რადგანაც არავინ იცის, ერთიანი სქემა რამდენ ხანს იარსებებს“ - ამბობს ევროკომისიის ერთ-ერთი წარმომადგენელი
საერთაშორისო პრესა ევროპის ერთიანი ვაქცინაციის გეგმის ჩავარდნას უკვე შემდგარ ფაქტად მიიჩნევს, მეტიც, ბელგიური გაზეთის Echo-ს აზრით, ეს იდეა თავიდანვე უტოპიური იყო - „ეროვნულმა ეგოიზმმა და პოლიტიკოსების ვიწრო, საკუთარ ამომრჩეველზე კონცენტრირებულმა აზროვნებამ ერთიან ვაქცინაციას შანსი არ დაუტოვეს - მიიჩნევს გაზეთი.
პოლონური გაზეთი Polityka დამანგრეველ დასკვნას აკეთებს - „იდეაში ვაქცინის ერთი, დიდი შესყიდვა უნდა ყოფილ იყო, თუმცა, კულისების მიღმა ინდივიდუალური მოლაპარაკებები დაიწყო, და შედეგად, დღეს ყველა იმ პრეპარატს ყიდულობს, რომლის ყიდვაც შეუძლია. ევროკავშირისთვის ეს მორიგი მარცხია“.
ავსტრიასთან და დანიასთან მიერთებაზე ჰოლანდიაც ფიქრობს, ამავე დროს აღმოსავლეთ ევროპის ქვეყნები ფსონებს რუსულ და ჩინურ ვაქცინებზე დებენ - უნგრეთი, პოლონეთი, სლოვაკეთი, და ჩეხეთი.
სავაქცინო კრიზისი ევროკავშირის ქვეყნებს შორის შუღლს რამდენიმე მიმართულებით აღრმავებს, და პარალელურად ბერლინი-პარიზის კავშირის ოპოზიციის რამდენიმე ცენტრი ყალიბდება.
ევროპარლამენტის ექსპერტი ჯანდაცვის საკითხებში ანდრეას გლიუკი ვაქცინაციის ევროპული პროგრამის ჩავარდნაში ევროკომისიის ხელმძღვანელს ურსულა ფონ დერ კლიაინენს ადანაშაულებს.
„ზედმეტად ხანგძლივი მოლაპარაკებები და ვაქცინების შესყიდვაში გამჭირვალობის დაბალი დონე - იმის მაჩვენებელია, რომ ევროკომისიამ ამ კრიზისში ძალიან ცუდად იმუშავა“ - მიიჩნევს ის.
მისი აზრით, ის ფაქტი, რომ ევროკავშირის ცალკეული ქვეყნები ვაქცინის მოპოვების დამოიუკიდებელ გზას ირჩევენ - დიდი გამოწვევაა ბრიუსელისთვის.
Focus.de
მოამზადა თენგიზ აბლოთიამ
ევროკავშირი 
