იანვარში გასული წლის ანალოგიურ პერიოდთან შედარებით კომერციული ბანკების მიერ გაცემული სესხების მოცულობა 20%-ით 37.331 მლრდ ლარამდე გაიზარდა, 2020 წლის დეკემბერთან შედარებით კი უმნიშვნელოდ 0.12%-ით შემცირდა. ინფორმაციას ეროვნული ბანკი ავრცელებს.

1 წლის განმავლობაში გაცემული სესხების საერთო მოცულობა 6.215 მლრდ ლარით გაიზარდა, მათ შორის: სოფლის მეურნეობაში 188 მლნ-ით, მრეწველობაში 582 მლნ-ით, მშენებლობაში 592 მლნ-ით, ვაჭრობაში 652 მლნ-ით, სასტუმროებსა და რესტორნებში 597 მლნ-ით, ტრანსპორსა და კავშირგაბმულობაში 135 მლნ-ით, ჯანდაცვასა და სოციალურ მომსახურებაზე 106 მლნ-ით, უძრავი ქონებით კომერციულ საქმიანობაზე  437 მლნ-ით, ფინანურ სუამავლობაში მინუს 73 მლნ-ით, სხვა დარგებზე 92 მლნ-ით.

სესხების ლარიზაციის კოეფიციენტი იანვარში 44.8% იყო, 1 წლის წინანდელთან შედარებით ნახევარი პროცენტით ნაკლები.

სესხების ნახევარზე ოდნავ მეტი - 50.3% ფიზიკურ პირებზე და ინდმეწარმეებზეა გაცემული. წლის განმავლობაში სამომხმარებლო სესხების მოცულობა 620 მლნ ლარით 4.677 მლრდ-მდეა გაზრდილი, უძრავი ქონებით უზრუნველყოფილი სესხების კი2.283 მლრდ-ით 12.419 მლრდ ლარამდე.

უძრავი ქონების უზრუნველყოფით გაცემულ სესხებზე დარიცხული საპროცენტო განაკვეთი სხვა სეხზებთან შედარებით მნიშვნელოვნად დაბალია. ფიზიკური პირებისთვის ლარში ის საშუალოდ 11.8%-ს შეადგენს, 0.3%-ით ნაკლებს, ვიდრე 2020 წლის იანვარში. უცხოურ ვალუტაში გაცემულ სესხებზე კი 6.3%-ს 0.1%-ით ნაკლებს ვიდრე გასული წლის ანალოგიურ პერიოდში.