საბანკო დეპოზიტების მოცულობა იანვარში, გასული წლის ანალოგიურ პერიოდთან შედარებით 31%-ით 35.6 მლრდ ლარამდე გაიზარდა. 13.5 მლრდ ლარშია განთავსებული, 22.1 მლრდ უცხოურ ვალუტაში, ძირითადად დოლარში. პორტფელი მოიცავს როგორც ფიზიკური, ასევე იურიდიული პირების ანაბრებსა და მიმდინარე ანგარიშებს.

პირველი თებერვლისთვის ლარში მიმდინარე ანგარიშები 3.6 მლრდ-ს შეადგენდა, მოთხოვნამდე დეპოზიტები 2.9 მლრდ-ს, ხოლო ვადიანი ანაბრები 7 მლრდ-ს. თავად ვადიან ანაბრებში ყველაზე დიდი წილი 1 თვემდე და 1 წელზე მეტი ვადის დეპოზიტებს ეკავა, შესაბამისად 2.4 და 2.5 მლრდ ლარი.

უცხოურ ვალუტაში დენომინირებული დეპოზიტებიდან მიმდინარე ანგარიშების წილი 5.6 მლრდ-ა, მოთხოვნამდე დეპოზიტების - 6.4 მლრდ. ვადიანი ანაბრების კი 10.1 მლრდ. განსხვავებით ლარისგან უცხოურ ვალუტაში 1 თვემდე ვადის ანაბრის წილი სულ 23 მლნ-ა, ანუ ვადიანი ანაბრების მხოლოდ 0.23%. 1 წელზე მეტი ვადის მქონე ანაბრების მოცულობა კი 5 მლრდ-ს აღწევს. 6-დან 12 თვემდე - 3.2 მლრდ-ს.

საპროცენტო განაკვეთები ლარში და დოლარში გახსნილ ანაბრებზე ერთმანეთისგან მკვეთრად განსხვავდება. 1 წელიწადში ლარში ის 8.6%-დან 9.1%-მდე გაიზარდა, თუმცა ნოემბერში 9.3%-საც აღწევდა. უცხოურ ვალუტაში კი პირიქით, 2.8%-დან 2.5%-მდე შემცირდა.

ფიზიკური პირების დეპოზიტების წილი 18.7 მლრდ-ს აღწევს, რაც მთელი პორტფელის 52.5%-ს შეადგენს. თუ ჯამურად დეპოზიტებში ლარიზაციის მაჩვენებელი 38%-ა, ფიზიკურ პირებში ის მხოლოდ 23.4%-ს შეადგენს. 1 წლის წინ 24.5%-ს უდრიდა.

ფიზიკური პირებისთვის საპროცენტო განაკვეთები შედარებით მაღალია. ლარში ის 9.2%-ს შეადგენს. 1 წლის წინ 8.9% იყო, თუმცა 2020 წლის ივლისში 10.1%-საც აღწევდა. უცხოურ ვალუტაში კი ბოლო 1 წელიწადში 3%-დან 2.6%-მდე შემცირდა.

საშუალოდ უცხოურ ვალუტაში დარიცხული საპროცენტო განაკვეთი ლარში დარიცხულ სარგებელთან შედარებით 3.5-ჯერ მაღალია, მაგრამ ფიზიკური პირების ანაბრების ¾-ზე მეტი მაინც უცხოურ ვალუტაშია განთავსებული, რასაც ძალიან მარტივი ახსნა აქვს. ლარი დოლართან მიმართებაში ყოველწლიურად ორნიშნა მაჩვენებლით უფასურდება, გამონაკლისი 2017 წელი იყო. ასეთ ვითარებაში გაუფასურების ტემპი მაღალი საპროცენტო განაკვეთის სარგებელს მთლიანად ფარავს და დოლარსი გადახურდავებით ძირი თანხა ხშირ შემთხვევაში არათუ იზრდება, მცირდება კიდეც. 1 წლის წინ, როდესაც კურსი 2.87-ს შეადგენდა, 12 თვიან ანაბარზე საპროცენტო განაკვეთი ლარში 9.7%-ს შეადგენა, უცხოურ ვალუტაში 3.1%-ს. $1000 მაშინ 2870 ლარს უდრიდა. დოლარში გახსნილ ანაბარზე 1000 დოლარი 1031 გახდებოდა, რაც დღევანდელი კურსით 3412 ლარია. ლარის არჩევის შემთხვევაში დეპოზიტი მხოლოდ 3150 ლარამდე გაიზრდებოდა. 1000 დოლარის ექვივალენტ თანხაში განსხვავება 250 ლარზე მეტია.