ჯანსაღი ცხოვრების წესი სულ უფრო პოპულარული ხდება და ამ ფონზე საქართველოში ახალი ფიტნეს კლუბები იხსნება, ხოლო უკვე არსებული სავარჯიშო დარბაზები გაფართოებით და ექსკლუზიური შეთავაზებებით ცდილობენ მომხმარებლების გადაბირებას.
„ოკტოპუს - ფიტნეს კლუბი“ თბილისში „სითი მოლი საბურთალოს“ სავაჭრო ცენტრში ახალ ფილიალს გახსნის. როგორც „კომერსანტს“ კლუბის დირექტორმა გიორგი ასათიანმა განუცხადა, ახალ ფილიალს პრემიუმ-პრაიმ ლოკაცია ექნება, ანუ ის მაღალ კლასზე იქნება გათვლილი.
„ახალ ფილიალს, რომელიც „სითი მოლი საბურთალოში“ გაიხსნება პრემიუმ-პრაიმ ლოკაცია ექნება. მას დამატებით ისეთი უპირატესობების ექნება, რომელიც ქართული ბაზარისთვის სიახლეა. ორ საკითხზე ვაკეთებთ აქცენტს, პირველი - გვინდა იყოს სრულყოფილი და ყველა სახის ვარჯიშისთვის აუცილებელი სივრცე შექმნილი. მეორე - აქ იქნება მაღალი ტექნოლოგიები, რაც გულისხმობს იმას, რომ ახალი თაობის ტრენჟორები განთავსდება, რომლებიც ინტეგრირებულია ადამიანის ქცევასთან. ამას დაემატება ისეთი მომსახურებები, როგორიცაა საუნა, სოლარიუმი და ა.შ.“ - განაცხადა გიორგი ასათიანმა.
კონკურენტის პარალელურად მომხმარებლისთვის სიახლეების შეთავაზებას უახლოეს პერიოდში გეგმავს ფიტნეს კლუბი World Class-ც, თუმცა დეტალებზე საუბრისგან ამ ეტაზე თავს იკავებენ. „კომერსანტთან“ საუბრისას ფიტნეს კლუბის მარკეტინგის დირექტორი ნინო ხუროძე ამბობს, რომ ისინი მომხმარებლებს ექსკლუზიური შეტავაზებებით და მუდმივი სიახლეებით ანებივრებენ.
„World Class-ის შემოსვლით საქართველოში მნიშვნელოვნად განვითარდა ფიტნესინდუსტრია, კონკურენტებს შორის გაჩნდა განვითარების და პრემიუმ კლასის ფიტნეს დარბაზების გახსნის მოთხოვნა, ასევე გაიზარდა მომხმარებლის მხრიდან ხარისხიანი, სერტიფიცირებული ფიტნესპროდუქტების და მომსახურების მიღების სურვილიც. ჩვენი შემდეგი ნაბიჯები კიდევ უფრო მეტ სიახლეს შემოიტანს ბაზარზე, რის შესახებ დეტალურ ინფორმაციას უახლოეს მომავალში გავავრცელებთ.
World Class-ის 1300 კვადრატულ მეტრზე განთავსებული მულტიფუნქციური კლუბი მომხმარებელს სთავაზობს უმაღლესი ხარისხისა და სტანდარტების მქონე, პრემიუმ კლასის ფიტნეს სერვისს. მათ შორის: ფიტნესმწვრთნელების საერთაშორისო-სერტიფიცირებულ გუნდს; მსოფლიოში ცნობილი ბრენდების AntiGravity®-სა და Romana's Pilates®-ის ექსკლუზიურ, ინდივიდუალურ და ჯგუფურ პროგრამებს; მსოფლიოს წამყვანი სატრენაჟორო ბრენდის, Technogym-ის უახლესი ხაზით აღჭურვილ 600 კვ.მ. ფართობის სავარჯიშო დარბაზს ყველა ტიპის სავარჯიშო ზონით“, - განაცხადა ნინო ხუროძემ.
ნინო თამაზაშვილი