3 თვიანი კარანტინისა და კულინარიული ნიჭის გამოვლენის შემდეგ, ფორმაში ჩადგომის მსურველი ბევრი აღმოჩნდა. თუმცა, ფიტნეს დარბაზები, რომელთა გახსნასაც საზოგადოება დიდხანს ელოდა, კორონავირუსის მეორე ტალღის ფონზე კვლავ მომხმარებელთა დეფიციტს განიცდიან.
იმის გასარკვევად, თუ რა ხდება სავარჯიშო ბაზარზე „კომერსანტი“ ფიტნესკლუბების წარმომადგენლებს დაუკავშირდა. კორონავირუსის ახალი შემოტევის ფონზე Snap Fitness Georgia-ს მომხმარებელთა 30%-იანი კლება აქვს, თუმცა 15 სექტემბრიდან ახალი, პრემიუმ ხარისხის ფიტნეს დარბაზის გახსნას მაინც აანონსებს.
„წინა წლის სექტემბერთან შედარებით მომხმარებლების დაახლოებით 30%-იანი კლება გვაქვს. თავდაპირველად, ფიტნეს დარბაზების გახსნის მოლოდინმა გაამართლა და ბევრი მომხმარებელი გვყავდა, თუმცა სექტემბერში, მეორე ტალღის გამო მათმა რაოდენობამ ისევ იკლო. მუშაობის შეჩერებას არ ვაპირებთ, რადგან ვერასდროს ვეღარ გავიხსნებით და ბიზნესზე ძალიან ცუდად იმოქმედებს. ჩვენი ანტიკრიზისული გეგმის მიხედვით, ბოლო ეტაპზე ალბათ პერსონალის შემცირება იქნება. ამ ეტაპზე, ფინანსური ვალდებულებების კუთხით, ბანკსა და მოიჯარეებთან მოლაპარაკებები გვაქვს. მუშაობას არ შევაჩერებთ, რადგან ბიზნესზე ძალიან ცუდად იმოქმედებს და ვეღარ გავიხსნებით. King David-ის შენობაში ახალი პრემიუმ ხარისხის ფილიალი იხსნება, რომელიც 15 მარტს უნდა გახსნილიყო, თუმცა პანდემიის გამო მთლიანად დაგვხურეს. ახალ ფილიალში როგორც მომსახურების, ასევე ჯგუფური ვარჯიშების კუთხით ბევრი დამატებითი სერვისი იქნება. ასევე, მომხმარებელს ულამაზესი სავარჯიშო სივრცე და პარკინგის ადგილი დახვდება.“ - განმარტავს Snap Fitness Georgia-ს ქსელის დირექტორი სოფო სოლოღაშვილი
შედარებით უკეთესი სიტუაცია Worldclass-ის ფიტნეს ცენტრში გამოიკვეთა, სადაც მომხმარებლების შემცირება მხოლოდ გარკვეული პერიოდი დაფიქსირდა.
ჩვეულ რეჟიმში ვმუშაობთ და მომხმარებლები არიან, მაგრამ რამდენიმე დღის უკან, ვირუსის მეორე ტალღის დაწყებისას ნაკლები ხალხი იყო. მიუხედავად ამისა, ახლა ჩვეულებრივად დადიან. ვერ ვიტყვი, რომ წინა წლის ანალოგიურ პერიოდთან შედარებით დიდი სხვაობაა. დაახლოებით იგივე დატვირთვით ვმუშაობთ. თუ მთავრობის მხრიდან დარბაზის დაკეტვაზე ოფიციალურად მოთხოვნა არ იქნება, ჩვენ არ ვაპირებთ სამუშაო პროცესის გაჩერებას. კარანტინის პერიოდშიცონლაინ ვმუშაობდით. ალბათ, ინფიცირებულების ზრდის შემთხვევაში იგივე სცენარი განვითარდება, თუმცა დიდი იმედი გვაქვს ეს საჭირო არ იქნება, რადგან საკმაოდ მტკივნეული პროცესია.“ - აღნიშნავს Worldclass-ის მარკეტინგისა და გაყიდვების დირექტორი ნინო ხუროძე
რაც შეეხება პრემიუმ კლასის კატეგორიაში კონკურენტად snap-ის დამატებას, Worldclass-ში მიიჩნევენ, რომ მათი საერთაშორისო ბრენდის უპირატესობებში დარწმუნებულები არიან და კონკურენციის შიშის საფუძველი არ არსებობს.
„ჩვენ მეგობრული ურთიერთობა გვაქვს Snap-თან და მხოლოდ მივესალმებით ამ სიახლეს. „ოქტოპუსის“ პრემიუმ კლასის დარბაზიც გაიხსნა, მაგრამ ჩვენი მომხმარებლის გადინება არ მომხდარა. ჩვენ ვყავს ჩვენი მომხმარებელი, რომელიც ყოველდღიურად იზრდება. უპირატესობები რაც ჩვენ გვაქვს, ყოველთვის იქნება - ეს არის ჩვენი პერსონალი, თანამშრომლები, პროფესიონალთა გუნდი. ჩვენ საერთაშორისო ბრენდი ვართ და ძალიან დიდი სხვაობაა სხვა ფიტნეს კლუბებსა და ჩვენს შორის, რადგან მუდმივი სიახლეები გვაქვს და გვაქვს ის პლიუსები, რომლითაც დღესდღეობით Worldclass-ი გამოირჩევა სხვებისგან . ყოველდღიური დაკვირვება ამის თქმის საშუალებას მაძლევს“, — განმარტავს ნინო ხუროძე.
ანი ცარციძე