სპორტდარბაზებისა და სხვადასხვა სახის სპაცენტრების ფუნქციონირება შეიზღუდება,- ამის შესახებ საქართველოს პრემიერ-მინისტრმა, გიორგი გახარიამ მთავრობის ადმინისტრაციაში, საკოორდინაციო საბჭოს სხდომის შემდეგ განაცხადა.
COVID-19 გავრცელების მაქსიმალური პრევენციის მიზნით, მუშაობდა, დროებით შეიწყვიტა „World Class“-მა. ფიტნეს ცენტრის მარკეტინგის დირექტორი ნინი ხუროძე აცხადებს, რომ აღნიშნული გადაწყვეტილება „World Class“ ჯანდაცვის მსოფლიო ორგანიზაციისა და საქართველოს დაავადებათა კონტროლისა და საზოგადოებრივი ჯანმრთელობის ეროვნული ცენტრის რეკომენდაციების საფუძველზე მიიღო. შესაბამისად, ახალი კორონავირუსის (COVID-19) გავრცელების მაქსიმალური პრევენციის მიზნით, 17 მარტიდან დროებით შეწყვიტა მუშაობა. ნინი ხუროძე ამბობს, რომ პერსონალისთვის შრომის ანაზღაურება ჩვეულებრივად მოხდება, მიუხედავად იმისა, რომ „World Class“-მა არ იცის რა პერიოდით იხურება, თანამშრომლები ფიქსირებულ ხელფასს მაინც მიიღებენ. მისივე თქმით, ფიტნეს ცენტრი მნიშვნელოვან ეკონომიკურ დარტყმას მიიღებს, რადგან ფიტნესის გარდა, „World Class“ დამატებითი სერვისებიც აქვს, საიდანაც დამატებით შემოსავალი იღებს.
„ახალი კორონავირუსის საქართველოში დაფიქსირების შემდეგ პრევენციული ზომები მივიღეთ. ბიუროსთან სულ ხაზზე ვიყავით, მათგან რეკომენდაციებს ვიღებდით და რაც შეიძლებოდა გაკეთებულიყო მაქსიმალურად ვცდილობდით ყველაფერს ვაკეთებდით. სწორედ ამიტომ ვაგრძელებდით იმ პერიოდში მუშაობას, ავიღეთ ჩვენს თავზე ის პასუხისმგებლობა, რომ იმ ხალხს რომელთაც ჰქონდათ საწევრო, მოვმსახურებოდით. როდესაც დავინახეთ საფრთხე, მივიღეთ გადაწყვეტილება მუშაობა შეგვეწყვიტა. არ ვიცით, როგორ განვითარდება მოვლენები, თუმცა, ჩვენი გათვლით აპრილის დასაწყისამდე თუ ყველაფერი რიგზე იქნება „World Class“ მუშაობას აპრილის პირველ რიცხვებში განაახლებს. ყველა კლუბის წევრს საწევრო უფასოდ განუახლდება“- აცხადებს ნინი ხუროძე.
კლუბის მუშაობის დროებით შეჩერების მიუხედავად, „World Class“ არ ჩერდება და მის მომხმარებელს ყველა ნორმის დაცვით სუფთა ჰაერზე ვარჯიშს სთავაზობს:
„ვაპირებთ, რომ კლუბის წევრებს ონლაინ ვარჯიშები შევთავაზოთ, ასევე სუფთა ჰაერზე თუ იქნება იმის საშუალება რომ სახლიდან გავიდეთ. ჩვენ გვაქვს სავარჯიშო კონტეინერი,რომელიც technogym-ის მოწყობილობებითაა აღჭურვილი და შეგვიძლია ადამიანები ღია ცის ქვეშ ვავარჯიშოთ. ეს განხორციელდება იმის მიხედვით, თუ რას გადაწყვეტს თვითონ მოვარჯიშე, თუ ექნება სურვილი ჩვენ ამის შესაძლებლობას მივცემთ“, - განაცხადა ნინი ხუროძემ.
„World Class“ - ის მსგავსად მუშაობას წყვეტს „ოკტოპუს - ფიტნეს კლუბი“. როგორც კლუბის დირექტორმა გიორგი ცუცქირიძემ „კომერსანტს“ განუცხადა ფიტნეს კლუბებისთვის ეს ყველაზე მძიმე პერიოდია და სახელმწიფოსა და ბანკებისგან შეღავათების მოლოდინი აქვს.
„მიუხედავად იმისა, რომ ბოლო პერიოდის განმავლობაში საკმაოდ რთული იყო ჩვენი ბიზნესის ოპერირება, ჩვენ მაქსიმალურად ყველა ზომა მივიღეთ, რომ მსოფლიო ჯანდაცვის ორგანიზაციის რეკომენდაციები დაგვეცვა. ჩვენ რამდენიმე დღის წინ გადავწყვიტეთ, რომ დაგვეკეტა ფილიალები, ყველა კლიენტს დავუპაუზეთ თავიანთი ანგარიშები და გადაუანგარიშდებათ ხელახლა გახსნის შემდეგ. ეს გადაწყვეტილება ჩვენი თანამშრომლების და მათი ოჯახებისა და კლიენტების მდგომარეობის გათვალისწინებით მივიღეთ. ჩვენ ახლა ფინანსურად მძიმე სიტუაციაში ვართ, რადგანაც ეს სეზონი ფიტნეს-კლუბებისთვის ფინანსური ხერხემალია. გაზაფხულზე ყველაზე დიდი მოხთოვნაა ფიტნეს ცენტრებზე და ამ შემოსავლებით ვახერხებთ დანარჩენი ჩავარდნილი სეზონების ანაზღაურებას. ვეცდებით ეს მდგომარეობა არ აისახოს თანამშრომლების ანაზღაურებაზე, გვაქვს მოლაპარაკებები ბანკთან შეღავათებზე და დიდი იმედი გვაქვს, რომ სახელმწიფოსგანაც იქნება შეღავათები გადასახადების კუთხით. შესაბამისად შევეცდებით, რომ ჩვენი თანამშრომლები არ დაზარალდნენ ამ გარეშე ფაქტორების გამო.“ - ამბობს „ოკტოპუს - ფიტნეს კლუბის“ დირექტორი გიორგი ასათიანი.
ბაჩო ადამია
მარიამ მორგოშია