„ისეთი ბიზნესგარემო რაც დღეს საქართველოშია, აქამდე არ ყოფილა. ბიზნესს აქვს თავისუფლება, რომ მოწყობილი ინფრასტრუქტურის პირობებში წლების წინ მიუვალ ადგილებშიც კი დაიწყოს სამეწარმეო თუ სასტუმროს საქმიანობა„-ასე აფასებს დეველოპერული კომპანია „ჯიდიჯი ჯგუფის“ დამფუძნებლის ბეჟან წაქაძე NDI-ს კვლევის შედეგებს, რომლის მიხედვითაც ფინანსთა სამინისტროს საქმიანობას გამოკითხულთა უმეტესობა ნეგატიურად აფასებს.
გამოკითხვის შედეგების მიხედვით, კითხვაზე, როგორ შეაფასებდით ფინანსთა სამინისტროს საქმიანობას, გამოკითხულთა 39% პასუხობს, რომ ცუდად, 29% პასუხობს, უწყების საქმიანობას კარგად - 8% აფასებს; ხოლო 24%-მა არ იცის კითხვაზე პასუხი.
NDI— კვლევის მიხედვით 53% მიიჩნევს, რომ ქვეყანა არასწორი მიმართულებით ვითარდება, 19%-ის აზრით, სწორი მიმართულებით, ხოლო 24% მიიჩნევს, რომ არ იცვლება.
„ფინანსთა სამინისტროს საქმიანობის დადებით თუ უარყოფით ასპექტებზე მოსაზრება ბიზნესმენებს უნდა ჰკითხოს მკვლევარმა, რომელსაც მასთან აქვს ურთიერთობა. თითქმის 20 წელია ბიზნესის სექტორში ვარ და ბევრი ფინანსთა მინისტრის საქმიანობისთვის მიდევნებია თვალი. ასეთი ბიზნესგარემო, რაც დღეს არის, აქამდე არ ყოფილა. ადრე საგადასახადო ინსპექცია შედიოდა ორგანიზაციებში და პროკურატურა წყვეტდა ვისთვის რა ოდენობის ფული უნდა წაერთმიათ ისე, რომ არც იყვნენ ვინმეს წინაშე ანგარიშვალდებული. ეს პრეცედენტი ფინანსთა სამინისტრომ აღმოფხვრა. საგადასახადო სისტემა ასრულებს თავის ფუნქციას, სხვა მხრივ, კანონის მიღმა არავითარი ზეწოლა და ქვედინებები არ არსებობს. რაც შეეხება ჩემს კომპანიებს და ჩემს სფეროში მომუშავე ბევრი კომპანიის მაგალითზე, მე ფინანსთა სამინისტროს საქმიანობას დადებითად ვაფასებ. ძალიან მნიშვნელოვანია, რომ ინფრასტრუქტურული პროექტები კეთდება და ეს ხელს უწყობს ბიზნესის განვითარებას. წლების წინ ვერ წარმომედგინა, რომ ვანში სასტუმროს მშენებლობას გადავწყვეტდი, მაგრამ მას შემდეგ რაც ვანი ტურისტულად მოეწყო და მილიონები დაიხარჯა მუზეუმებისა, თუ სხვა ობიექტების აშენებაზე, ჩვენი კომპანიის 45 ნომრიანი სასტუმრო ვანში უკვე საბოლოო ეტაპებს გადის. სახელმწიფომ უნდა შექმნას გარემო, რომ ზედმეტი ზეწოლა და წნეხი არ იყოს ბიზნესზე, ესენი ამას ახორციელებენ.“ - ამბობს ბიზნესმენი.
ბიზნესმენ ლაშა პაპაშვილის განცხადებით, ფინანსთა სამინისტროს საქმიანობაში ხარვეზები არის, მაგრამ ბევრი კარგიც კეთდება. „ასე ცალსახად ვერ შევაფასებთ ამ უწყებას. საერთო ჯამში, გარემოს მე ნორმალურად შევაფასებდი. არ არის ბიზნესის ისეთი დევნა, როგორიც მე მახსოვს. რაც შეეეხება სასამართლოს, NDI-ს კვლევის შედეგებს ვეთანხმები, რადგან სასამართლო ცუდად მუშაობს, დავების გაჭიანურებას და არასწორ გადაწყვეტილებებს ვგულისხმობ, რომლებიც შეუსაბამოა რეალობასთან.“
როგორც ლაშა პაპაშვილი აღნიშნავს,ბიზნესგარემო წინა წლებთან შედარებით გაუმჯობესებულია. მიუხედავას ამისა, ბიზნესმენი ფინანსთა სამინისტროს ზოგიერთი გადაწყვეტილების არამართებულობასაც უსვამს ხაზს, როგორებიცაა „ოქროს სიის“ გაუქმება და რძის პროდუქტების დღგ-სგან არ გათავისუფლება.
„ძირითადი მინუსები რაც მახსენდება, რძის პროდუქტების დღგ-სგან გათავისუფლების მოთხოვნას ეხება, რომელსაც მხარი არ დაუჭირა ფინანსთა სამინისტრომ. ასევე, ბიზნეს ასოციაცია არ ვეთანხმებით „ოქროს სიის“ გაუქმების გადაწყვეტილებას. სასტუმროების სეზონურად დაბეგვრასაც ვითხოვთ წლებია, თუმცა ეს მთავრობის პრეროგატივაა. თუ პრინციპული პოლიტიკა არ ჩამოყალიბდა ამ საკითხზე, ადგილობრივ თვითმმართველობებს ვერც წარმოუდგენია, რომ შეიძლება ამაზე თავისი აზრი გამოთქვას. რაც შეეხება იმას, რომ 19 პროცენტს მიაჩნია, რომ ქვეყანა არასწორი მიამრთულებით ვითარდება, მე ვიტყოდი, რომ 50 პროცენტი კარგიც ხდება და 50 პროცენტი ცუდი პროცესებიც სახეზეა. “ - ამბობს ლაშა პაპაშვილი.
ეროვნულ დემოკრატიული ინსტიტუტის (ND) მიერ ჩატარებული კვლევის საველე სამუშაოები 2019 წლის 19 ნოემბრიდან 13 დეკემბრის ჩათვლით მიმდინარეობდა. კვლევის ფარგლებში სულ გამოიკითხა 2 180 ადამიანი. საშუალო ცდომილების ზღვარი 1,9%-ია.
მარიამ მორგოშია