ბრიტანეთის კონსერვატიული პარტიის ერთ-ერთი უმსხვილესი დონორის მეუღლე კრემლთან დაკავშირებული რუსი ბიზნესმენისგან დაფინანსებას იღებდა. ეს დონორი - რუსული წარმოშობის ბრიტანეთის მოქალაქე ლუბოვ ჩერნუხინაა, რომლის გვარიც საეჭვოდ ემთხვევა ახლო წარსულში რუსეთის ფინანსთა მინისტრის მოადგილის გვარს.
არსებული ინფორმაციის თანახმად, ეს რუსი მილიარდერია პუტინის კარის ოლიგარქი სულეიმან კერიმოვი, რომელიც ამერიკული სანქციების ქვეშაა.
პირველმა ეჭვები ამასთან დაკავშირებით ბი-ბი-სი-მ გამოთქვა, რომელმაც საბანკო წრეებში გაჟონვის შედეგად 2500 საეჭვო ფინანსური ტრანზაქციის შესახებ ინფორმაცია მიიღო.
საქმეში ასევე რუსეთის ფინანსთა მინისტრის ყოფილი მოადგილე ვლადიმერ ჩერნუხინი ფიგურირებს.
თუმცა, თავად ჩერნუხინი, რომელიც ბრიტანელი დონორის ძმა აღმოჩნდა, ყველა ბრალდებას უარყოფს, სულეიმან კერიმოვის ადვოკატმა კი განაცხადა, რომ არავითარი შეხება მათთან არ ჰქონდა.
2012 წლიდან ლუბოვ ჩერნუხინამ ბრიტანეთის კონსერვატიულ პარტიას 1,7 მლნ. ფუნტი გადაურიცხა, ქვეყნის 3 პრემიერ-მინისტრთან, მათ შორის ბორის ჯონსონთან სურათები გადაიღო, 160 000 ფუნტი კი ჯონსონთან და მის ერთ-ერთი წინამორბედთან დევიდ კემერონთან ჩოგნბურთს თამაშისთვის გადაიხადა.
კერიმოვი რუსეთის ყველაზე მდიდარი ადამიანია. მისი ქონება 25 მლრდ. დოლარს შეადგენს, 2008 წელს ის რუსეთის პარლამენტის დეპუტატი იყო, 2018 წელს კი ის ამერიკული სანქციების ერთ-ერთი ობიექტი გახდა.
ბრიტანელ კონსერვატორებს რუსული ფულის საკითხი სერიოზულად აწუხებთ, განსაკუთრებით, მთავარი კონსერვატორის, ბრიტანეთის პრემიერ-მინისტრის ბორის ჯონსონის რუსეთის მიმართ მკაცრი მიდგომის გათვალისწინებით.
ისინი შიშობენ, რომ გაჟღერებული ინფორმაცია მხოლოდ აისბერგის ზედა ნაწილია. რუსებს ბევრი ფული აქვთ, ბრიტანელ პოლიტიკოსებს კი ცოტა. სავარაუდოდ, მოსყიდვის ფაქტები მეტია, ვიდრე ეს გარედან ჩანს.
ბრიტანეთის კონსერვატიული პარტიის პრეს-მდივანი კი მიიჩნევს, რომ არაფერი განსაკუთრებული არ ხდება.
„ჩვენთან ბევრი რუსია, რომელიც ბრიტანულ პასპორტს ფლობს და მათ შემოწირულობებს გაკეთების სრული უფლება აქვთ. მათ შორის ბევრი პუტინის ღია კრიტიკოსი იყო, ამიტომაც არასწორია მათი დისკრიმინაცია და ერთ ქვაბში მოხარშვა“ - მიიჩნევს ის.
Financial Times