როდესაც ჰოუპ ეილსი ავსტრალიის ქალაქ სიდნეიში მდებარე ლუქს-კლასის სასტუმროში 14-დღიანი კარანტინის გასატარებლად დარეგისტრირდა, ძალიან მალე ნათელი გახდა, რომ შვებულების მსგავსი იქ არაფერი იქნებოდა.
"ჩვენ ნომრების დატოვების უფლება არ გვქონდა" - განაცხადა ეილსმა, რომელიც აპრილში სამშობლოში ფილიპინებიდან დაბრუნდა, და იმავე წუთს იზოლაციაში მოხვდა - ავსტრალიამ კორონავისურთან დაკავშირებით კარანტინი ერთ-ერთმა პირველმა გამოაცხადა.
"ფანჯრები არ იღებოდა, შესაბამისად, სუფთა ჰაერთან წვდომაც პრობლემა იყო. ყოველ სართულზე 2 პოლიციელი მორიგეობდა, და თუ კარს გავაღებდით, ისინი დაკეტვას გვთხოვდნენ. თანაც, მე მწეველი ვარ, და ეს დიდი პრობლემა იყო სრულიად ჩაკეტილ ოთახში, სადაც ფანჯრებსაც კი ვერ გააღებდი" - ამბობს ის.
საკუთარმა გამოცდილებამ ის დაარწმუნა, რომ 2-კვირიანი შიდაპატიმრობა, თუნდაც ლუქს-სასტუმროში, ადამიანის ფსიქიკაზე ძალიან მძიმედ მოქმედებს.
ჩვენს ისტორიაში უნიკალური მომენტის მოწმეები ვართ. მოსახლეობის ასეთი დიდი პროცენტი აქამდე კარანტინში არასდროს ყოფილა. თუმცა, შეზღუდვებით სავსე ახალ სამყაროს ასევე სერიოზული პრობლემები მოაქვს - უფლებადაცვითი ორგანიზაციები მიიჩნევენ, რომ ზოგიერთი მთავრობები კარანტინს რეპრესიებისთვის და თავისუფლებების ჩასახშობად იყენებენ.
თუმცა, თავიდანვე გასაგები იყო, რომ საერთაშორისო კოორდინაცია ამ საკითხში მინიმალური იქნება - ევროპაში, მათ შორის კორონავირუსისგან განსაკუთრებით დაზარალებული ქვეყნები, მაგალითად, იტალია და ესპანეთი, შეზღუდვებს არბილებენ, რადგანაც მათთვის სასიცოცხლოდ მნიშვნელოვანი ტურისტული სეზონი მოდის.
ამავე დროს ბრიტანეთი პირიქით, ზომებს ამკაცრებს - ლონდონი დიდი ხნის მანძილზე კარანტინის შემოღებას ეწინაამღდეგებოდა, და ბოლომდე ნორმალური ცხოვრების შენარჩუნებას ცდილობდა.
ახლა კი, როდესაც ევროპის დიდი ნაწილი შეზღუდვებს ხსნის, ბრიტანეთში პირიქით - გამკაცრება მიდის - 8 ივნისიდან ქვეყანაში ყველა ჩამოსულ ადამიანს 14-დღიანი კარანტინის გავლა მოუწევს.
გადაწყვეტილებას ტურისტული ინდუსტრიის აღშფოთება გამოიწვია.
"ჩვენ შეწუხებულები ვართ დამატებითი შეზღუდვების შემოღებით, რადგანაც ის ჯერ ერთი ტურისტული სექტორის აღდგენას მნიშვნელოვნად შეაფერხებს, მეორეც - სხვა ქვეყნების მიერ ბრიტანეთის მოქალაქეების მიმართ საპასუხო შეზღუდვების მიზეზი გახდება" - მიიჩნევენ ტურისტული ინდუსტრიის წარმომადგენლები.
ტურიზმზე სასიცოცხლოდ დამოკიდებული ქვეყნები ე.წ. "ტურისტული დერეფნების" შექმნის გზით მიდიან, და იმედოვნებენ, რომ ეს მათ კომაში ჩავარდნილი ტურისტული სექტორის მინიმალური ეპიდემიოლოგიური რისკით გაცოცხლების საშუალებას მისცემს.
მაგალითად, ასეთი დერეფნის შექმნაზე მუშაობენ ავსტრალია და ახალი ზელანდია, ასევე ისრაელი, საბერძნეთი და კვიპროსი.
სხვა ქვეყნებიც ასევე ტურისტების მოზიდვას და საზოგადოებრივი ჯანმთელობის შენარჩუნებას შორის მყიფე ბალანსის დაცვას ცდილობენ - ჩამომსვლელებს აეროპორტებში სიცხეს გაუზომავენ და კორონავირუსზე ტესტებს ჩაუტარებენ, მათგან ჯანმთელობის მდგომარეობის ცნობის წარდგენას მოითხოვენ, და ა.შ.
არაერთგვაროვანია ვითარება ჩინეთში, სადაც სხვადასხვა ადგილებში სიტუაციაც სხვადასხვანაირია - შიდა გადაადგილება ნებადართულია, თუმცა, საკმაოდ შეზღუდულია, განსაკუთრებით სამხრეთის რამდენიმე რეგიონში, სადაც ეპიდემიის ახალი კერა დაფიქსირდა.
გამოდის რომ ჩინეთი, რომელმაც დარტყმა პირველმა მიიღო და უმკაცრეს ზომებს მიმართა, ამის მიუხედავად, ნორმალურ ცხოვრებას დღემდე ვერ დაუბრუნდა.
ჯერ გაურკვეველია ვაქცინის ან წამლის გამოჩენის პერსპექტივა, ამიტომაც სანახევრო გადაწყვეტილებები ტურისტულ ინდუსტრიას ვერაფერს უშველის და დღევანდელი სიტუაცია კიდევ დიდხანს გაგრძელდება.
კარანტინი
