21 იანვარს ფეხბურთის ისტორიაში პირველადად მოედანზე ახალი ელემენტი გამოჩნდა. პორტუგალიაში გამართულ მატჩზე ოფიციალურმა მსაჯმა პირველად აჩვენა თეთრი ბარათი.

ტრადიციულად  მსაჯებს  თავიანთ არსენალში ორი ფერის ბარათი აქვთ: ყვითელი (გამოიყენება გაფრთხილებისთვის) და წითელი (გამოიყენება მოთამაშის საბოლოო გაძევებისთვის).  ასე რომ, ბევრისთვის მოულოდნელი იყო, როდესაც ქალთა ჩემპიონატზე „სპორტინგისა“ და „ბენფიკას“ მატჩის დროს, რომელშიც „ბენფიკამ“ 5-0 მოიგო, მსაჯმა თეთრი ბარათი გამოიყენა.

რას ნიშნავს თეთრი ბარათი?

თეთრ ბარათს ასევე უწოდებენ „პატიოსანი თამაშის ბარათს“, ის შემოღებულია პორტუგალიის ფეხბურთის ფედერაციის მიერ და მიზნად ისახავს სპორტული ოსტატობის ხელშეწყობას. ამ ბარათით ხდება მოედანზე პოზიტიური ქცევისთვის დაჯილდოება.

ბარათი პირველად მატჩზე შესვენებამდე ცოტა ხნით ადრე აჩვენეს. მსაჯმა კატარინა კამპოსმა ის გამოიყენა სამედიცინო მუშაკების სწრაფი მოქმედების აღსანიშნავად მას შემდეგ, რაც მედიკოსები ტრიბუნაზე შეუძლოდ მყოფ გულშემატკივარს დაეხმარნენ.

ჯერჯერობით თეთრი ბარათი მხოლოდ პორტუგალიის ფეხბურთის ფედერაციის მიერ გამოიყენება. წარსულში იტალიის სერია B -ში გამოჩნდა მწვანე ბარათი: ის გამოიყენებოდა 2018 წლის კონიფას მსოფლიო ჩემპიონატის დროს, რომელიც საერთაშორისო ტურნირია იმ ქვეყნებისთვის და არაღიარებული ტერიტორიებისთვის, რომლებიც ფიფას შემადგენლობაში არ შედიან.

ამ ჩემპიონატში მწვანე ბარათები აჩვენეს ისეთ დარღვევებზე, რაც ითვლებოდა ყვითელ და წითელ ბარათებს შორის შუალედურ დარღვევად. როდესაც მოთამაშე იღებდა მწვანე ბარათს, მას დაუყოვნებლივ უნდა დაეტოვებინა მოედანი, მაგრამ შეიძლებოდა მისი შეცვლა, თუ გუნდს ცვლილებების რესურსი მთლიანად არ ჰქონდა დახარჯული.