ყურძნის დაბალ ფასსა და ძვირ მუშახელს მევენახეები წლევანდელი სეზონის მთავარ პრობლემად მიიჩნევენ. მათი ინფორმაციით, მიუხედავად იმისა, რომ რეალიზაციის პრობლემა არ არის და დასეტყვილი ყურძენიც კი გაუყიდავი არ რჩება, ხარჯი გაზრდილია, ხოლო დაბალი ფასის გამო მოგება მინიმალურია.
თელავის მუნიციპალიტეტის მკვიდრი, მევენახე ვანო გიგიტელაშვილი ,,კომერსანტთან“ ამბობს, რომ ყურძნის ფასი გაცილებით მეტი უნდა იყოს, რომ ფერმერმა საკუთარი შემოსავლისგან მოგება მიიღოს.
,,კარგია, რომ ყურძნის ჩაბარების პრობლემა არ არის, დასეტყვილი მოსავალიც ჩააბარა ხალხმა. მიმაჩნია, რომ 1 კილოგრამი ყურძენი, სულ მცირე, 1 ლარი უნდა ღიორდეს, ,,საფერავის“ კი 2 ლარზე ნაკლები არ უნდა იყოს. ეს მინიმალური ფასი იმისთვის, რომ მოსახლეობა არ დაზარალდეს. რა ფასიც ახლა არის, ზარალი არ გვაქვს, მაგრამ ვერც სარგებელს ვიღებთ. ცალკე პრობლემაა მუშა ხელი, 40-50 ლარს ვიხდით და მომუშავეთა აყვანა მაინც გვიჭირს“, - ამბობს ვანო გიგიტელაშვილი.
თუმცა არიან ფერმერები, რომლებიც ფასით და რთველთან დაკავშირებული სხვა პროცესებით კმაყოფილი არიან. კახელი მევენახის გოგა ქურციკაშვილის თქმით, რთველი საკმაოდ წარმატებით დაიწყო და თუკი ქარხნების მხრიდან ვალდებულებები სრულად შესრულება, პრობლემა სექტორში ნაკლებად მოსალოდნელია.
,,ყველაფერი ნორმის ფარგლებშია, საკმაოდ კარგად დაიწყო წლევანდელი სეზონი და დადებით დინამიკას ვინარჩუნებთ. სულ ახლახან მევენახეებმა თელავის ერთ-ერთ ღვინის ქარხანას საშამპანურე, საშუალო ხარისხის ყურზენი 95 თეთრად ჩააბარეს. ვფიქრობ, მისაღები ფასია, ამ წუთისთვის ეს არის საშამპანურე მასალა, ,,რქაწითელი“, რომლის შაქრიანობა 18 გრადუსია. ამ დონის შაქრიანობა ღვინისთვის დაბალია, მაგრამ შამპანიურის საწარმოებლად - კარგი. ამიტომ სჯობს, საღვინე ყურძენი ღრმა სიმწიფეში დაიკრიფოს, დაახლოებით 15-20 სექტემბერს, ამ დროს შაქრის კონცენტრაცია 23 გრადუსამდეა“, - უთხრა მევენახემ ,,კომერსანტს“.
ღვინის ეროვნული სააგენტოს მონაცემებით, 6 სექტემბრის მდგომარეობით, კახეთში გასულ წელთან შედარებით 6-ჯერ მეტი ყურძენია გადამუშავებული, ჯამში 47 ათასი ტონა. 2020 წლის 6 სექტემბერს ეს მაჩვენებელი 8 ათას ტონას შეადგენდა.
რთველი 2021-ის ფარგლებში მოსავალი ღვინის საწარმოებს 4 100-ზე მეტმა მევენახემ ჩააბარა, მათი შემოსავალი 45 მლნ ლარს აღწევს.კახეთში ნასეტყვი ყურძნის დაბინავდება დღეს სრულდება - 26 აგვისტოს შემდეგ გადამუშავებულია 15 ათას ტონამდე ნასეტყვი ყურძენი.კონდიციური ყურძნის მოსავლის დაბინავება კახეთში ტრადიციულად დედოფლისწყაროსა და სიღნაღიდან დაიწყო, მიმდინარე კვირიდან კი რეგიონის სხვა მუნიციპალიტეტებში აქტიურად გაგრძელდება.
მარი ჩიტაია