ქართულ სარესტორნო ბაზარზე ახალი ბრენდი „ფელამუშიტო“ გამოჩნდა, რომელიც თბილისში ქართული კულინარიული ექსპერიმენტის შედეგად მიღებული ქართული დესერტების ბარს ხსნის.

კაფე-ბარი „ფელამუშიტო“ თბილისში, აგვისტოს დასაწყისში გაიხსნება და მისული სტუმრები ძველი ქართული დესერტების მოდერნიზებული ვერსიების დაგემოვნებას შეძლებენ.

„კომერსანტთან“ საუბრისას „ფელამუშიტოს“ დამფუძნებელმა და იდეის ავტორმა ნინო გოგალაძემ აღნიშნა, რომ  ბრენდის მთავარი პროდუქტი ცხელი ფელამუშია, ხოლო მისი სხვადასხვა ვარიაციები კვების ტექნოლოგების დახმარებით შეიქმნა.

 „ გადავწყვიტე ისეთი ახალი დესერტი შემექმნა, რომელიც განსხვავებული და ინოვაციური იქნებოდა. თავიდანვე გათვლილი მქონდა, რომ ეს ბიზნესად მექცია. ქართული ტრადიციული სამზარეულო ზოგადად მდიდარია დესერტებით. გადავწყვიტე ამეღო ძველი ქართული დესერტები და სხვადასხვა არომატების დამატებით ახალი სიცოცხლე შემეძინა მისთვის. გამომდინარე იქედან, რომ კულინარიისგან ცოტა შორს ვარ, კვების ტექნოლოგი მჭირდებოდა. გამაცნეს სალომე გიგაშვილი, რომელიც ამჟამად ჩემი პარტნიორია და ვთხოვე ჩემი იდეა განეხორციელებინა. „ - აღნიშნავს ნინო გოგალაძე

გლინტვეინის პუდინგი და ფელამუში, ფელამუშიტო მექსიკური ჩიას პუდინგით, გოზინაყიტო —  სხვადასხვა არომატების დესერტების მომხმარებლისთვის მიწოდება სპეციალურად „ფელამუშიტოსთვის“ შექმნილი აპარატით მოხდება.

 „ფელამუშის მოყვარულებს არ აქვთ იმის ფუფუნება, რომ სადმე ახალი გაკეთებული ცხელი ფელამუში დააგემოვნონ. მინდოდა შეგვექმნა აპარატი, სადაც მუდმივად თბილ მდგომარეობაში იქნებოდა პროდუქტი ისე, რომ არ დაეკარგა კონსისტენცია. დიდი სირთულეების მიუხედავად ფიზიკოსებისა და ტექნოლოგების დახმარებით თურქეთში სპეციალურად „ფელამუშიტოსთვის“ შევქმენით აპარატი, რომლის მეშვეობითაც ცხელი ფელამუშის მოყვარულებს მუდმივად თბილ მდგომარეობაში დახვდებათ საყვარელი დესერტი.“ - განმარტავს იდეის ავტორი. 

გარდა ტექნოლოგიური სირთულეებისა, ახლადშექმნილ სტარტაპზე პანდემიამაც იმოქმედა, რადგან ბარის გახსნა შედარებით ადრე იგეგმებოდა. 

 „ჩვენი პროდუქტის აბსოლუტურად ყველა ინგრედიენტი ნატურალურია და საკმაოდ ძვირი სიამოვნებაა. მიუხედავად ამისა, მინდოდა ყველას დაეგემოვნებინა. შესაბამისად გადავწყვიტე ის ფასი დამეტოვებინა, რაც თავიდანვე გათვალისწინებული იყო და ყველასთვის ხელმისაწვდომი ყოფილიყო.

 ჩემი იდეაფიქსი სწორედ ის არის, რომ მსოფლიოს გავაცნოთ ქართული დესერტები და საზღვრებს გარეთ გავიტანოთ. ასევე საქართველოს მასშტაბითაც ახალი ფილიალების გახსნა იგეგმება. გარდა ამისა „ფელამუშიტოში“ მხოლოდ ფელამუში არ არის. ჩვენ ზოგადად ძველი ქართული ტრადიციული დესერტების მოდერნიზებას ვაკეთებთ. გვაქვს ასევე „გოზინაყიტო“, რომელიც სრულიად განსხვავებული გემოთია წარმოდგენილი.“ - განაცხადა ნინო გოგალაძემ.

ამ ეტაპზე კომპანიაში 9 ადამიანია დასაქმებული, თუმცა სამომავლოდ მისი გაფართოება და საქართველოს მასშტაბით ახალი ფილიალების დამატება იგეგმება. ამასთან, ფელამუშის დესერტების საზღვარგარეთ გატანაც იგეგმება.

ანი ცარციძე