ფასები კიდევ გაიზრდება, ქვეყანაში ყველაზე რთული პერიოდი იწყება

ფასები კიდევ გაიზრდება, ქვეყანაში ყველაზე რთული პერიოდი იწყება

access_time2019-11-20 20:45:59

საქართველოს მოსახლეობას, 7%-იანი ინფლაციის პირობებში, ცხოვრება გაუძვირდა. ზამთრის წინ მოსახლეობა მზადებას იწყებს იმ წნეხისთვის, რაც იანვრის, თებერვლისა და მარტის თვეებში უნდა განიცადონ. გამომდინარე იქიდან, რომ საქართველო იმპორტზე დამოკიდებული ქვეყანაა, ზამთარიც უფრო რთულად გადასატანია.  წელს მოსახლეობას ურთულესი თვეების გადატანა მოუწევს.

 

პროდუქტის დეფიციტის პრობლემა დეკემბერ-იანვარში ნაკლებადაა, რადგან ამ დროს ქვეყანაში ადგილობრივი ნაწარმი ხელმისაწვდომია, თუმცა იგივეს ვერ ვიტყვით თებერვალსა და მარტზე, როცა განსაკუთრებით მკვეთრად იმატებს იმპორტი. სწორედ მაშინ ინფლაციის წნეხს თითოეული ადამიანი  ყველაზე მეტად გრძნობს.

 

საქართველოში ცხოვრება გაუსაძლისი ხდება. მოსახლეობის ისეთი ფენისთვის, რომლებიც დაბალანაზღაურებად სამსახურებში მუშაობენ ან საერთოდ არ მუშაობენ, მნიშვნელოვანია თითოეული ლარის ისე გახარჯვა, რომ თვიდან თვემდე თავის გატანა შეძლონ. გამოკითხულთა უმრავლესობა ამბობს, რომ ინფლაციამ  თითქმის ყველა სახის პროდუქტსა და მომსახურებაზე ფასის მატება გამოიწვია. გაძვირებული ცხოვრების პირობებში მოსახლეობა, ძირითადად, პირველადი მოთხოვნილების დაკმაყოფილებით შემოიფარგლება და სხვა მიმართულებით თანხას ვეღარ ხარჯავენ.

 

ქუთაისში მცხოვრები 23 წლის ელენე ხარაბაძე ამბობს, რომ ყველაფერი გაძვირდა ხელფასი კი იგივე რჩება. თუკი ადრე რაიმე შენაძენის გაკეთებისას 10- 15 ლარი საკმარისი იყო,  ახლა 20- 25 ლარია საჭირო.

 

„ამჟამინდელი ფასი ნამდვილად მაღალია. ადრე თუ დღეში 10-15 ლარი მჭირდებოდა რაიმეს საყიდლად, ახლა 20-25 ლარია საჭირო. საკვები, წამლები ყველაფრის ფასი გაორმაგებულია, ხელფასი კი ისევ ის არის, რაც მანამდე. თუ ვინმეს შემოსავალი გაეზარდა, შედეგი მაინც ნულია, რადგან ფული ისევ საარსებოდ მნიშვნელოვან რაღაცებში ეხარჯება. ადრე თუ შეიძლებოდა ყოველ კვირას სალონში მოვწესრიგებულიყავი, ახლა თვეში ერთხელ ან ორჯერ ძლივს ვახერხებ", - განუცხადა ელენე ხარაბაძემ.

 

სურსათისა და უალკოჰოლო სასმელების გაძვირებამ ინფლაციის ზრდაზე ყველაზე მეტად იქონია გავლენა, საქართველოს სტატისტიკის ეროვნული სამსახურის ინფორმაციით, 2019 წლის ოქტომბერში საქართველოში ფასების საერთო დონე 6.9% - ით გაიზარდა. ცალკეული სასაქონლო ჯგუფის მიხედვით მდგომარეობა ასეთია: რძის ნაწარმი 16 %-ით გაძვირდა, ხორცი -  14,7%-ით, პური - 11%-ით, თამბაქო კი - 26%-ით.

 

არსებული რეალობის წინაშე ყველაზე დიდ საფრთხეში ის ადამიანები არიან, რომლებიც  მხოლოდ პენსიისა და სოციალური დახმარების ხარჯზე ცხოვრობენ ან თუნდაც ძალიან დაბალი შემოსავლი აქვთ. მათი ყოველი დღე იწყება საკვები პროდუქტის, წამლების, თვიდან თვემდე დასაფარი კომუნალური გადასახადის დაზოგვით და რეალურად მათი შემოსავალიც მეტი არაფრისთვის არის საკმარისი.

 

პენსიონერისა და აწ უკვე ემიგრანტის ნანა ქურდაძის შეხედულება საქართველოში არსებულ მდგომარეობაზე ასეთია:

 

"ქვეყანაში არ არსებობს ეკონომიკის განვითარების გზები, სხვა უფრო მნიშვნელოვან გეგმაზე ოცნებაც არ შეიძლება. არადა, სწორედ აქედან უნდა დაწყებულიყო ყველა მთავრობის პირველი დღე. როცა ადამიანთა დიდი ნაწილი სიღარიბის ზღვარზეა და წარმოდგენა არა გაქვს რა რესურსებით არსებობს შენი ქვეყანა, ამ დროს დღითი დღე ფასები იზრდება ყველა მიმართულებით.


 

დღევანდელი სიძვირის გამოისობით ელემენტარული არსებობის საშუალებაც კი არ აქვს მოსახლეობას. ცხადია, ჩემზეც ნეგატიურად აისახა ეს ყოველივე, მიზერული პენსიით თავის გატანა, უბრალოდ, შეუძლებელი გახდა. ამიტომ 69 წლის ასაკში მივიღე მტკიცე, მაგრამ სარისკო გადაწყვეტილება და წავედი საზღვარგარეთ სამუშაოდ, რათა ოჯახს შევხიდებოდი. აქ კიდევ რისი ატანა და გადატანა გვიხდება,  ეს კიდევ სხვა თემაა", - აღნიშნა  ნანა ქურდაძემ.

 

ქვეყანაში არსებული მძიმე სოციალური პირობების გამო სამომხმარებლო კალათაში საკვების წილი იზრდება, სხვა დანარჩენი კი ინდივიდუალური პრიორიტეტებიდან გამომდინარე, იკლებს. უმეტესობა აღნიშნავს, რომ ფასების მატება თვალში საცემია ყოველმხრივ და ვარაუდობენ, რომ ზამთრის პერიოდში კიდევ უფრო მძიმე მდგომარეობა შეიქმნება.

 

24 წლის, დასაქმებული და საშუალოზე მაღალი ანაზღაურების მქონე ახალგაზრდა ირაკლი მაკასარაშვილის შეხედულებით, საქართველო ზამთარში განსაკუთრებით დგება მასობრივი  სიძვირის წინაშე, რის გამოც დოლართან მიმართებით დღითი დღე ქედს ვიხრით.

 

„რაც შეეხება ამჟამინდელ მდგომარეობას, ნებისმიერი პროდუქტისა და სერვისის ფასი მაღალია საშუალო შემოსავლებთან შედარებით. დინამიკაში რომ წარმოვიდგინოთ, ყველა ასპექტში ანაზღაურების ხაზი ხარჯების ხაზის ქვეშ გადის. რამდენადაც იზრდება შემოსავლები, იმდენად იმატებს ფასიც და ბუნებრივია, ცხოვრებაც გაძვირდა. გამომდინარე იქიდან, რომ იმპორტზე დამოკიდებული ქვეყანა ვართ, დღითი დღე დოლართან მიმართებაშიც ქედს ვიხრით.

 

საშუალოზე მაღალი ხელფასი მაქვს და თითქმის სრულად მყოფნის ყველაფერში. დანაზოგსაც კი ჩავუყარე საფუძველი, მაგრამ ეს მხოლოდ იმიტომ, რომ ჩემ შემოსავალზე მხოლოდ მე ვარ დამოკიდებული და ოჯახის პირველადი მოხმარების ხარჯებს ნებაყოფლობით ვიღებ საკუთარ თავზე. მე რომ უფრო მეტი ვალდებულება მეკისრებოდეს ოჯახში, ალბათ საკმაოდ ბევრ რამეზე მომიწევდა უარის თქმა“, - განაცხადა ირაკლი მაკასარაშვილმა.

 

ხალხთან ერთად, სპეციალისტებიც სკეპტიკურად არიან განწყობილნი. მათი აზრით, არსებული მდგომარეობა ყველაზე მეტად ფიქსირებული შემოსავლის მქონე  კატეგორიას დააზარალებს, რადგან ხარჯების მეტი წილი უკვე მკვეთრად გაძვირებულ სასურსათო პროდუქტზე გადანაწილდებს და სხვა ღირებულს ვეღარაფერს შეიძენენ. სტატისტიკოსი სოსო არჩვაძემ აღნიშნა, რომ ხელისუფლება მოწყვლადი ფენის მიმართ განსაკუთრებით ყურადღება უნდა გამოიჩინოს.

 

„ამჟამინდელი ინფლაციის თავისებურება იმაშია, რომ ადგილი აქვს მკაფიოდ ჩამოყალიბებულ აგფლაციას, ანუ ყველაზე მეტად ფასები გაიზარდა სასურსათო, აგრარული წარმოების საქონელზე. აქ ორნიშნა ზრდას აქვს ადგილი, დაწყებული ნიორიდან, დამთავრებული საქონლის ხორცითა და პურპროდუქტებით. ამიტომ ეს ყოველივე უპირველესად დარტყმას აყენებს, რა თქმა უნდა, დაბალი და ფიქსირებული შემოსავლის მქონე მოსახლეობას.

 

სამწუხაროდ, საქართველოში საკმაოდ მაღალია საშემოსავლო  დიფერენცირება. თუ მოსახლეობას 10 თანაბარ ჯგუფად დავყობთ, განსხვავების კოეფიციენტი  ყველაზე მდიდარ 10%-სა და ყველაზე ღარიბ 10%-ს შორის დაახლოებით 17-18-ჯერადია, რაც თითქმის ორჯერ აღემატება დასაშვებ ზღვრულ ნორმას. პენსიონერთა საკმაოდ დიდი ნაწილი (93%) ოჯახების სხვა წევრებთან ერთად ცხოვრობს და სარგებლობენ ერთობლივი დოვლათის შიდა ოჯახური გადანაწილებით. მათ რომ ოჯახის წევრებიდან დახმარება არ ჰქონდეთ, სიტუაცია გაცილებით დრამატული იქნებოდა.

 

ჩვენ არა მარტო საბაზრო ეკონომიკაზე გარდამავალი ჯგუფი გადასული ქვეყანა ვართ, არამედ სოციალური პასუხისმგებლობის მქონე სახელმწიფოც. შესაბამისად, ხელისუფლების პოლიტიკა სოციალური მხარდაჭერის თანადგომისა და სოლიდარობის ნიშნით პრიორიტეტული უნდა იყოს“, - აღნიშნა სოსო არჩვაძემ.

 

ეკონომისტ ირაკლი მაკალათიას შეხედულებით ლარის გაუფასურება და ინფლაცია ერთმანეთთან უკვე მჭიდრო კავშირშია.

 

„ეს განსაკუთრებით ნავთობპროდუქტებზე  აისახა. ლარის გაუფასურება თუ კიდევ გაგრძელდა, ცხადია, ენერგოტარიფებსაც გაგვიძვირებს და საბოლოოდ კომუნალურ გადასახადებზეც აისახება. მთავარი საფრთხე მოდის სურსათისა და ჯანდაცვის ჯგუფიდან, განსაკუთრებით ზამთრის პერიოდში. როცა ჯანდაცვის ჯგუფზე იზრდება ხოლმე მოთხოვნა და იქ გაძვირებული ფასები ხვდებათ ადამიანებს, ცხადია ეს უარყოფითადაც აისახება. ლარის კურსის გაუფასურება და ინფლაცია ერთმანეთთან უკვე მჭიდრო კავშირშია იმიტომ, რომ იმპორტულ პროდუქტზე ვართ დამოკიდებულნი", - აღნიშნა მაკალათიამ.

 

საშუალო ფენის გაძლიერების პროცესი, არსებული ინფლაციის პირობებში, მიუღწეველი ხდება. თუმცა კატასტროფა არ გვემუქრება, - ასეთია სტატისტიკოს გივი მომცელიძის პროგნოზი, რომლის აზრითაც ქვეყანაში ძლიერი საშუალო ფენა ვერადავერ ჩამოყალიბდა.

 

„კატასტროფა ნამდვილად არ დაგვემუქრება, მაგრამ მუდმივად რთულ სოციალურ პირობებში ყოფნა, საშუალო ფენის გაძლიერებას ხელს შეუშლის, რაც ჩვენს ოცნებადაა ქცეული. სოციალური ფონის დამძიმება უფრო მეტ ადამიანს გადაისვრის სიღარიბეში. ჩვენ ისეთი რაღაცები გვაქვს გამოვლილი 1990-იან წლებში და 2000-იანების დასაწყისში, რომ კატასტროფული და კოლაფსური ვითარება არ შეიქმნება. მე პირადად მომხრე ვარ, რომ ვისაც  სერიოზულად უჭირს, მათ მიმართ მაქსიმალურად დაწესდეს რამე შეღავათები, თუნდაც ფულადი დახმარებებიც. ოღონდ სერიოზულად უნდა იყოს გამოკვლეული ვის სჭირდება დახმარება. რეალურად ვისაც უჭირს იმას უნდა დაეხმარონ“ , - აღნიშნა  გივი მომცელიძემ.

 

წყარო: რეზონანსი





ლარი მცირედით გაუფასურდა

ლარი მცირედით გაუფასურდა
access_time2021-08-03 18:00:52
3 აგვისტოს ვაჭრობის შედეგად ლარი აშშ დოლართან მიმართებაში 0.06 თეთრით 3.1048-მდე გაუფასურდა. Bloomberg-ის პლატფორმაზე კი დღის ბოლოს კურსი 3.1065-ზე დაფიქსირდა. დოლარის მსგავსად ლარი ასევე გაუფასურდა ევროსთან, 0.13 თეთრით 3.69.19-მდე, ბრიტანულ ფუნტთან 0.86 თეთრით 4.3247-მდე, თურქულ ლირასთან 0.17 თეთრით 0.3729-მდე, 100 რუსულ რუბლთან 0.55 თეთრით 4.2633-მდე, 1000 სომხურ დრამთან 2.92 თეთრით 6.3566-მდე, აზერბაიჯანულ მანათთან კი უმნიშვნელო 0.01 თეთრით 1.8265-მდე...

დღის TOP 10 მნიშვნელოვანი ამბავი

დღის TOP 10 მნიშვნელოვანი ამბავი
access_time2021-08-03 21:00:09
დღის TOP 10 მნიშვნელოვანი ამბავი:   1. ბიზნესმენების აზრი – იყო თუ არა გახარია „ბოლი“ პრემიერი? ბიზნესმენი დავით ბეგიაშვილი: „ბიზნესს გიორგი გახარიამ ვერანაირი სარგებელი ვერ მოუტანა. ჯერ კიდევ ბიზნესომბუდსმენის პოსტზე, მას სექტორის სასარგებლად ფაქტობრივად არაფერი გაუკეთებია“.   2. ინფლაცია 10–წლიან...

კულუმბეგოვი შეზღუდვების, მათ შორის კომენდანტის საათის შემოღებას ითხოვს

კულუმბეგოვი შეზღუდვების, მათ შორის კომენდანტის საათის შემოღებას ითხოვს
access_time2021-08-03 16:00:25
ალერგოლოგ-იმუნოლოგი ბიძინა კულუმბეგოვი„ფეისბუქის“ პირად გვერდზე გარკვეული შეზღუდვების სასწრაფოდ დაწესების აუცილებლობაზე საუბრობს.   „კომერსანტი“ მის პოსტს უვლელად გთავაზობთ:   „სამედიცინო პირბადე ყველგან, KN95 პირბადე რისკის დაავადების პირებისთვის, ღამის გადაადგილების აკრძალვა, რესტორნები მხოლოდ ღია სივრცეში, 5 ადამიანზე მეტის შეკრების შეზღუდვა, მასიური ტესტირების და ვაქცინაციის ცენტრები...   შეზღუდვები უსწრაფესად ასამოქმედებელია,...

GALT & TAGGART: ინფლაციის ორნიშნა მაჩვენებელს 2022 წლის I კვარტალშიც უნდა ველოდოთ

GALT & TAGGART: ინფლაციის ორნიშნა მაჩვენებელს 2022 წლის I კვარტალშიც უნდა ველოდოთ
access_time2021-08-03 17:00:00
ივლისში ინფლაციის ტემპი კიდევ უფრო დაჩქარდა და ორნიშნულიან მაჩვენებელს 11.9%-ს მიაღწია, რაც 10-წლიანი რეკორდია. ამ ფონზე, Galt & Taggart-ის ეკონომისტი ლაშა ქავთარაძე ინფლაციის ორნიშნა მაჩვენებელს პროგნოზირებს 2022 წელსაც. მისი თქმით, მომდევნო თვეებში ინფლაცია კვლავ ორნიშნა მაჩვენებელზე იქნება და შესაძლოა უფრო მაღალიც იყოს მიმდინარე წლის დეკემბერში. “ივნისის ინფლაციაზე მოქმედი ფაქტორები შენარჩუნდა ივლისშიც, რომელსაც კიდევ ერთი ფაქტი ემატება,...

ონლაინკაზინოების წილმა ინტერნეტშესყიდვებში 67%-ს გადააჭარბა

ონლაინკაზინოების წილმა ინტერნეტშესყიდვებში 67%-ს გადააჭარბა
access_time2021-08-03 15:00:17
ბოლო 10 წელიწადში ინტერნეტშესყიდვების მოცულობა 20-ჯერ გაიზარდა. მკვეთრი ნახტომის მიზეზი Amazon.com-ის ან რომელიმე სხვა მსგავსი საიტის პოპულარობის ზრდა არ გამხდარა. 2020 წელს ბარათებით გადარიცხული 5.458 მლრდ ლარიდან 3.708 მლრდ, ანუ 67.9% ონლაინკაზინოების ანგარიშზე გადამისამართდა. 2011 წელს ბარათებით ინტერნეტშესყიდვების მოცულობამ 185 მლნ ლარი შეადგინა. 2020 წლის დეკემბერში, მხოლოდ 1 თვეში, კაზინოების ანგარიშზე 415 მლნ ლარი ჩაირიცხა. თუ მხოლოდ ქართულ...


მსგავსი სიახლეები

up