„ფაქტი იმის შესახებ, რომ თიბისი დაზღვევამ უარი განაცხადა ზიანის ანაზღაურებაზე, სიმართლეს არ შეესაბამება. ამ ეტაპზე მიმდინარეობს გორის პოლიციაში გამოძიება. კლიენტიც ინფორმირებულია, რომ ჩვენი მხრიდან ამ ეტაპზე ვერ ხერხდება დაზღვევის ხელშეკრულების პირობების შესაბამისად სადაზღვევო რისკის ხდომილების დადგენა. არ არის ცნობილი თუ რა ვითარებაში დაზიანდა აღნიშნული აპარატი, იქედან გამომდინარე, რომ ფართს, სადაც აღნიშნული ტექნიკა იყო განთავსებული არ ეტყობა შეღწევის კვალი, არც ის რომ გარედან მესამე პირი შეიჭრა და დააზიანა, დადგენილი არ არის ფაქტობრივი გარემოებები, არც კარ-ფანჯარაა დაზიანებული, აღნიშნულის დადგენა კი გამოძიების პრეროგატივაა“, - ამის შესახებ „კომერსანტთან“ თიბისი დაზღვევის იურიდიული სამსახურის უფროსმა დავით ჭრიკიშვილმა განუცხადა, იმ ფაქტის საპასუხოდ, რომლის მიხედვითაც სილამაზის სალონის მფლობელი, შპს „ვი ემ თის“ დამფუძნებელი თეონა ხარაზიშვილი „თიბისი დაზღვევას“ ხელშეკრულების შეუსრულებლობაში ადანაშაულებს.
დავით ჭრიკიშვილი აღნიშნავს, რომ კლიენტისთვის ზიანის ანაზღაურებაზე უარი არ განუცხადებიათ, პრობლემა იმაში მდგომარეობს, რომ დღემდე არ არის ცნობილი თუ რა ვითარებაში დაზიანდა აღნიშნული აპარატი, შესაბამისად ვერ ხერხდება. მსჯელობა აღნიშნული არის თუ არა დაზღვევის ხელშეკრულების შესაბამისად დაფარული რისკი.
„ფაქტობრივი გარემოებები თუ ვის მიერ მოხდა დაზიანება, ჩვენთვის დღემდე არ არის ცნობილი, ამის ცოდნა კი იმისთვის გვჭირდება, რომ ვიმსჯელოთ ხელშეკრულების შესაბამისად ეს არის დაფარული რისკი და უნდა ავანაზღაუროთ, თუ ეს არის გამონაკლისი და ანაზღაურებაზე უარი უნდა ვთქვათ. ცალსახად, ვამბობთ რომ ამასთან დაკავშირებით კლიენტს არაერთხელ, სხვადასხვა საკომუნიკაციო არხების საშუალებით მიეწოდა ინფორმაცია, რომ ჩვენ არ ვაცხადებთ უარს ანაზღაურებაზე, უბრალოდ ჩვენ არ გვაქვს ამ ეტაპზე ინფორმაცია თუ როგორ მოხდა აპარატის დაზიანება. ხელშეკრულებით გათვალისწინებულია მთელი რიგი დაზღვეული რისკები და თუ მივიღებთ ინფორმაციას, რომ იმ ვითარებაში, რაშიც აპარატის დაზიანება მოხდა არის დაზღვეული რისკი, ცალსახად და დაუყოვნებლივ მოხდება ანაზღაურება. ჩვენი ინტერესი არ არის კლიენტისთვის ანაზღაურებაზე უარის თქმა, უბრალოდ სანამ კლიენტისგან ან გამოძიების მხრიდან არ არის ინფორმაცია თუ ვის მიერ და რა ვითარებაში მოხდა დაზღვეული ნივთის დაზიანება, ვერ ვმსჯელობთ დაზღვევის ხელშეკრულებიდან გამომდინარე ეს არის დაფარული რისკი თუ გამონაკლისი“, - განაცხადა დავით ჭრიკიშვილმა.
შეგახსენებთ, რომ რამდენიმე დღის წინ „კომერსანტზე“ გამოქვეყნდა მასალა, რომელშიც მოყვანილი იყო შპს „ვი ემ თის“ დამფუძნებელის თეონა ხარაზიშვილის ადვოკატის ამირან გიგუაშვილის განცხადა, სადაც ის სადაზღვევო კომპანიას დაზღვულისთვის ზიანის აუნაზღაურებლობაში სდებდა ბრალს. მისი თქმით, საქმე ეხება 2019 წლის 04 დეკემბერს ქ.გორში სილამაზის სალონში მომხდარ შემთხვევას, როდესაც დაზიანდა ეპილაციის აპარატი, რომელიც დაზღვეული იყო „თიბისი დაზღვევის“ მიერ და რომლის შეკეთებაც 19 400 ევრო ჯდება. ადვოკატი ამირან გიგუაშვილის განცხადებით უახლოეს დღეებში თეონა ხარაზიშვილი მიმართავს სასამართლოს სარჩელით და პარალელურად მიმართავენ დაზღვევის სახელმწიფო ზედამხედველობის სამსახურს, რათა დაინტერესდნენ ამ შემთხვევით და შესაბამისი რეაგირება მოახდინონ.
ნინო თამაზაშვილი