საქართველოში ფაიზერის დაპირებული 1 მლნ დოზიდან 28 000 დოზა შემოვიდა, რაც 14 000 ადამიანისთვისაა სამყოფი. რეგისტრაციის პროცესი 15:00 სთ-დან დაიწყო. ვაქცინაციის პროცესის დაწყებიდან პირველად, აცრა 16-17 წლის მოზარდებსაც შეეძლებათ. 

საქართველოში ვაქცინაციის პროცესის დაწყება თებერვალში იყო დაგეგმილი, თუმცა პირველი აცრა მხოლოდ 15 მარტს ჩატარდა. ისედაც მაღალი ანტივაქსერული განწყობა, 18 მარტის შემთხვევამ გაამძაფრა, როდესაც ახალციხის კლინიკაში აცრიდან ნახევარ საათში ექთანმა მეგი ბარბაქაძემ გონება დაკარგა და მეორე დღეს გარდაიცვალა. კლინიკის პერსონალმა მალევე აღიარა, რომ გართულების შემდგომ სათანადო რეაგირება არ მოუხდენიათ. ანაფილაქსიური შოკი საშუალოდ 1 მლნ-დან 6 ადამიანს ემართება და ადრენალინის დროულად გაკეთების შემთხვევაში ფატალური შედეგი არ დგება.

თავდაპირველად ვაქცინა მხოლოდ სამედიცინო პერსონალზე და 75 წელს გადაცილებულ პირებზე იყო გათვლილი, მაგრამ მიმართვიანობის სიმცირის გამო ასაკმა ჯერ 65 წლამდე, შემდეგ კი 55 წალმდე დაიწია.

ვაქცინაციის პროცესი საყოველთაოდ ხელმისაწვდომი სრულწლოვანი მოქალაქეებისთვის მაისიდან გახდა შესაძლებელი. სახელმწიფოს ჩინური სინოფარმის გამოყენება შეძენიდან მხოლოდ რამდენიმე კვირის შემდეგ დაიწყო.

თითქმის ყოველთვის, რეგისტრაციის დაწყების მომენტში, სარეგისტრაციო საიტი Booking.moh.gov.ge მაღალი დატვირთულობის გამო გაითიშა. ანტივაქსერული განწყობების შემცირების შემდეგ მოთხოვნა მიწოდებაზე მაღალი აღმოჩნდა, ადგილების არქონის გამო ადამიანებს ასაცრელად თბილისიდან 200-300 კმ-ის მოშორებით რეგიონებში მოუწიათ ჩასვლა.

გაუმართავი მენეჯმენტის გამო, ასტრა-ზენეკათი აცრილი პირები მეორე დოზის მიღებას ამ დრომდე ვერ ახერხებენ და შეზღუდული რაოდენობის ვაქცინა მხოლოდ მათთვისაა ხელმისაწვდომი, რომლის აცრიდან 10 კვირაზე მეტი გავიდა.

3 ივლისს საქართველოში სინოფარმისა და სინოვაკის 500–500 ათასი დოზა ვაქცინა შემოვიდა, რაც ჯამში 0.5 მლნ ადამიანის ორჯერადი აცრისთვისაა განკუთვნილი.

ფაიზერისა და ასტრა-ზენეკას მსგავსად, სინოფარმიცა და სინოვაკიც ჯანმოს მიერაა ავტორიზებული. უნგრეთი, ავსტრია, ნიდერლანდები ორივე ვაქცინას აღიარებს და საზღრის კვეთის შემდეგ ორჯერადად აცრილ პირს კარანტინის გავლას აღარ სთხოვს. თუმცა, მათ საფრანგეთი და აშშ არ აღიარებს.

არც ერთ ვაქცინას 100%-იანი დაცვა არ გააჩნია. ვაქცინის მთავარი დანიშნულება გართულებების შემცირება და სიკვდილიანობის ნულთან მიახლოვებაა. ავტორიზებული ვაქცინა 1 დოზის შემდეგ სივდილის რისკს 80%-ით, 2 დოზის შემდეგ კი პრაქტიკულად 100%-ით ამცირებს. მასობრივი ვაქცინაციის შემდეგ ისრაელში გარდაცვლილთა საშუალო დღიური მაჩვენებელი 65-დან 1-მდე შემცირდა, ბრიტანეთში - 1200-დან 30-მდე.

საქართველოში სულ 317 ათასი აცრაა ჩატარებული. ორჯერადად აცრილ პირთა რაოდენობა კი 120 ათასს შეადგენს, რაც მოსახლეობის მხოლოდ და მხოლოდ 3.3%-ა. ეს კი მსოფლიოში ერთ-ერთი ყველაზე დაბალი მაჩვენებელია. ისრაელმა, ბრიტანეთმა და კანადამ უკვე 60%-იანი ზღვარი გადალახეს. მოსახლეობის ნახევარზე მეტი სრულადაა აცრილი ასევე: აშშ-ში, იტალიაში, გერმანიასა და საფრანგეთში.

რუსეთში ვაქცინის 1 დოზა მოსახლეობის 32%-ს აქვს მიღებული, 4-ჯერ მეტს, ვიდრე საქართველოში, რაც აბსოლუტურად არასაკმარისი აღმოჩნდა. რუსეთში 14 ივლისს კოვიდით 786 ადამიანის გარდაცვალების ფაქტი დაფიქსირდა, რაც პანდემიის დაწყებიდან რეკორდული მაჩვენებელია. ვაქცინის 1 დოზა აზერბაიჯანში მოსახლეობის 40%-ს აქვს მიღებული, თურქეთში კი 70%-ს. საქართველოსა და სომხეთში კი 8%-ზე ნაკლებს.

საქართველოში კოვიდის პირველი შემთხვევა 2020 წლის 26 თებერვალს დაფიქსირდა, გარდაცვალების პირველი ფაქტი – 4 აპრილს. 14 ივლისის მდგომარეობით, სულ ინფიცირებულია 381 336 ადამიანი, მათგან 5492 – 1.44% გარდაიცვალა, 361 327 – 94.75% კი გამოჯანმრთელდა.