ფიზიკური პირებისთვის ოქტომბრიდან ფეისბუქზე რეკლამის განთავსება ძვირდება და მას დღგ-ს განაკვეთი 18% ემატება. დღგ-ს გადამხდელად უკვე რეგისტრირებულ იურიდიულ პირებს ცვლილებები არ შეეხება, ისინი ამ თანხას ისედაც იხდიან. დღგ-ს თანხის ჩამოჭრას, რომელიც ბიუჯეტში გადაირიცხება, თავად სოციალური ქსელი უზრუნველჰყოფს.
რეკლამას დღგ-ს განაკვეთი დაემატება მაშინ, თუ სარეკლამო მენეჯერის ადგილმდებარეობაში დაფისირებულია ქვეყანა საქართველო ან არ არ არის დადასტურებული, რომ რეკლამა კეთდება კომერციული მიზნით. რეკლამის გაშვების მსურველმა Payment Settings-ის ბმულზე გადასვლისას Edit ღილაკს უნდა დააჭიროს, შემდეგ შესაბამისი გრაფები შეავსოს და დამატებითი დაბეგვრის თავიდან აცილების მიზნით I am advertising for business purposes-ის მონიშვნით დაადასტურის, რომ რეკლამა ბიზნესის მიზნებისთვის ეშვება.
ფეისბუქრეკლამას რამდენიემე მნიშვნელოვანი უპირატესობა გააჩნია. ტელერეკლამასთან შედარებით ის გაცილებით იაფია. პრესაში განთავსებულ რეკლამასთან შედარებით მას გაცილებით დიდი აუდიტორია ნახულობს. სქესის, ასაკის, საცხოვრებელი ადგილისა და მეტ-ნაკლებად ინტერესებზე მორგებული რეკლამის გაშვებისთვისაც ფეისბუქი საუკეთესო პლატფორმად რჩება.
სპეციალური ალგორითმი, GPS ტექნოლოგიითა და თავად მომხმარებლის მიერ დარეგისტრირებისას მითითებული ინფორმაციის საუძველზე პირის ადგილმდებარეობას, სქესსა და ასაკს მარტივად ადგენს, მაშინაც კი თუ ის სხვა მომხმარებლებისთვის დამალულია. თავად ფეისბუქის ან გუგლის საძიებო ველში რაიმე საკვანძო სიტყვის ჩაწერასას სისტემა „ფიქრობს“, რომ პირს, რომელმაც „ფიტნეს დარბაზი“ დაგუგლა, ვარჯიში აინტერესებს და სპორტდარბაზების რეკლამს უჩვენებს, „ანტიკვარული ნივთების“ შემთხვევაში – ანტიკვარული ნივთების სხვა მაღაზიებს და ა.შ.
ფეისბუქზე რეკლამის განთავსება 2 გზით შეიძლება: ე.წ. დაბუსტვით და Ads Manager-ით. პირველ შემთხვევაში დარეკლამება უფრო მარტივი და ნაკლებ პროცედურას საჭიროებს, სამაგიეროდ Ads Manager-ს უფრო მეტი ფუქცია და შესაძლებლობები გააჩნია.
შემოსავლების მიღების გაზრდის მიზნით, ბოლო წლებში ყველაზე პოპულარულმა სოციალურმა ქსელმა ალგორითმი შეცვალა. თუ 6-7, ან თუნდაც 4-5 წლის წინ ფეისბუქ გვერდზე განთავსებული პოსტი გვერდის მომწონებლის 60%-ზე მეტს სქროლვისას ავტომატურად უჩნდებოდა, დღეს ეს მაჩვენებელი 10%-ზე ნაკლებია. გარდა ამისა, გაიზარდა იმ პროდუქტისა და მომსახურების სია, რომლის რეკლამასაც ფეისბუქი კრძალვს. თამბაქოს ნაწარმისა და იარაღის ნებისმიერი ქვეკატეგორიის, ალკოჰოლისა და ნარკოტიკული საშუალებების, ეროტიკული და პორნოგრაფიული მასალის, აზარტული თამაშების, რეცეპტული წამლების, სათვალთვალო მოწყობილობების, ჰაკერული მომსახურების, კრიპტოვალუტის... რეკლამას ფეისბუქი კრძალავს.
Booking.com-ის შემდეგ ეს უკვე მეორე შემთხვევაა, როდესაც ფიზიკურ პირებს დღგ-ის გადახდის ვალდებლება გაუჩნდათ. არაერთი პეტიციისა და მოთხოვნის მიუხედავად, უცხოური საიტებიდან უფასოდ გამოწერის 300–ლარიანი ზღვარი არ გაზრდილა. თუ 10 წლის წინ 300 ლარი $188 იყო, დღეს მხოლოდ $97-ა.
Facebook ერთ-ერთი პირველი და ყველაზე დიდი სოციალური ქსელია, რომელიც 2004 წლის 4 თებერვალს დაარსდა. დღეის მდგომარეობით მას 2.85 მლრდ აქტიური მომხმარებელი ჰყავს. 21%-იანი მატების შემდეგ 2020 ფესიბუქის შემოსავლებმა $86 მლრდ-ს მიაღწია. წმინდა მოგება კი კიდევ უფრო მკვეთრად 57%-ით $29 მლრდ-მდე გაიზარდა. 2021 წელს Facebook Apple-ს, Google-ის, Amazon-ისა და Microsoft-ის შემდეგ მეხუთე კომპანია გახდა, რომლის კაპიტალიზაციამაც $1 ტრლნ-ს გადააჭარბა. ივლისის მდგომარეობით ფეისბუქის კაპიტალიზაცია $1.058 ტლნ-ს უდრის. $134 მლრდ-იანი ქონებით კომპანიის დამფუძნებელი მარკ ცუკერბერგი Forbes-ის უმდიდრეს ადამიანთა რეიტინგში მე-4 ადგილს იკავებს.