ცნობილი შუშის კონსტრუქცია რიყის პარკში, რომელსაც „რიყის დოქებს“ უწოდებენ წლებია უფუნქციოდაა. დედაქალაქის მერმა კახა კალაძემ გასული წლის დეკემბერში განაცხადა, რომ ამ ობიექტის  სიმბოლურ ფასად,  1 ლარად მიღებაზე ინვესტორები უარს აცხადებდნენ.  თუმცა, რამდენიმე დღის წინ ეკონომიკის მინისტრის ნათია თურნავას განცხადებით „რიყის დოქები“ აუქციონზე გაიყიდება და მისი საწყისი ფასი 95 მილიონ დოლარს შეადგენს.

რა პოტენციალი აქვს 15 ათას კვადრატულ მეტრზე განთავსებულ ნაგებობას ბიზნესის კუთხით და არის თუ არა ამ ფასად ბიზნესჯგუფების დაინტერესების შანსი ჯერჯერობით უცნობია, თუმცა, ფინანსისტი გიგა ბედინეიშვილი მიიჩნევს, რომ აუქციონის გამჭვირვალედ ჩატარებისა და ინვესტორებს შორის ჯანსაღი კონკურენციის შემთხვევაში „რიყის დოქები“ მიმზიდველ ობიექტად შეიძლება გადაიქცეს.  

 „სახელმწიფო ქონების აუქციონისთვის გადაცემა სწორია, მაგრამ თუ 1 ლარადაც არ გამოუჩნდა მყიდველი „რიყის დოქებს“  მაშინ 95 მილიონად მითუმეტეს შეიძლება არავინ დაინტერესდეს. შესაბამისად, მერე ალბათ დაეცემა ფასი ან განახევრდება. თუ გამჭვირვალე აუქციონი ჩატარდება და საკმარისი დრო აქვთ პოტენციურ მყიდველებს, რომ ფული იშოვონ და თუ ამის უკან რამე განზრახვა არ არის, მთავრობას არ აქვს მოაზრებული მხარე, რომელმაც უნდა იყიდოს ეს ობიექტი, მაშინ მისასალმებელი ფაქტია.

არ ვიცი რა დანიშნულება შეიძლება ჰქონდეს ამ ობიექტს, მაგრამ არქიტექტურული თვალსაზრისით, თბილისის ერთ-ერთი მიმზიდველი ადგილი შეიძლება იყოს, ეს მიმზიდველობა როგორ აისახება  მომგებიანობაში, ინვესტორზეა დამოკიდებული. 95 მილიონი ლარი რამდენად სწორი ფასია ძნელი სათქმელია, თუმცა, მნიშვნელოვანია იყოს გამჭვირვალე აუქციონი.

მე მგონია, რომ  ზოგადად, გამჭვირვალობის დონე ქვეყანაში გაუარესებულია - რამდენიმე შემთხვევა იყო როცა სწრაფად მოხდა ობიქეტის გაყიდვა,  ან ახალი წლის ღამეს მოხდა, შეიძლება რაღაც წინაპირობები ჩადონ და მოარგონ მათთვის სასურველ ინვესტორს - ეს არის ის ეშმაკობები, რომელსაც მთავრობა მიმართავს ხშირად.“ - ამბობს გიგა ბედინეიშვილი.

დეკემბერში, დედაქალაქის  მერმა აღნიშნა, რომ რამდენჯერმე შეხვდა ბიზნესმენებს და აღნიშნული ფართის 1 ლარად გადაცემა შესთავაზა იმ პირობით, რომ პროექტი დაესრულებინათ და მოეწესრიგებინათ, თუმცა, ინტერესი არავის გამოუჩენია. კალაძის თქმით, სამუშაოების დასრულებას, დაახლოებით, 18-20 მილიონი სჭირდება, რადგან შიგნით არის დაუმთავრებელი 4 სართულიანი შენობა. შესაბამისად, ასეთი პროექტების განხორციელება ბიზნესისთვის რთულია.

ეკონომიკის სამინისტრომ საპრივატიზებო ნუსხაში ე.წ. რიყის დოქები პროექტის „100 საინვესტიციო შეთავაზება ბიზნესს“ ფარგლებში შეიტანა.„რიყის დოქების“ ამჟამინდელი მფლობელი ეკონომიკის სამინისტროა. ნაგებობა, რომლის მშენებლობაც 2012 წელს დასრულდა, ამ დრომდე უფუნქციოა. მასზე 75 მილიონი ლარი დაიხარჯა.

მარიამ მორგოშია