მიუნჰენის მობილობის შოუს საორგანიზაციო კომიტეტმა „ელექტრონული მობილობის რეიტინგი“ გამოაქვეყნა, რომელიც მომავალში ყოველწლიური იქნება.

რეიტინგი სხვადასხვა ქვეყნებში რეგისტრირებული ელექტრომობილების და დასატენი ჰიბრიდების რაოდენობას ეყრდნობა, მათ შორისაა არა მხოლოდ მსუბუქი ავტომობილები, არამედ საზოგადოებრივი ტრანსპორტი, მოტოციკლები, სკუტერები, ელექტრო დასატენი სადგურების ქსელები და ა.შ.

კვლევის ავტორების აზრით, დღეს მსოფლიოში 10 მლნ.-მდე ელექტრომობილია. აბსოლუტურ ციფრებში პირველ ადგილზეა ჩინეთი (4,2 მლნ.), მეორეზე ევროპა (3,2 მლნ.), ხოლო მესამეზე - აშშ (1,7 მლნ.).

2020 წელს პირველად ევროპამ ახალი ავტომობილების რეგისტრაციის კუთხით ჩინეთს გაუსწრო. ევროპაში 1,3 მლნ. ელექტრომობილია, ხოლო ჩინეთში 1,2 მლნ. მათ შორის 68% სუფთა ელექტრომობილია. ევროპაში გერმანია ლიდერობს, 2020 წელს ქვეყანაში 302 029 ახალი ელექტრომობილი დარეგისტრირდა, სულ მსოფლიოში ეს მაჩვენებელი 3, 08 მლნ.-ს შეადგენს, რაც 2019 წელთან შედარებით 45%-ით მეტია.

ევროპაში ზრდამ 143% შეადგინა, მათ შორის გერმანიაში 263%, იტალიაში 247%, საფრანგეთში 202%, ბრიტანეთში 143%.

რეიტინგში ასევე აღინიშნება, რომ ელექტრომობილებზე მოთხოვნის ზრდა პირდაპირ დაკავშირებულია სახელმწიფო სუბსიდიებთან. მაგალითად, ჩინეთში დოტაციები ეკოლოგიურად სუფთა ავტომობილების შეძენაზე შემცირდა, რამაც ელექტრომობილების რაოდენობის ყოველწლიური ზრდა 15%-მდე შეამცირა, შტატებში კი სახელმწიფო მხარდაჭერის შეწყვეტამ გაყიდვების შემცირებაც კი გამოიწვია.

1000 ადამიანზე გადათვლით, ყველაზე მეტი ელექტრომობილი ევროპაში მოძრაობს - 6,1. საშუალო მსოფლიო მაჩვენებელი ამ მხრივ ბევრად მოკრძალებულია. 1,4 ელექტრომობილი 1000 ადამიანზე.

მსოფლიო ლიდერი ამ მხრივ ნორვეგიაა, 81 ელექტრომობილი 1000 ადამიანზე. ლიდერებს შორისაა ასევე ისლანდია (36,8) და შვედეთი (20,6). გერმანიაში ეს მაჩვენებელი 8,5-ს, ბრიტანეთში 6,7-, საფრანგეთი 6,4-ს, შტატებში 5,2-ს, ჩინეთში 3-ს. სამხრეთ კორეაში 2,9-ს, იტალიაში 1,7-ს, ავსტრალიაში 0,5-ს, პოლონეთში 0,4-ს, საბერძნეთში - 0,3-ს შეადგენს.

გლობალურ საავტომობილო ბაზარზე ელექტრომობილებზე ახალი სატრანსპორტო საშუალებების 4,6% მოდის. ამ მხრივაც ლიდერი ნორვეგიაა, სადაც 2020 წელს ნაყიდ ავტომობილებს შორის 74,8% ელექტრომობილი იყო.

საშუალოდ ევროპაში 2020 წელს გაყიდულ ავტომობილებს შორის 11,4%-ს ელექტრონული იყო, მათ შორის გერმანიაში 13,5%, საფრანგეთში 10,0%, იტალიაში 4,3%. ჩინურ ბაზარზე ახალი გაყიდულ ავტომობილებში  ელექტრომობილებზე 6,3% მოდის.

წყარო: iaa.de

მოამზადა თენგიზ აბლოთიამ