ევროპის ქვეყნებში, ვაქცინაციის დაწყების და ეკონომიკის აღდგენის მოლოდინების მიუხედავად, საკარანტინო შეზღუდვები არ რბილდება. მთავრობები მოსახლეობას აფრთხილებენ, რომ დამშვიდება ნაადრევია და ჯერ არაფერი დასრულებულა.
მარტის დასაწყისში ევროკავშირის 31-დან 13 ქვეყანაში დაინფიცირების მთლიანი მაჩვენებელი გაიზარდა, 4-ში - ასაკოვანთა კატეგორიაში გაიზარდა, 3-ში ჰოსპიტალიზაციის შემთხვევებმა იმატა, ხოლო 3-ში - სიკვდილიანობის ზრდა დაფიქსირდა.
ზოგადი ეპიდემიოლოგიური მდგომარეობა უმჯობესდება, თუმცა, მაჩვენებლები კვლავ ძალიან მაღალი რჩება. ექსპერტები არ გამორიცხავენ, რომ უახლოეს კვირებში დაინფიცირების, ჰოსპიტალიზაციის და სიკვდილიანობის მაჩვენებლები ევროპაში კიდევ უფრო გაიზრდება.
შექმნილ ვითარებაში ევროპის ქვეყნების შეზღუდვების მოხსნას არ ჩქარობენ.
ფინეთმა 1 მარტს საგანგებო მდგომარეობა გამოაცხადა. პარლამენტში ისეთი ზომების მიღების საკითხი განიხილება, როგორც რესტორნების დახურვა და ქვეყნის ტერიტორიაზე გადაადგილების შეზღუდვაა.
ჩეხეთში ამ კვირას კორონავირუსით დაავადებულთა რაოდენობა რეკორდულად, 12 150-ით გაიზარდა, მათ შორის 7717 ჰოსპიტალიზებულია, ხოლო 1586 ხელოვნურ სუნთქვაზეა. 1 მარტიდან ქვეყნის ტერიტორიაზე გადაადგილება შეიზღუდა, ასევე საბავშვო ბაღების და სკოლების დახურვა იგეგმება.
იტალიაში ქვეყნის ტერიტორიაზე გადაადგილებაზე შეზღუდვა 27 მარტამდე გაგრძელდა, თუმცა, დაინფიცირების მასშტაბები მცირდება - ნოემბერში ყოველდღიური მაჩვენებელი 40 000 იყო, ხოლო თებერვალში - 15 000.
გერმანიაში ლოკდაუნი 28 მარტამდე გახანგძლივდა.
საბოლოო ჯამში, ამა თუ იმ სიმძიმის შეზღუდვები ევროკავშირის ყველა ქვეყანაში მოქმედებს.
წლის დასაწყისში ევროგაერთიანების ხელმძღვანელობამ მასობრივი ვაქცინაციის კამპანია დაიწყო, რომელსაც კონტინენტზე ცხოვრება ეტაპობრივად ნორმალურ კალაპოტში უნდა დაებრუნებინა. თუმცა, პრეპარატის დეფიციტის გამო, პროგრამა შეფერხებებით მიმდინარეობს, სხვადასხვა მიზეზების გამო ფარმაკოლოგიურმა კომპანიები საკმარისი რაოდენობის ვაქცინების წარმოებას ვერ ახერხებენ.
სტატისტიკაც განსხვავებულია და ის ევროკავშირის სასარგებლოდ არ მეტყველებს. ბრიტანეთში, რომელიც ევროკავშირიდან გავიდა, მოსახლეობის 30% აიცრა, ისრაელში კი 53,7%.
ევროკავშირის ქვეყნებს შორის მაჩვენებლები ბევრად უფრო დაბალია. იტალიაში ვაქცინაცია მოსახლეობის 4,9%-მა გაიარა, საფრანგეთში - 4,4%, ესპანეთში 5,5%, გერმანიაში - 5,1%-მა.
მასობრივ ვაქცინაციას დეფიციტის გარდა უფროსი ასაკის ადამიანებისთვის დაწესებული შეზღუდვები აფერხებს, მაგალითად, საფრანგეთში 75 წელზე უფროსი ადამიანების აცრა აკრძალული იყო, თუმცა, რამდენიმე დღის წინ ეს აკრძალვა მოიხსნა.
ასაკოვანი ადამიანების ვაქცინაციაზე შეზღუდვები ევროკავშირის სხვა ქვეყნებშიც მოქმედებს, მაგალითად იტალიაში, გერმანიაში და ბელგიაში, თუმცა, ყველგან განიხილება ამ ზომების გაუქმება.
შეზღუდვის მიზეზი იყო ვაქცინების მოქმედების გაურკვევლობა ასაკოვან ადამიანებზე, თუმცა ბოლო კვლევებმა აჩვენა, რომ შიშები უსაფუძვლოა. Pfizer-BioNtech-ის და Oxford-AstraZeneca-ს პრეპარატით აცრის შემთხვევაში ასაკოვან ადამიანებს განსაკუთრებული გართულებები არ აღენიშნებოდა და ამავე დროს დაავადების მძიმე მიმდინარეობა და ჰოსპიტალიზების რისკი 81%-ით შემცირდა.
rbc.ru
მოამზადა თენგიზ აბლოთიამ
კარანტინი
