„გაზპრომი“ ევროპაში უკრაინის გავლით გაზის მიწოდების ზრდაზე უარს ამბობს, რამაც 1000 კბ/მ ცისფერი საწვავის ფასების მკვეთრი - $500-მდე ზრდა გამოიწვია.
ანალიტიკოსების აზრით, საცავებში გაზის მცირე რაოდენობის და აზიაში მოხმარების ზრდის ფონზე, უახლოეს პერიოდში გაზის გაიაფება მოსალოდნელი არ არის, ხოლო „გაზპრომის“ მკაცრი მიდგომა უკრაინული ტრანზიტისადმი ვითარებას ბაზარზე კიდეც უფრო ართულებს.
პარალელურად ევროპაში თხევადი გაზის მიწოდებაც მცირდება - ივლისის დასაწყისიდან ეს მაჩვენებელი 2020 წლის ანალოგიურ პერიოდთან შედარებით 22%-ით ნაკლებია. მთელი თხევადი გაზი აზიაში მიემართება, სადაც ცხელი ამინდის და ეკონომიკური აღმავლობის ფონზე ენერგომოხმარება მკვეთრად იზრდება.
Platts Analytics-ის პროგნოზით, 2021 წლის მე-3 კვარტალში გაზის მოხმარება დასავლეთ ევროპაში დღევანდელთან შედარებით შემცირდება, თუმცა ფასების კლება მხოლოდ „ჩრდილოეთის ნაკადი-2“-ის ამოქმედების შემდეგ დაიწყება - სავარაუდოდ, ამ მილსადენით გაზს კომერციული მიწოდება ოქტომბერში დაიწყება.
„გაზპრომმა“ თავისი ექსპორტის საშუალო წლიური ფასი 2021 წლისთვის 240 დოლარად განსაზღვრა, ხოლო თხევადი გაზის რუსულმა მწარმოებელმა „ნოვატეკმა“ – 24-მდე. „ნოვატეკის“ ინფორმაციით, 2021 წლის მეორე კვარტალში გაზის რეალიზების ღირებულება 41%-ით, ხოლო კომპანიის საშუალო წლიური მოგება 139%-ით გაიზარდა.
ექსპერტთა აზრით, თუ აზიაში გაზის ფასი მკვეთრად არ გაიზარდა, რაც მოთხოვნას მნიშვნელოვნად შეამცირებს და ამავე დროს „გაზპრომმა“ თავისი მიდგომა უკრაინული ტრანიზიტისადმი არ შეცვალა, გაზზე დაბალი ფასები წლის ბოლოზე ადრე მოსალოდნელი არაა.
ამ დროისთვის არსებული ტრენდები - მოხმარების ზრდა, საცავებში არასაკმარისი მარაგები და ევროპაში თხევადი გაზის იმპორტის შემცირება - ფასების შემცირებას ხელს არ უწყობენ.
სავარაუდოდ, წლის ბოლომდე რუსული გაზის ღირებულება ევროპულ ბაზარზე 460-480 დოლარის ფარგლებში იქნება, შემდეგ, მცირეხნიანი სტაგნაციის შემდეგ, ზამთარში ფასების კლება დაიწყება.
თუმცა, ეს მხოლოდ იმ შემთხვევაში, თუ ზამთარი ევროპაში განსაკუთრებით ცივი არ იქნება, რაც ბოლო ხანებში სულ უფრო ხშირად ხდება.
ცივი ამინდების შემთხვევაში ევროპაში გაზზე მოთხოვნა გაიზრდება და მასთან ერთად - ფასებიც.
kommersant.ru